Mahabharata · Chapter 7.146

tathā gateṣu śūreṣu teṣāṃ mama ca sañjaya /
kiṃsvidbhīmārjunau caiva sātyakiścākarottadā //
sañjaya uvāca /

viratho bhīmaseno vai karṇavākśalyapīḍitaḥ /
amarṣavaśamāpannaḥ phalgunaṃ vākyamabravīt //

punaḥpunastūbaraka mūḍha audariketi ca /
akṛtāstraka mā yotsīrbāla saṅgrāmakātara //

iti māmabravītkarṇaḥ paśyataste dhanañjaya /
evaṃ vaktā ca me vadhyastena coktastathā hyaham //

etadvrataṃ mahābāho tvayā saha kṛtaṃ mayā /
tathaitanmama kaunteya yathā tava na saṃśayaḥ //

tadvadhāya naraśreṣṭha smaraitadvacanaṃ mama /
yathā bhavati tatsatyaṃ tathā kuru dhanañjaya //

tacchrutvā vacanaṃ tasya bhīmasyāmitavikramaḥ /
tato'rjuno'bravītkarṇaṃ kiñcidabhyetya saṃyuge //

karṇakarṇa vṛthādṛṣṭe sūtaputrātmasaṃstuta /
adharmabuddhe śṛṇu me yattvāṃ vakṣyāmi sāmpratam //

dvāvevaṃ karṇa śūrāṇāṃ raṇe dṛṣṭau jayājayau /
tau cāpyanityau rādheya vāsavasyāpi yudhyataḥ //

raṇamutsṛjya nirlajja gacchase ca punaḥ punaḥ / māhātmyaṃ paśya bhīmasya karma janma kule tathā /
noktavānparuṣaṃ yattvāṃ palāyanaparāyaṇam //

bhūyastvamapi saṅgamyaṃ sakṛdeva yadṛcchayā /
virathaṃ kṛtavānvīraṃ pāṇḍavaṃ sūtadāyada //

kulasya sadṛśaṃ cāpi rādheya kṛtavānasi /
naikāntasiddhiḥ saṅgrāme vāsavasyāpi vidyate //

mumūrṣuryuyudhānena viratho vikalendriyaḥ /
madvadhyastvamiti jñātvā jitvā jīvanvisarjitaḥ //

yadṛcchayā raṇe bhīmaṃ yudhyamānaṃ mahābalam / kathañcidvirathaṃ kṛtvā yattvaṃ rūkṣamabhāṣathāḥ /
adharmastveṣa sumahānanāryacaritaṃ ca tat //

nāriṃ jitvā'tikatthante na ca jalpanti durvacaḥ /
na ca kañcana nindanti santaḥ śūrā nararṣabhāḥ //

tvaṃ tu prākṛtavijñānastattadvadasi sūtaja /
bahvabaddhamakarṇyaṃ ca cāpalādaparīkṣitam //

yudhyamānaṃ parākrāntaṃ śūramāryavrate ratam / yadavoco'priyaṃ bhīmaṃ naitatsatyaṃ vacastava /
paśyatāṃ sarvasainyānāṃ keśavasya mamaiva ca //

viratho bhīmasenena kṛto'si bahuśo raṇe /
na ca tvāṃ paruṣaṃ kiñciduktavānpāṇḍunandanaḥ //

yasmāttu bahu rūkṣaṃ ca śrāvitaste vṛkodaraḥ / parokṣaṃ yacca saubhadro yuṣmābhirbahubhirhataḥ /
tasmādasyāvalepasya sadyaḥ phalamavāpnuhi //

tvayā tasya dhanuśchinnamātmanāśāya durmate /
tasmādvadhyo'si me mūḍha sabhṛtyasutabāndhavaḥ //

kuru tvaṃ sarvakṛtyāni mahatte bhayamāgatam /
hantā'smi vṛṣasenaṃ te prekṣamāṇasya saṃyuge //

ye cānye'pyupayāsyanti buddhimohena māṃ nṛpāḥ /
tāṃśca sarvānhaniṣyāmi satyenāyudhamālabhe //

tvāṃ ca mūḍhākṛtaprajñamatimāninamāhave /
dṛṣṭvā duryodhano mando bhṛśaṃ tapsyati pātitam //
sañjaya uvāca /

arjunena pratijñāte vadhe karṇasutasya tu /
mahānsutumulaḥ śabdo babhūva rathināṃ tadā //

tasminnākulasaṅgrāme vartamāne mahābhaye /
mandaraśmiḥ sahasrāṃśurastaṅgirimupādravat //

tato duryodhano rājā rādheyaṃ tvarito'bravīt /
arjunaṃ prekṣya saṃyātaṃ jayadrathavadhaṃ prati //

amānuṣāṇi karmāṇi kurvantau bharatarṣabha /
sātyakiṃ bhīmasenaṃ ca yattau tau darśayanniva //

ayaṃ sa vaikartana yuddhakālo vidarśayasvātmabalaṃ mahātman /
yathā na vadhyeta raṇe'rjunena jayadrathaḥ karṇa tathā kuruṣva //

alpāvaśeṣo divaso hi sāmprataṃ nivārayehādya ripuṃ śaraughaiḥ /
dinakṣayaṃ prāpya narapravīra dhruvo hi naḥ karṇa jayo bhaviṣyati //

saindhave rakṣyamāṇe tu sūryasyāstamanaṃ prati /
mithyāpratijñaḥ kaunteyaḥ pravekṣyati hutāśanam //

anarjunāyāṃ ca bhuvi muhūrtamapi mānada /
jīvituṃ notsaheranvai bhrātaro'sya sahānugāḥ //

pāṇḍaveṣu vinaṣṭeṣu saśailavanakānanām /
vasundharāmimāṃ karṇa bhokṣyāmo mahatakaṇṭakām //

daivenopahataḥ pārtho viparītaśca mānada /
kāryākāryamajānānaḥ pratijñāṃ kṛtavānraṇe //

nūnamātmavināśāya pāṇḍavena kirīṭinā /
mithyāpratijñaiva kṛtā jayadrathavadhaṃ prati //

kathaṃ jīvati durdharṣe tvapi rādheya phalgunaḥ /
anastaṅgata āditye hanyātsaindhavakaṃ nṛpam //

rakṣitaṃ madrarājena kṛpeṇa ca mahātmanā /
jayadrathaṃ raṇamukhe kathaṃ hanyāddhanañjayaḥ //

drauṇinā rakṣyamāṇaṃ ca mayā duḥśāsanena ca /
kathaṃ prāpsyati bībhatsuḥ saindhavaṃ kālacoditaḥ //

yudhyante bahavaḥ śūrā lambate ca divākaraḥ /
śaṅke jayadrathaṃ pārtho naiva prāpsyati mānada //

sa tvaṃ karṇa mayā sārdhaṃ śūraiścānyairmahārathaiḥ / drauṇinā tvaṃ hi sahito madreśena kṛpeṇa ca /
yudhyasva yatnamāsthāya paraṃ pārthena saṃyuge //

evamuktastu rādheyastava putreṇa māriṣa /
duryodhanamidaṃ vākyaṃ pratyuvāca kurūttamam //

dṛḍhalakṣyeṇa vīreṇa bhīmasenena dhanvinā /
bhṛśaṃ bhinnatanuḥ saṅkhye śarajālairanekaśaḥ //

sthātavyamiti tiṣṭhāmi raṇe samprati mānada / nāṅgamiṅgati kiñcinme santaptasya maheṣubhiḥ /
yotsyāmi tu yathāśaktyā tvadarthaṃ jīvitaṃ mama //

tattathā prayatiṣye'haṃ paraṃ śaktyāxxxxsuyodhana /
yathā pāṇḍavamukhyo'sau na haniṣyāti saindhavam //

na hi me yudhyamānasya sāyakānasyataḥ śitān /
saindhavaṃ prāpsyate vīraḥ savyasācī dhanañjayaḥ //

yattu bhaktimatā kāryaṃ satataṃ hitakāṅkṣiṇā /
tatkariṣyāmi kauravya jayo daive pratiṣṭhitaḥ //

saindhavārthe paraṃ yatnaṃ kariṣyāmyadya saṃyuge /
tvatpriyārthaṃ mahārāja jayo daive pratiṣṭhitaḥ //

adya yotsye'rjumahaṃ pauruṣaṃ svaṃ vyapāśritaḥ /
tvadarthe puruṣavyāghra jayo daive pratiṣṭhitaḥ //

adya yuddhaṃ kuruśreṣṭha mama pārthasya cobhayoḥ /
paśyantu sarvasainyāni dāruṇaṃ romaharṣaṇam //
sañjaya uvāca /

karṇakauravayorevaṃ raṇe sambhāṣamāṇayoḥ /
arjuno niśitairbāṇairjaghāna tava vāhinīm //

ciccheda niśitairbāṇaiḥ śūrāṇāmanivartinām //

bhujānparighasaṅkāśānhastihastopamānraṇe /
śirāṃsi ca mahābāhuściccheda niśitaiḥ śaraiḥ //

hastihastāndvipaskandhānrathākṣāṃśca samantataḥ /
śoṇitāktānhayārohāngṛhītaprāsatomarān //

kṣuraiściccheda bībhatsurdvidhaikaikaṃ tridhaiva ca / hayānvāraṇamukhyāṃśca padātīṃśca samantataḥ /
dhvajāṃśchatrāṇi cāpāni cāmarāṇi śirāṃsi ca //

kakṣamagnirivoddhūtaḥ prādahattava vāhinīm /
acireṇa mahīṃ pārthaścakāra rudhirottarām //

hatabhūyiṣṭhayodhaṃ tatkṛtvā tava balaṃ balī /
āsasāda durādharṣaḥ saindhavaṃ satyavikramaḥ //

bībhatsurbhīmasenena sātvatena ca rakṣitaḥ /
prababhau bharataśreṣṭha jvalanniva hutāśanaḥ //

taṃ tathā'vasthitaṃ dṛṣṭvā tvadīyā vīrasammatāḥ /
nāmṛṣyanta maheṣvāsāḥ pāṇḍavaṃ puruṣarṣabhāḥ //

duryodhanaśca karṇaśca vṛṣaseno'tha madrarāṭ /
aśvatthāmā kṛpaścaiva svayameva ca saindhavaḥ //

sannaddhāḥ saindhavasyārthe samāvṛṇvankirīṭinam /
nṛtyantaṃ rathamārgeṣu dhanurjyātalaniḥsvanaiḥ //

saṅgrāmakovidaṃ pārthaṃ sarve yuddhaviśāradāḥ /
abhītāḥ paryavartanta vyāditāsyamivāntakam //

saindhavaṃ pṛṣṭhataḥ kṛtvā jighāṃsanto'cyutārjunau /
sūryāstamanamicchanto lohitāyati bhāskare //

te bhujairbhogibhogābhairdhanūṃṣyānamya sāyakān /
mumucuḥsūryaraśmyābhāñchataśaḥ phalgunaṃ prati //

tatastānasyamānāṃśca kirīṭī yuddhadurmadaḥ /
dvidhā tridhā'ṣṭadhaikaikaṃ chittvā vivyādha tānrathān //

siṃhalāṅgūlaketustu darśayanvīryamātmanaḥ /
śāradvatīsuto rājannarjunaṃ pratyavārayan //

sa vid्vā daśabhiḥ pārthaṃ vāsudevaṃ ca saptabhiḥ /
atiṣṭhadrathamārgeṣu saindhavaṃ pratipālayan //

athainaṃ kauravaśreṣṭhāḥ sarva eva mahārathāḥ /
mahatā rathavaṃśena sarvataḥ pratyavārayan //

viṣphārayantaścāpāni visṛjantaśca sāyakān /
saindhavaṃ paryarakṣanta śāsanāttanayasya te //

tataḥ pārthasya śūrasya bāhvorbalamadṛśyata /
iṣūṇāmakṣayatvaṃ ca dhanuṣo gāṇḍivasya ca //

astrairastrāṇi saṃvārya drauṇeḥ śāradvatasya ca /
ekaikaṃ daśabhirbāṇaiḥ sarvāneva samārpayat //

taṃ drauṇiḥ pañcaviṃśatyā vṛṣasenaśca saptabhiḥ /
duryodhanaśca viṃśatyā karṇaśalyau tribhistribhiḥ //

ta enamabhigarjanto vidhyantaśca punaḥpunaḥ /
vidhunvantaśca cāpāni sarvataḥ pratyavārayan //

śliṣṭaṃ ca sarvataścakrū rathamaṇḍalamāśu te /
sūryāstamanamicchantastvaramāṇā mahārathāḥ //

ta enamabhinardantau vidhunvānā dhanūṃṣi ca /
siṣicurmārgaṇaistīkṣṇairgiriṃ meghā ivāmbubhiḥ //

te mahāstrāṇi divyāni tatra rājanvyadarśayan /
dhanañjayasya gātre tu śūrāḥ parighabāhavaḥ //

nivārya tāñśaravrātairdivyānyastrāṇi darśayan / hatabhūyiṣṭhayodhaṃ tatkṛtvā tava balaṃ balī /
āsasāda durādharṣaḥ saindhavaṃ satyavikramaḥ //

taṃ karṇaḥ saṃyuge rājanpratyavārayadāśugaiḥ /
miṣato bhīmasenasya sātvatasya ca bhārata //

taṃ pārtho daśabhirbāṇaiḥ pratyavidhyadrāṇājire /
sūtapūtraṃ mahābāhuḥ sarvasainyasya paśyataḥ //

sātvataśca tribhirbāṇaiḥ karṇaṃ vivyādha māriṣa /
bhīmasenastribhiścaiva punaḥ pārthaśca saptabhiḥ //

tānkarṇaḥ prativivyādha ṣaṣṭyāṣaṣṭyā mahārathaḥ /
tadyuddhamabhavadrājankarṇasya bahubhiḥ saha //

tatrādbhūtamapaśyāma sūtaputrasya māriṣa /
yadekaḥ samare kruddhastrīnrathānparthavārayat //

phalgunastu mahābāhuḥ karṇaṃ vaikartanaṃ raṇe /
sāyakānāṃ śatenaiva sarvamarmasvatāḍayat //

rudhirokṣitasarvāṅgaḥ sūtaputraḥ pratāpavān /
śaraiḥ pañcāśatā vīraḥ phalgunaṃ pratyavidhyata //

tasya tallāghavaṃ dṛṣṭvā nāmṛṣyata raṇe'rjunaḥ / tasya pārtho dhanuśchittvā vivyādhainaṃ stanāntare /
sāyakairnavabhirvīrastvaramāṇo dhanañjayaḥ //

athānyaddhanurādāya sūtaputraḥ pratāpavān /
sāyakairaṣṭasāhasraiśchādayāmāsa pāṇḍavam //

tāṃ bāṇavṛṣṭimatulāṃ karṇacāpasamutthitām /
vyadhamatsāyakaiḥ pārthaḥ śalabhāniva mārutaḥ //

chādayāmāsa ca tadā sāyakairarjuno raṇe /
paśyatāṃ sarpayodhānāṃ darśayanpāṇilāghavam //

vadhārthaṃ cāsya samare sāyakaṃ sūryavarcasam /
cikṣepa tvarayā yuktastvarākāle dhanañjayaḥ //

tamāpatantaṃ vegena drauṇiściccheda sāyakam /
ardhacandreṇa tīkṣṇena sa cchinnaḥ prāpatadbhūvi //

karṇo'pi dviṣatāṃ hantā chādayāmāsa phalgunam /
sāyakairbahusāhasraiḥ kṛtapratikṛtepsayā //

tau vṛṣāviva nardantau narasiṃhau mahārathau /
sāyakaistu praticchannaṃ cakratuḥ khamajihmagaiḥ //

adṛśyau ca śarauthaistau nighntāvitaretaram /
karṇa pārtho'sti tiṣṭhatvaṃ karṇo'haṃ tiṣṭha phalgunna //

ityevaṃ tarjayantau tau vākśalyaistu parasparam /
vidhyetāṃ samare vīrau citraṃ laghu ca suṣṭhu ca //

prekṣaṇīyau cābhavatāṃ sarvayodhasamāgame /
praśasyāmānau samare siddhacāraṇapannagaiḥ //

ayudhyetāṃ mahārāja parasparavadhaiṣiṇau /
tato duryodhano rājaṃstāvakānabhyabhāṣata //

yatnādrakṣata rādheyaṃ nāhatvā samare'rjunam /
nivartiṣyati rādheyo na vā'jitvā'dya phalgunaṃ //

etasminntare rājandṛṣṭvā karṇasya vikramam / ākarṇamuktairiṣubhiḥ karṇasya caturo hayān /
anayatpretalokāya caturbhiḥ śvetavāhanaḥ //

sārathiṃ cāsya bhallena rathanīḍādapātayat /
chādayāmāsa sa śaraistava putrasya paśyataḥ //

sañchādyamānaḥ samare hatāśvo hatasārathiḥ /
mohitaḥ śarajālena kartavyaṃ nābhyapadyata //

taṃ tathā virathaṃ dṛṣṭvā rathamāropya taṃ tadā /
aśvatthāmā mahārāja bhūyo'rjunamayodhayat //

madrarājaśca kaunteyamavidhyattriṃśatā śaraiḥ /
āvavre'rjunamārgaṃ ca śarajālena bhārata //

śāradvatastu viṃśatyaṃ vāsudevaṃ samārpayat /
dhanañjayaṃ dvādaśabhirājaghāna śilīmukhaiḥ //
caturbhiḥ sindhurājaśca vṛṣasenaśca saptabhiḥ / pṛthakpṛthaṅ्mahārāja vivyadhuḥ kṛṣṇapāṇḍavau //

tathaiva tānpratyavidhyatkuntīputro dhanañjayaḥ /
droṇaputraṃ catuḥṣaṣṭyā madrarājaṃ śatena ca //
saindhavaṃ daśabhirbāṇairvṛṣasenaṃ tribhiḥ śaraiḥ / śāradvataṃ ca viṃśatyā vidvvā pārtho nanāda ha //

te pratijñāpratīghātamicchantaḥ savyasācinaḥ /
sahitāstāvakāstūrṇamabhipeturdhanañjayam //

athārjunaḥ sarvato vāruṇāstraṃ prāduścakre trāsayandhārtarāṣṭrān /
taṃ pratyudīyaḥ kuruvaḥ pāṇḍuputraṃ rathairmahārhaiḥ śaravarṣaṃ sṛjantaḥ //

tatastu tasmiṃstumale samutthite sudāruṇe bhāratamohanīye /
no muhyata prāpya sa rājaputraḥ kirīṭamālī vyasṛjaccharaughān //

vadhaprepsuḥ savyasācī kurūṇāṃ smarankleśāndvādaśavarṣavṛttān /
gāṇḍīvamuktairiṣubhirmahātmā sarvā diśo vyāvṛṇodaprameyaḥ //

pradīptolkamabhavaccāntarikṣaṃ mṛteṣu deheṣvapatanvayāṃsi /
yatpiṅgalajyena kirīṭamālī kruddho ripūnājagavena hanti //

tataḥ kirīṭi mahatā mahāyaśāḥ śarāsanenāsya śarānanīkajit /
hayapravekottamanāgaghūrṇitā-- nkurupravīrāniṣubhirvyāpātayat //

gadāśca gurvīḥ parighānayasmayā-- nasīṃśca śaktīśca raṇe narādhipāḥ /
mahānti śastrāṇi ca bhīmadarśanāḥ pragṛhya pārthaṃ sahasā'bhidudruvuḥ //

tato yugāntābhrasamasvanaṃ maha-- nmahendracāpapratimaṃ ca gāṇḍivam /
cakarṣa dorbhyoṃ vihasanbhṛśaṃ yayau dahaṃstvahīyānyamarāṣṭravardhanaḥ //

sa tānudīrṇānsarathānsavāraṇā-- npadātisaṅghāṃśca mahādhanurdharaḥ /
vipannasarvāyudhajīvitānraṇe cakāra vīro yamarāṣṭravardhanān //