Mahabharata · Chapter 7.150

tato rājānamabhyetya dharmaputraṃ yudhiṣṭhiram /
vavande samprahṛṣṭātmā hate pārthena saindhave //

diṣṭyā vardhasi rājendra hataśatrurnarottama /
diṣṭyā nistīrṇavāṃśaiva pratijñāmanujastava //

sa tvevamuktaḥ kṛṣṇena hṛṣṭaḥ parapurañjayaḥ / tato yudhiṣṭhiro rājā rathādāplutya bhārata /
paryaṣvajattadā kṛṣṇāvānandāśrupariplutaḥ //

pramṛjya vadanaṃ śubhraṃ puṇḍarīkasamaprabham /
abravīdvāsudevaṃ ca pāṇḍavaṃ ca dhanañjayam //

priyametadupaśrutya tvattaḥ puṣkaralocana /
nāntaṃ gacchāmi harṣasya titīrṣurudadheriva //

atyadbhutamidaṃ kṛṣṇa kṛtaṃ pārthena dhīmatā /
diṣṭyā paśyāmi saṅgrāme tīrṇabhārau mahārathau //

diṣṭyā ca nihataḥ pāpaḥ saindhavaḥ puruṣādhamaḥ /
diṣṭyā śatrugaṇāścaiva nimagnāḥ śokasāgare //

kṛṣṇa diṣṭyā mama prītirmahatī pratipāditā /
tvayā guptena govinda ghnatā pāpaṃ jayadratham //

kintu nātyadbhutaṃ teṣāṃ yeṣāṃ nastvaṃ samāśrayaḥ / na teṣāṃ duṣkṛtaṃ kiñcittriṣu lokeṣu vidyate /
sarvalokagururyeṣāṃ tvaṃ nātho madhusūdana //

tvatprasādāddhi govinda vayaṃ jeṣyāmahe ripūn /
yathā purā prasādātte dānavānpākaśāsanaḥ //

pṛthivyā vijayo vāpi trailokyavijayo'pi vā /
dhruvo hi teṣāṃ vārṣṇeya yeṣāṃ tuṣṭo'si mānada //

na teṣāṃ vidyate pāpaṃ saṅgrāme vā parājayaḥ /
tridaśeśvara nāthastvaṃ yeṣāṃ tuṣṭo'si mādhava //

tvatprasādāddhṛṣīkeśa śakraḥ suragaṇeśvaraḥ /
trailokyavijayaṃ śrīmānprāptavānraṇamūrdhani //

tava caiva prasādena tridaśāstridaśeśvarāḥ /
amaratvaṃ gatāḥ kṛṣṇa lokāṃścāśnuvate'kṣayān //

sthitaḥ sarvātmanā nityaṃ priyeṣu ca hiteṣu ca / tvāṃ caivāsmābhirāśritya kṛtaḥ śastrasamudyamaḥ /
surairivāsuravadhe śakraṃ śakrānujāhave //

asambhāvyamidaṃ karma devairapi janārdana /
tvadbuddhibalavīryeṇa kṛtavāneṣa phalgunaḥ //

bālyātprabhṛti te kṛṣṇa karmāṇi śrutavānaham / amānuṣāṇi divyāni mahānti ca bahūni ca /
tadaivājñāsiṣaṃ śatrūnhatānprāptāṃ ca medinīm //

tvatprasādasamutthena vikrameṇārisūdana /
sureśatvaṃ gataḥ śakro hatvā daityānsahasraśaḥ //

tvatprasādādvṛṣīkeśa jagatsthāvarajaṅgamam /
svavartmani sthitaṃ vīra japarahomeṣu vartate //

ekārṇavamidaṃ pūrvaṃ sarvamāsīttamomayam /
tvatprasādānmāhābāho jagatprāptaṃ narottama //

sraṣṭāraṃ sarvalokānāṃ paramātmānamavyayam /
ye paśyanti hṛṣīkeśa na te muhyanti karhicit //

purāṇaṃ paramaṃ devaṃ devadevaṃ sanātanam /
ye prapannāḥ suraguruṃ na te muhyanti karhicit //

anādinidhanaṃ devaṃ lokakartāramavyayam /
ye bhaktāstvāṃ hṛṣīkeśa durgāṇyatitaranti te //

paraṃ purāṇaṃ puruṣaṃ parāṇāṃ paramaṃ ca yat /
prapadyatastatparamaṃ parā bhūtirvidhīyate //

gāyanti caturo vedā yaśca deveṣu gīyate /
taṃ prapadya mahātmānaṃ bhūtimaśnāmyanuttamām //

parameśa pareśeśa tiryagīśa nareśvara /
sarveśvareśvareśena namaste puruṣottama //

tvamīśeśeśvareśāna prabho vardhasva mādhava /
prabhavāpyaya sarvasya sarvātmanpṛthulocana //

dhanañjayasakhā yaśca dhanañjayahitaśca yaḥ /
dhanañjayasya goptā taṃ prapadya sukhamedhate //

[mārkaṇḍeyaḥ purāṇarṣiścaritajñastavānagha /
māhātmyamanubhāvaṃ purā phīrtitavānmuniḥ //

asito devalaścaiva nāradaśca mahātapāḥ /
pitāmahaśca me vyāsastvāmāhurvidhimuttamam //

tvaṃ tejastvaṃ paraṃ brahma tvaṃ satyaṃ tvaṃ mahattapaḥ /
tvaṃ śreyastvaṃ yaśaścāgr्yaṃ kāraṇaṃ jagatastathā //

tvayā sṛṣṭamidaṃ sarvaṃ jagatsthāvarajaṅgamam /
pralaye samanuprāpte tvāṃ vai niviśate punaḥ //

anādinidhanaṃ devaṃ viśvasyeśaṃ jagatpate /
dhātāramajamavyaktamāhurvedavido janāḥ //

bhūtātmānaṃ mahātmānamanantaṃ viśvatomukham / api devā na jānanti guhyamādyaṃ jagatpatim /
nārāyaṇaṃ paraṃ devaṃ paramātmānamīśvaram //

jñānayoniṃ hariṃ viṣṇuṃ mumukṣūṇāṃ parāyaṇam /
paraṃ purāṇaṃ puruṣaṃ purāṇānāṃ paraṃ ca yat //

evamādiguṇānāṃ te karmaṇāṃ divi ceha ca /
atītabhūtabhavyānāṃ saṅkhyātā'tra na vidyate //

sarvato rakṣaṇīyāḥ sma śakreṇeva divaukasaḥ /
yaistvaṃ sarvaguṇopetaḥ suhṛnna upapāditaḥ //

ityevaṃ dharmarājena harirukto mahāyaśāḥ /
anurūpamidaṃ vākyaṃ pratyuvāca janārdanaḥ //

bhavatā tapasogreṇa dharmeṇa parameṇa ca /
sādhutvādārjavāccaiva hataḥ pāpo jayadrathaḥ //

ayaṃ ca puruṣavyāghra tvadanudhyānasaṃvṛtaḥ /
hatvā yodhasahasrāṇi nyahañjiṣṇurjayadratham //

kṛtitve bāhuvīrye ca tathaivāsambhrame'pi ca /
śīghratāmodhabuddhitve nāsti pārthasamaḥ kvacit //

tadayaṃ bharataśreṣṭha bhrātā te'dya yadarjunaḥ /
sainyakṣayaṃ raṇe kṛtvā sindhurājaśiro'harat //

tato dharmasuto jiṣṇuṃ pariṣvajya viśāmpate /
pramṛjya vadanaṃ tasya paryāśvāsayata prabhuḥ //

atīva sumahatkarma kṛtavānasi phalguna /
asahyaṃ cāviṣahyaṃ ca devairapi savāsavaiḥ //

diṣṭā nistīrṇabhāro'si hatāriścāsi śatruhan /
diṣṭyā satyā pratijñeyaṃ kṛtā hatvā jayadratham //

evamuktvā guḍākeśaṃ dharmarājo mahāyaśāḥ / pasparśa puṇyagandhena pṛṣṭhe hastena pārthivāḥ // ]
sañjaya uvāca /

evamuktau mahātmānāvubhau keśavapāṇḍavau /
tāvabrūtāṃ tadā kṛṣṇau rājānaṃ pṛthivīpatim //

tava kopāgninā dagdhaḥ pāpo rājañjayadrathaḥ /
uttīrṇaṃ cāpi sumahaddhārtarāṣṭrabalaṃ raṇe //
yudhiṣṭhira uvāca /

hanyante nihatāścaiva vinaṅkṣyanti ca keśava /
tava krodhahatā hyete kauravāḥ śatrusūdana //

tvāṃ hi cakṣurhaṇaṃ vīra kopayitvā suyodhanaḥ /
samitrabandhuḥ samare prāṇāṃstyakṣyati durmatiḥ //

tava krodhahataḥ pūrvaṃ devairapi sudurjayaḥ /
śaratalpagataḥ śete bhīṣmaḥ kurupitāmahaḥ //

durlabho vijayasteṣāṃ samprāme ripughātinām /
yātā mṛtyuvaśaṃ te vai yeṣāṃ kruddho'pi mādhava //

rājyaṃ prāṇāḥ śriyaḥ putrāḥ saukhyāni vividhāni ca /
acirāttasya naśyanti yeṣāṃ kruddho'si mānada //
bhagavānuvāca /

vinaṣṭānkauravānmanye saputrapaśubāndhavān /
rājadharmapare nityaṃ tvayi kruddhe parantapa //
sañjaya uvāca /

tato bhīmo mahābāhuḥ sātyakiśca mahārathaḥ / abhivādya guruṃ jyeṣṭhaṃ mārgaṇaiḥ kṣatavikṣatau /
kṣitāvāstāṃ maheṣvāsau pāñcālyaparivāritau //

tau dṛṣṭvā mudito vīrau prāñjalī cāgrataḥ sthitau /
abhyanandata kaunteyastāvubhau bhīmasātyakī //

diṣṭyā paśyāmi vā śūrau vimuktau sainyasāgarāt /
droṇagrāhadurādharṣāddhārdikyamakarālayāt //

diṣṭyā vinirjitāḥ saṅkhye pṛthivyāṃ sarvapārthivāḥ /
yuvāṃ vijayinau cāpi diṣṭyā paśyāmi saṃyuge //

diṣṭyā droṇo jitaḥ saṅkhye hārdikyaśca mahābalaḥ /
diṣṭyā vikarṇibhiḥ karṇoraṇe nītaḥ parābhavam //

vimukhaśca kṛtaḥ śalyo yuvābhyāṃ puruṣarṣabhau / diṣṭyā yuvāṃ kuśalinau saṅgrāmātpunarāgatau /
paśyāmi rathināṃ śreṣṭhāvubhau yuddhaviśāradau //

mama vākyakarau vīrau mama gauravayantritau /
sainyārṇavaṃ samuttīrṇau diṣṭyā paśyāmi vāmaham //

samaraślāghinau vīrau samareṣvaparājitau /
mama vākyasamau caiva diṣṭyā paśyāmi vāmaham //

ityuktvā pāṇḍavo rājanyuyudhānavṛkodarau /
sasvaje puruṣavyāghrau harṣādbāṣpaṃ mupoca ha //

tataḥ pramuditaṃ sarvaṃ balamāsīdviśāmpate /
pāṇḍavānāṃ raṇe hṛṣṭaṃ yuddhāya tu mano dadhe //