Mahabharata · Chapter 7.145

tadavasthe he tasminbhūriśravasi kaurave /
yathā bhūyo'bhavadyuddhaṃ tanmamācakṣva sañjaya //
sañjaya uvāca /

bhūriśravasi saṅkrānte paralokāya bhārata /
vāsudevaṃ mahābāhurarjunaḥ samacūcudat //
arjuna uvāca /

codayāśvānbhṛśaṃ kṛṣṇa yato rājā jayadrathaḥ / [śrūyate puṇḍarīkākṣa triṣu dharmeṣu vartate.]
pratijñāṃ saphalāṃ cāpi kartumarhasi me'nagha //

astameti mahābāho tvaramāṇo divākaraḥ //

etaddhi puruṣavyāghra mahadabyudyataṃ mayā /
kāryaṃ saṃrakṣyate caiṣa kurusenāmahārathaiḥ //

yathā nābhyeti sūryo'staṃ yathā satyaṃ bhavedvacaḥ /
codayāśvāṃstathā kṛṣṇa yathā hanyāṃ jayadratham //

tataḥ kṛṣṇo mahābāhuraśvānrajatasannibhān /
hayajñaścodayāmāsa jayadrathavadhaṃ prati //

taṃ prayāntamamogheṣumutpatadbhirivāśugaiḥ /
tvaramāṇā mahārāja senāmukhyāḥ samādravan //

duryodhanaśca karṇaśca vṛṣaseno'tha madrarāṭ /
aśvatthāmā kṛpaścaiva svayameva ca saindhavaḥ //

samāsādya ca bībhatsuḥ saindhavaṃ samupasthitam /
netrābhyāṃ krodhadīptābhyāṃ sampraikṣannirdahanniva //

yathāgnirindhaneddhau vai krodhendhanasamīritaḥ /
saindhavasya mukhaṃ tyaktvā karṇaḥ sātvatamabhyayāt //

upāyāntaṃ* tu rādheyaṃ dṛṣṭvā pārtho mahārathaḥ /
prahasandevakīputramidaṃ vacanamabravīt //

eṣa prayātyādhirathiḥ sātyakeḥ syandanaṃ prati /
na mṛṣyati hataṃ nūnaṃ bhūriśravasamāhave //

yatra yātyeṣa tatra tvaṃ codayāśvāñjanārdana /
na saumadattipadavīṃ gamayetsātyakiṃ vṛṣaḥ //
sañjaya uvāca /

evamukto mahābāhuḥ keśavaḥ savyasācinā /
pratyuvāca mahātejāḥ kālayuktamidaṃ vacaḥ //

alameṣa mahābāhuḥ karṇāyaiko'pi pāṇḍava /
kiṃ punardraupadeyābhyāṃ sahitaḥ sātvatarṣabhaḥ //

na ca tāvatkṣamaḥ pārtha tava karṇena saṅgaraḥ / prajvalantī maholkeva tiṣṭhatyasminhi vāsavī /
tvadarthaṃ pūjyamānaiṣā rakṣyate paravīrahan //

na karṇaṃ prākṛtaṃ manye tena yoddhuṃ na sāmpratam /
yaḥ karṇo balavāneṣa śakto'smāñjetumojasā //

karṇasyaiṣa mahāndoṣo yaddūyena padepade /
pramādācca ghṛṇitvācca tena śociti me manaḥ //

ataḥ karṇaḥ prayātvatra sātvatasya yathā tathā /
ahaṃ jñāsyāmi kaunteya kālamasya durātmanaḥ //

yatrainaṃ viśikhaistīkṣṇaiḥ pātayiṣyasi bhūtale /
tadā gantāsi pārtha tvaṃ tena yoddhuṃ durātmanā //
dhṛtarāṣṭra uvāca /

yo'sau karṇena vīrasya vārṣṇeyasya samāgamaḥ /
hate tu bhūriśravasi tadyuddhamabhavatkatham //

sātyakiścāpi virathaḥ kaṃ samārūḍhavānratham /
cakrarakṣau ca pāñcālyau tanmamācakṣva sañjaya //
sañjaya uvāca /

hanta te kathayiṣyāmi yathāvṛttaṃ mahāraṇe / paśyatāṃ sarvasainyānāṃ keśavāryunayorapi /
śuśrūṣasva sthiro bhūtvā durācaritamātmanaḥ //

xxmeva hi kṛṣṇasya manogatamidaṃ prabho /
vijetavyo yathā vīraḥ sātyakiḥ saumadattinā //

atītānāgate rājansa hi vetti janārdanaḥ / tataḥ sūtaṃ samāhūya dārukaṃ sandideśa ha /

ratho me yujyatāṃ kalyamiti rājanmahābālaḥ // na hi devā na gandharvā na yakṣoragarākṣasāḥ /
mānavā vā'pi jetāraḥ kṛṣṇayoḥ santi kecana /

pitāmahapurogāśca devāḥ siddhāśca taṃ viduḥ /
tayoḥ prabhāvamatulaṃ śṛṇu yuddhaṃ tu tattathā //

sātyakiṃ virathaṃ dṛṣṭvā karṇaṃ cābhyudyataṃ raṇe /
dadhmau śaṅkhaṃ mahānādamārṣabheṇātha mādhavaḥ //

dāruko'vetya sandeśaṃ śrutvā śaṅkhasya ca svanam /
rathamanvānayattasmai suparṇocchritaketanam //

sa keśavasyānumate rathaṃ dārukasaṃyutam /
āruroha śineḥ pautro jvalanādityasannibham //

kāmagaiḥ śaivyasugrīvameghapuṣpavalāhakaiḥ /
hayodagrairmahāvegairhemabhāṇḍavibhūṣitaiḥ //

yuktaṃ samāruhya ca taṃ vimānapratimaṃ ratham /
abhyadravata rādheyaṃ pravapansāyakānbahūn //

cakrarakṣāvapi tadā yudhāmanyūttamaujasau /
dhanañjayarathaṃ hitvā rādheyaṃ pratyudīyatuḥ //

rādheyo'pi mahārāja śaravarṣaṃ samutsṛjan /
abhyadravatsusaṅkruddho raṇe śaineyamacyutam //

naiva daivaṃ na gāndharvaṃ nāsuraṃ na ca rākṣasam / tādṛśaṃ bhuvi no yuddhaṃ divi vā śrutamityuta /
upārasata tatsainyaṃ sarathāśvanaradvipam //

tayordṛṣṭvā mahārāja karma sammūḍhacetasaḥ /
sarve ca samapaśyanta tadyuddhamatimānuṣam //

tayornṛvarayo rājansārathyaṃ dārukasya ca //

gatapratyāgatāvṛttairmaṇḍalaiḥ sannivartanaiḥ /
sārathestu rathasthasya kāśyapeyasya vismitāḥ //

nabhastalagatāścaiva devagāndharvadānavāḥ /
atīvāvahitā draṣṭuṃ karṇaśaineyayo raṇam //

mitrārthe tau parākrāntau śuṣmiṇau spardhinau rame //

karṇaścāmarasaṅkāśo yuyudhānaśca sātyakiḥ /
anyonyaṃ tau mahārāja śaravarṣairavarṣatām //

pramamātha śineḥ pautraṃ karṇaḥ sāyakavṛṣṭibhiḥ /
amṛṣyamāṇo nidhanaṃ kauravyajalasandhayoḥ //

karṇaḥ śokasamāviṣṭo mahoraga iva śvasan / sa śaineyaṃ raṇe kruddhaḥ pradahanniva cakṣuṣā /
abhyadhāvata vegena punaḥpunararindama //

taṃ tu sakrodhamālokya sātyakiḥ pratyayudhyata /
mahatā śaravarṣeṇa gajaṃ pratigajo yathā //

tau sametau naravyāghrau vyāghrāviva tarasvinau /
anyonyaṃ santatakṣāte raṇe'nupamavikramau //

tataḥ karṇaṃ śineḥ pautraḥ sarvapārasavaiḥ śaraiḥ /
bibheda sarvagātreṣu punaḥpunararindama //

sārathiṃ cāsya bhallena rathanīḍādapātayat /
aśvāṃśca caturaḥ śvetānnijaghāna śitaiḥ śaraiḥ //

chittvā dhvajaṃ rathaṃ caiva śatadhā punarṣarṣabha /
cakāra virathaṃ karṇaṃ tava putrasya paśyataḥ //

tato vimanaso rājaṃstāvakāste mahārathāḥ / vṛṣasenaḥ karṇasutaḥ śalyo madrādhipastathā /

droṇaputraśca śaineyaṃ sarvataḥ paryavārayan //
tataḥ paryākulaṃ sarvaṃ na prājñāyata kiñcana //

tathā sātyakinā vīre virathe sūtaje kṛte /
hāhākārastato rājansarvasainyeṣvabhūnmahān //

karṇo'pi viratho rājansātvatena kṛtaḥ śaraiḥ /
duryodhanarathaṃ tūrṇamāruroha viniḥśvasan //

mānayaṃstava putrasya bālyātprabhṛti sauhṛdam /
kṛtāṃ rājyapradānena pratijñāṃ paripālayan //

tathā tu virathaṃ karṇaṃ putrāṃśca paripālayan //
duḥśāsanamukhānvīrānnāvadhītsātyakirvaśī //

rakṣanpratijñāṃ bhīmena pārthena ca purākṛtām /
virathānvihvalāṃścakre na tu prāṇairvyayojayat //

bhīmasenena tu vadaḥ putrāṇāṃ te pratiśrutaḥ /
anudyūte ca pārthena vadhaḥ karṇasya saṃśrutaḥ //

vadhe tvakurvanyatnaṃ te tasya karṇamukhāstadā /
nāśaknuvaṃstato hantuṃ sātyakiṃ pravarā rathāḥ //

drauṇiśca kṛtavarmā ca tathaivānye mahārathāḥ / nirjitā dhanuṣaikena śataśaḥ kṣatriyarṣabhāḥ /
kāṅkṣatā paralokaṃ ca dharmarājasya ca priyam //

kṛṣṇayoḥ sadṛśo vīrye sātyakiḥ śatrutāpanaḥ /
jitavānsarvasainyāni tāvakāni hasanniva //

kṛṣṇo vā'pi bhavelloke pārtho bā'pi dhanurdharaḥ /
śaineyo vā naravyāghra caturthastu na vidyate //
dhṛtarāṣṭra uvāca /

ajayyaṃ vāsudevasya rathamāsthāya sātyakiḥ / virathaṃ kṛtavānkarṇaṃ vāsudevasamo yudhi /
dārukeṇa samāyuktaḥ svabāhubaladarpitaḥ //

kaccidanyaṃ samārūḍhaḥ sātyakiḥ śatrutāpanaḥ / etadicchāmyahaṃ śrotuṃ kuśalo hyasi bhāṣitum /
asahyaṃ tamahaṃ manye tanmamācakṣva sañjaya //
sañjaya uvāca /

śṛṇu rājanyathāvṛttaṃ rathamanyaṃ mahāmatiḥ /
dārukasyānujastūrṇaṃ kalpanāvidikalpitam //

āyasaiḥ kāñcanaiścāpi paṭṭaiḥ sannaddhakūbaram /
tārāsahasrakhacitaṃ siṃhadhvajapatākinam //

aśvairvātajavairyuktaṃ hemabhāṇḍaparicchadaiḥ /
saindhavairindusaṅkāśaiḥ sarvaśabdātigairdṛḍhaiḥ //

citrakāñcanasannāhairvājimukhyairviśāmpate /
ghaṇṭājālākularavaṃ śaktitomaravidyutam //

yuktaṃ sāṅgrāmikairdravyairbahuśastraparicchadaiḥ /
rathaṃ sampādayāmāsa meghagambhīraniḥsvanam //

taṃ samāruhya śaineyastava sainyamupādravat /
dāruko'pi yathākāmaṃ prayayau keśavāntikam //

karṇasyāpi rathaṃ rājañśaṅkhagokṣīrapāṇḍuraiḥ /
citrakāñcanasannāhaiḥ sadaśvairvegavattaraiḥ //

hemakakṣyādhvajopetaṃ klṛptayantrapatākinam / agryaṃ rathaṃ suyantāraṃ bahuśastraparicchadam /
upājahrustamāsthāya karṇo'pyabhyadravadripūn //

etatte sarvamākhyātaṃ yanmāṃ tvaṃ paripṛcchasi /
bhūyaścāpi nibodhemaṃ tavāpannayajaṃ kṣayam //

ekatriṃśattava sutā bhīmasenena pātitāḥ /
durmukhaṃ pramukhe kṛtvā satataṃ citrayodhinam //

śataśo nihatāḥ śūrāḥ sātvatenārjunena ca / bhīṣmaṃ pramukhataḥ kṛtvā bhagadattaṃ ca bhārata /
evameṣa kṣayo vṛtto rājandurmantrite tava //