Mahabharata · Chapter 7.149

tasminvinihate vīre saindhave savyasācinā /
māmakā yadakurvanta tanmamācakṣva sañjaya //

paśyatāṃ sarvasainyānāṃ māmakānāṃ mahāraṇe /
ahanyata kathaṃ yuddhe saindhavaḥ savyasācinā //

kathaṃ drauṇikṛpairguptaḥ karṇena ca mahāraṇe /
phalgunāgnimukhaṃ ghoraṃ praviṣṭaḥ sādhu saindhavaḥ //

tasminhate maheṣvāse mandātmā sa suyodhanaḥ /
bhrātṛbiḥ sahitaḥ sūta kimakārṣīdanantaram //
sañjaya uvāca /

saindhavaṃ nihataṃ dṛṣṭvā raṇe pārthena bhārata /
amarṣavaśamāpannaḥ kṛpaḥ śāradvatastataḥ //

mahatā śaravarṣeṇa pāṇḍavaṃ samavākirat /
drauṇiścābhyadravadrājanrathamāsthāya phalgunam //

tāvetau rathināṃ śreṣṭhau rathābhyāṃ rathasattamau /
ubhāvubhayatastīkṣṇairviśikhairabhyavarṣatām //

sa tathā śaravarṣābhyāṃ sumahaddhyāṃ mahābhujaḥ /
pīḍyamānaḥ parāmārtimagamadrathināṃ varaḥ //

so'jighāṃsurguruṃ saṅkhye gurostanayameva ca /
cakārācāryakaṃ tatra kuntīputro dhanañjayaḥ //

astrairastrāṇi saṃvārya drauṇeḥ śāradvatasya ca /
mandavegāniṣūṃstābhyāmajighāṃsuravāsṛjat //

tena nātibhṛśaṃ trastau viśikhairbhṛśapīḍitau /
bahutvāttu parāmārtiṃ śarāṇāṃ tāvagacchatām //

atha śāradvato rājankaunteyaśarapīḍitaḥ /
avāsīdadrathopasthe mūrcchāmabhijagāma ha //

vihvalaṃ tamabhijñāya bhartāraṃ śarapīḍitam /
hato'yamiti ca jñātvā sārathistamapāvahat //

tasminbhagne mahārāja kṛpe śāradvate yudhi /
aśvatthāmāpyapāyāsītpāṇḍaveyādrathāntaram //

dṛṣṭvā śāradvataṃ pārtho mūrcchitaṃ śarapīḍitam / dhigdhiṅmāmiti caivoktvā kṛpaṇaṃ paryadevayat /
aśrupūrṇamukho dīno vacanaṃ cedamabravīt //

paśyannidaṃ mahāprājñaḥ kṣattā rājānamuktavān /
kulāntakaraṇe pāpe jātamātre suyodhane //

nīyatāṃ paralokāya sādhvayaṃ kulapāṃsanaḥ /
asmāddhi kurumukhyānāṃ mahadutpatsyate bhayam //

tadidaṃ samanuprāptaṃ vacanaṃ satyavādinaḥ /
tatkṛte hyadya paśyāmi śaratalpagataṃ gurum //

dhigastu kṣātramācāraṃ dhigastu balapauruṣam /
ko hi brāhmaṇamācāryamabhidruhyeta mādṛśaḥ //

ṛṣiputro mamācāryo droṇasya paramaḥ sakhā /
eṣa śete rathopasthe kṛpo madbāṇapīḍitaḥ //

akāmayānena mayā viśikhairardito bhṛśam /
avasīdanrathopasthe prāṇānpīḍayatīva me //

putraśokābhitaptena śarairabhyarditena ca /
abhyasto bahubhirbāṇairdaśadharmagatena vai //

śarārditaḥ sa hi mayā prekṣamāṇo mahādyutiḥ / śocayatyeṣa niyataṃ bhūyaḥ putravadhāddhi mām /
kṛpaṇaṃ svarathe sannaṃ paśya kṛṣṇa yathāgatam //

upākṛtya tu vai vidyāmācāryebhyo nararṣabhāḥ /
prayacchantīha ye kāmāndevatvamupayānti te //

ye ca vidyāmupādāya gurubhyaḥ puruṣādhamāḥ /

ghnanti tāneva durvṛttāste vai nirayagāminaḥ //

tadidaṃ narakāyādya kṛtaṃ karma mayā dhruvam /
ācāryaṃ śaravarṣeṇa rathe sādayatā kṛpam //

yattatpūrvamupākurvannastraṃ māmabravītkṛpaḥ /
na kathañcana kauravya prahartavyaṃ gurāviti //

tadidaṃ vacanaṃ sādhorācāryasya mahātmanaḥ /
nānuṣṭhitaṃ tamevājau viśikhairabhivarṣatā //

namastasmai supūjyāya gautamāyāpalāyine /
dhigastu mama vārṣṇeya yadasmai praharāmyaham //
sañjaya uvāca /

tathā vilapamāne tu savyasācini taṃ prati / *tato rājanhṛṣṭīkeśaḥ sanṅgāmaśirasi sthitam /
tīrṇapratijñaṃ bībhatsuṃ pariṣvajyainamabravīt //

diṣṭhyā sampāditā jiṣṇo pratijñā mahatī tvayā /
diṣṭyā vinihataḥ pāpo vṛddhakṣatraḥ sahātmajaḥ //

dhārtarāṣṭrabalaṃ prāpya devasenāpi bhārata /
sīdeta samare jiṣṇo nātra kāryā vicāraṇā //

na taṃ paśyāmi lokeṣu cintayanpuruṣaṃ kvacit /
tvadṛte puruṣavyāghra ya etadyodhayedbalam //

mahāprabhāvā bahavastvayā tulyādhikāpi vā /
sametāḥ pṛthivīpālā dhārtarāṣṭrasya kāraṇāt //

te tvāṃ prāpya raṇe kruddhā nābhyavartanta daṃśitāḥ /
tava vīryaṃ balaṃ caiva rudraśakrāntakopamam //

nedṛśaṃ śaknuyātkaścidrame kartuṃ parākramam /
yādṛśaṃ kṛtavānadya tvamekaḥ śatrutāpanaḥ //

evameva hate karṇe sānubandhe durātmani /
vardhayiṣyāmi bhūyastvāṃ vijitāriṃ hatadviṣam //

tamarjunaḥ pratyuvāca prasādāttava mādhava /
pratijñeyaṃ mayā tīrṇā vibudhairapi dustarā //

anāścāryo jayasteṣāṃ yeṣāṃ nātho'si keśava /
tvatprasādānmahīṃ kṛtsnāṃ samprāpsyati yudhiṣṭhiraḥ //

tavaiṣa bhāro dhārṣṇeya tavaiva vijayaḥ prabho /
vardhanīyāstava vayaṃ preṣyāśca madhusūdana //

evamuktastataḥ kṛṣṇaḥ śanakairvāhayanhayān /
darśayāmāsa pārthāya krūramāyodhanaṃ mahat //
śrīkṛṣṇa uvāca /

prārthayanto jaye yuddhe prathitaṃ ca mahadyaśaḥ /
pṛthivyāṃ śerate śūrāḥ pārthivāstvaccharairhatāḥ //

vikīrṇaśastrābharaṇā vipannāśvarathadvipāḥ /
sañchinnabhinnamarmāṇo vaiklavyaṃ paramaṃ gatāḥ //

sasatvā gatasatvāśca prabhayā parayā yutāḥ /
sajīvā iva lakṣyante gatasatvā narādhipāḥ //

teṣāṃ śaraiḥ svarṇapuṅkhaiḥ śastraiśca vividhaiḥ śitaiḥ /
vāhanairāyudhaiścaiva sampūrṇāṃ paśya medinīm //

varmabhiścarmabhirhāraiḥ śirobhiśca sakuṇḍalaiḥ /
uṣṇīṣairmakuṭaiḥ sragbhiścūḍāmaṇibhirambaraiḥ //

kaṇṭhasūtrairaṅgadaiśca niṣkairapi ca saprabhaiḥ /
anyaiścābharaṇaiścitrairbhāti bhārata medinī //

[anukarṣairupāsaṅgaiḥ patākābhirdhvajaistathā /
upaskarairadhiṣṭhānairīṣādaṇḍakabandhuraiḥ //

cakraiḥ pramathitaiścitrairakṣaiśca bahudhā raṇe /
yugairyoktraiḥ kalāpaiśca dhanurbhiḥ sāyakaistathā //

paristomaiḥ kuthābhiśca parighairaṅkuśaistathā /
śaktibhirbhiṇḍipālaiśca tūṇaiḥ śūlaiḥ paraśvathaiḥ //

prāsaiśca tomaraiścaiva kuntairyaṣṭibhireva ca /
śataghnībhirbhuśuṇḍībhiḥ khaṅgaiḥ paraśubhistathā //

musalairmudgaraiścaiva gadābhiḥ kuṇapaistathā /
suvarṇavikṛtābhiśca kaśābhirbharatarṣabha //

ghaṇṭābhiśca gajendrāṇāṃ bhāṇḍaiśca vividhairapi / sragbhiśca nānābharaṇairbastraiścaiva mahādhanaiḥ /
apaviddhairbabhau bhūmirgrahairdyauriva śāradī //

pṛthivyāṃ pṛthivīhetoḥ pṛthivīpatayo hatāḥ /
pṛthivīmupaguhyāṅgaiḥ suptāḥ kāntāmiva priyām //

imāṃśca girikūṭābhānnāgānairāvatopamān / kṣarataḥ śoṇitaṃ bhūri śastracchedadarīmukhaiḥ /
darīmukhairiva girīngairikāmbuparisravān //

tāṃśca bāṇahatānvīra paśya niṣṭanataḥ kṣitau /
hayāṃśca patitānpaśya svarṇabhāṇḍavibhūṣitān //

gandharvanagarākārānrathāṃśca nihateśvarān /
chinnadhvajapatākākṣānvicakrānhatasārathīn //

nikṛttakūbarayugānbhagneṣānbandhurānprabho /
paśya pārtha hayānbhūmau vimānopamadarśanān //

pattīṃśca nihatānvīra śataśo'tha sahasraśaḥ /
dhanurbhṛtaścarmabhṛtaḥ śayānānrudhirokṣitān //

mahīmāliṅgya sarvāṅgaiḥ pāṃsudhvastaśiroruhān /
paśya yodhānmahābāho tvaccharairbhinnavigrahān //

nipātitadviparathājisaṅkula-- masṛgvasāpiśitasamṛddhakardamam /
niśācaraśvavṛkapiśācamodanaṃ mahītalaṃ naravara paśya durdṛśam //

idammahattvayyupapadyate prabho raṇājire karma yaśo'bhivardhanam /
śatakratau cāpi ca devasattame mahāhave jaghnuṣi daityadānavān // ]
sañjaya uvāca /

evaṃ sandarśayankṛṣṇo raṇabhūmiṃ kirīṭine /
svaiḥ sametaḥ samuditaiḥ pāñcajanyaṃ vyanādayat //

sātyakiḥ pārthamabhyāyādbhīmasenaśca pāṇḍavaḥ /
yudhāmanyūttamaujau ca pāñcālasyātmajāvubhau //

te nivārya śarairdrauṇiṃ karṇaṃ ca saha bhūmipaiḥ /
āgacchanrathinaścaiva yatra rājā yudhiṣṭhiraḥ //

sa darśayanneva kirīṭine'rihā janārdanastāmaribhūmimañjasā /
ajātaśatruṃ samupetya pāṇḍavaṃ nivedayāmāsa hataṃ jayadratham //