Mahabharata · Chapter 7.148

evasminneva kāle tu tvaramāṇe divākare /
abravītpāṇḍavaṃ tatra tvaramāṇo janārdanaḥ //

pārtha pārtha śiro hyenadyatkṛte na patedbhuvi /
śrūyatāṃ tadyathāvṛttaṃ kāraṇaṃ saindhavaṃ *prati //

vṛddhakṣatraḥ saindhavasya pitā jagati viśrutaḥ /
sa ca ghoreṇa tapasā daindhavaṃ prāptavānsutam //

jayadrathamamitraghnaṃ vāguvācāśarīriṇī /
nṛpamantarhitā vāṇī meghadundubhiniḥsvanā //

tavātmajo manuṣyendra kulaśīladamādibhiḥ / guṇairbhaviṣyati vibho sadṛśo vaṃśayordvayoḥ /
kṣatriyapravaro loke nityaṃ śūrābhisatkṛtaḥ //

śiraśchetsyati saṅkruddhaḥ śatruścālakṣito bhuvi //

etacchrutvā sindhurājo dhyātvā ciramarindamaḥ /
jñātīnsarvānuvācedaṃ putrasnehābhicoditaḥ //

saṅgrāme yudhyamānasya vahato mahatīṃ dhuram /
dharaṇyāṃ mama putrasya pātayiṣyati yaḥ śiraḥ //

tasyāpi śatadhā mūrdhā phaliṣyati na saṃśayaḥ /
yadi cedasti me lābhastapaso vā damasya vā //

evamuktvā tato rājye sthāpayitvā jayadratham /
vṛddhakṣatro vanaṃ yātastapaścograṃ samāsthitaḥ //

so'yaṃ tapyati tejasvī tapo ghoraṃ durāsadam /
syamantapañcakādasmādbahirvānaraketana //

tasmājjayadrathasya tvaṃ śiraśchittvā mahāmṛdhe /
divyenāstreṇa ripuhanghoreṇādbhutakarmaṇā //

sakuṇḍalaṃ sindhupateḥ prabhañjanasutānuja /
utsaṅge pātayasvāsya vṛddhakṣatrasya bhārata //

atha tvamasya mūrdhānaṃ pātayiṣyasi bhūtale /
tavāpi śatadhā mūrdhā phaliṣyati na saṃśayaḥ //

yathā cedaṃ na jānīyātsa rājā tapasi sthitaḥ /
tathā kuru kuruśreṣṭha divyamastramupāśritaḥ //

na hyasādhyamakāryaṃ vā vidyate tava kiñcana /
samasteṣvapi lokeṣu triṣu vāsavanandana //

yathaitatsaindhavaśiraḥ śaraireva dhanañjaya /
vṛddhakṣatre patatyeva tathā nītirvidhīyatām //
sañjaya uvāca /

tataḥ sumahadāścaryaṃ tatrāpaśyāma bhārata /
syamantapañcakādbāhyaṃ śiro yadvyaharattataḥ //

etasminneva kāle tu vṛddhakṣatro mahīpatiḥ /
sandhyāmupāste tejasvī sambandhī tava māriṣa //

upāsīnasya tasyātha kṛṣṇakeśaṃ sakuṇḍalam /
sindhurājasya mūrdhānamutsaṅge samapātayat //

tasyotsaṅge nipatitaṃ śirastaccārukuṇḍalam /
vṛddhakṣatrasya nṛpateralakṣitamarindama //

kṛtajapyasya tasyātha vṛddhakṣatrasya bhārata /
prottiṣṭhatastatsahasā śiro'gacchadvarātalam //

tatastasya narendrasya putramūrdhani bhūtale /
gate tasyāpi śatadhā mūrdhā'gacchadarindama //

tataḥ sarvāṇi sainyāni vismayaṃ jagmuruttamam /
vāsudevaśca bībhatsuṃ praśaśaṃsa mahāratham //

tato dṛṣṭvā vinihataṃ sindhurājaṃ jayadratham /
karmaṇā tena pārthasya vismitāḥ sarvadevatāḥ //

sarvadā samare yasya goptā nityaṃ janārdanaḥ /
kathaṃ tasya jayo na syāditi bhūtāni menire //

etadarthaṃ śirastasya vyāpayāmāsa pāṇḍavaḥ /
syamantapañcakādbāhyaṃ śaraireva yathākramam //

kṛtvā tacca mahatkarma nihatya ca jayadratham /
astraṃ pāśupataṃ pārthaḥ saṃhartumupacakrame //

saṃharatyapi kaunteye tadastraṃ tatra bhārata /
vavau śītaḥ sugandhaśca pavano hlādayanniva //

saṃhāraṃ ca pramokṣaṃ ca dṛṣṭvā tatra divaukasaḥ /
vismayaṃ paramaṃ jagmuḥ praśaśaṃsuśca pāṇḍavam //

evamastreṇa tānvīro yodhayitvā dhanañjayaḥ /
jayadrathaśiraḥ paścādvyāpayāmāsa pāṇḍavaḥ //

tacchiraścyāvamānaṃ tu dadṛśustāvakā yudhi /
śalyakarṇakṛpā rājanmohitāḥ savyasācinā //

śirasi cyāvite tasya śarairāśīviṣopamaiḥ /
paścātkāyo'patadbhūmiṃ śocayansarvapārthivān //

dṛṣṭvā tu nihataṃ saṅkhye sindhurājaṃ mahāratham /
putrāṇāṃ tava netrebhyo duḥkhādāsraṃ pravartata //

tato vinihate rājansindhurāje kirīṭinā /
tamastadvāsudevena saṃhṛtaṃ bharatarṣabha //

paścājjñātaṃ mahīpāla tava putraiḥ sahānugaiḥ /
vāsudevaprayukteyaṃ māyeti nṛpasattama //

evaṃ sa nihato rājanpārthenāmitatejasā /
akṣauhiṇīraṣṭa hatvā jāmātā tava saindhavaḥ //

hataṃ jayadrathaṃ dṛṣṭvā tava putrā narādhipa /
duḥkhādaśrūṇi mumucurnirāśāścābhavañjaye //

tato jayadrathe rājanhate pārthena keśavaḥ /
dadhmau śaṅkhaṃ mahābāhurarjunaśca parantapaḥ //

bhīmaśca vṛṣṇisiṃhaśca yudhāmanyuśca bhārata /
uttamaujāśca vikrāntaḥ śaṅkhāndadhmuḥ pṛthakpṛthak //

śrutvā mahāntaṃ taṃ śabdaṃ dharmarājo yudhiṣṭhiraḥ /
saindhanaṃ nihataṃ mene phalgunena mahātmanā //

tato vāditraghoṣeṇa svānyodhānparyaharṣayat /
abhyavartata saṅgrāme bhāradvājaṃ yuyutsayā //

tataḥ pravavṛte rājannastaṃ gacchati bhāskare /
droṇasya somakaiḥ sārdhaṃ saṅgrāmo romaharṣaṇaḥ //

te tu sarve prayatnena bhāradvājaṃ jighāṃsavaḥ /
saindhave nihate rājannayudhyanta mahārathāḥ //

pāṇḍavāstu jayaṃ labdhvā saindhavaṃ vinihatya ca /
ayodhayaṃstu te droṇaṃ jayo'nmattāstatastataḥ //

arjuno'pi tato yodhāṃstāvakānrathasattamān /
ayodhayanmahābāhurhatvā saindhavakaṃ nṛpam //