Mahabharata · Chapter 7.143

sa bāhurnyapatadbhūmau sakhaṅgaḥ saśubhāṅgadaḥ / ādadhajjīvalokasya duḥkhamadbhutamuttamaḥ /
yantramukto mahendrasya dhvajo vṛttotsavo yathā //

prahariṣyanhṛto bāhuradṛśyate kirīṭinā /
vegena nyapatadbhūmau pañcāsya iva pannagaḥ //

sa moghaṃ kṛtamātmānaṃ dṛṣṭvā pārthena kauravaḥ /
utsṛjya sātyakiṃ krodhādgrarhayāmāsa pāṇḍavam //

sa vibāhurmahārāja ekapakṣa ivāṇḍajaḥ / ekacakro ratho yadvaddharaṇīmāsthito nṛpaḥ /
uvāca pāṇḍavaṃ caiva sarvakṣatrasya paśyataḥ //
bhūriśravā uvāca /

nṛśaṃsaṃ bata kaunteya karmedaṃ kṛtavānasi /
apaśyato viṣaktasya yanme tvaṃ bāhumacchinaḥ //

yeṣu yeṣu naraḥ pārtha vartate susamāhitaḥ /
āśu tacchīlatāmeti tadidaṃ dṛśyate tvayi //

kiṃ nu vakṣyasi rājānaṃ dharmaputraṃ yudhiṣṭhiram kiṃ kurvāṇo mayā saṅkhye hato bhūriśravā iti //

idamindreṇa te sākṣādupadiṣṭaṃ mahātmanā /
astraṃ rudreṇa vā pārtha droṇenātha kṛpeṇa vā //

nanu nāmāstradharmajñastvaṃ loke'bhyadhikaḥ paraiḥ /
so'yudhyamānasya kathaṃ raṇe prahṛtavānasi //

na pramattāya bhītāya virathāya prayācate /
vyasane vartamānāya praharanti manīṣiṇaḥ //

idaṃ tu nīcācaritamasatpuruṣasevitam /
kathamācaritaṃ pārtha pāpakarma suduṣkaram //

āryeṇa sukaraṃ tvāhurāryakarma dhanañjaya /
anāryakarma tvāryeṇa suduṣkaratamaṃ bhuvi //

kathaṃ hi rājavaṃśyastvaṃ kauraveyo viśeṣataḥ /
kṣatradharmādapakrāntaḥ suvṛttaścāritavrataḥ //

alpastavāparādho'tra na tvāṃ tāta vigarhaye /
vārṣṇeyāpaśadaṃ prāpya kṣudraṃ kṛtamidaṃ tvayā //

idaṃ tu yadatikṣudraṃ vārṣṇeyārthe kṛtaṃ tvayā /
vāsudevamataṃ nūnaṃ naitattvayyupapadyate //

ko hi nāma pramattāya pareṇa saha yudhyate /
īdṛśaṃ vyasanaṃ dadyādyo na kṛṣṇasakho bhavet //

vrātyāḥ saṅkliṣṭakarmāṇaḥ prakṛtyaiva ca garhitāḥ /
vṛṣṇyandhakāḥ kathaṃ pārtha pramāṇaṃ bhavatā kṛtāḥ //
sañjaya uvāca /

evamukto raṇe pārtho bhūriśravasamabravīt / vyaktaṃ hi jīryamāṇo'pi buddhiṃ jarayate naraḥ /
anarthakamidaṃ sarvaṃ yattvayā vyāhṛtaṃ prabho //

jānanneva hṛṣīkeśaṃ garhase māṃ ca pāṇḍavam /
saṅgāmāṇāṃ hi dharmajñaḥ sarvaśāstrārthapāragaḥ //

na cādharmamahaṃ kuryāṃ jānaṃścaiva hi muhyase //

yudhyante kṣatriyāḥ śatrūnsvaiḥsvaiḥ parivṛtā narāḥ / bhrātṛbhiḥ pitṛbhiḥ putraistathā sambandhibāndhavaiḥ /
vayasyairatha mitraiśca svabāhubalamāśritāḥ //

sa kathaṃ sātyakiṃ śiṣyaṃ sukhasambandhimeva ca /
asmadarthe ca yudhyantaṃ tyaktvā prāṇānsudustyajān //

mama bāhuṃ raṇe rājandakṣiṇaṃ yuddhadurmadam /
*tvayā nikṛṣyamāṇaṃ ca dṛṣṭavānasmi niṣkriyam //

na ca tvaṃ rakṣitavyo hi eko raṇagatena hi / yo yasya yudhyate'rthāya saṃrakṣyo narādhipa /
tai rakṣyamāṇaiḥ sa nṛpo rakṣitavyo mahāmṛdhe //

yadyahaṃ sātyakiṃ dṛṣṭvā tūṣṇīmāsiṣya āhave /
tatastena viyogaśca prāpyaṃ narakameva ca //

rakṣitavyo mayā yasmāttasmāllabdho mayā sa ca /
yaśaścaiva svapakṣebhyaḥ phalaṃ mitrasya rakṣaṇāt //

yacca māṃ garhase rājankṛṣṇena saha saṅgatam /
kastena saṅgamaṃ necchettatra te buddhivibhramaḥ //

ābaddhakavacasyeha rathamāruhya tiṣṭhataḥ /
sarvāyudhairupetasya pratiyoddhṛpratīkṣiṇaḥ //

asminrathagajānīke hayapattisamākule /
siṃhanādoddhatarave gambhīre sainyasāgare //

svaiścāpi samupetasya vikrāntasya tathā raṇe /
sātyakena kathaṃ yogyaḥ saṅgrāmaste bhaviṣyati //

bahubhiḥ saha saṅgamya nirjitya ca mahārathān / śrāntaśca śrāntavāhaśca kṣīṇasarvāyudhastvayā /
sametaḥ sātyakiḥ saṅkhye nirjitaśca mahārathaḥ //

īdṛśaṃ sātyakiṃ saṅkhye nirjitya ca mahāratham /
adhikatvaṃ vijānīpe svavīryavaśamāgatam //

icchasi tvaṃ śirastasya asinā hartumāhave / tathā kṛcchragataṃ dṛṣṭvā sātyakiṃ kaḥ kṣamiṣyati /
ekasyaikena hi kathaṃ saṅgrāmaḥ sambhaviṣyati //

tvaṃ tu garhaya cātmānaṃ svadharmaṃ yo na rakṣasi /
kathaṃ rakṣiṣyase vīra ye vai tvāṃ saṃśritā janāḥ //

āttaśastrasya hi raṇe vṛṣṇiputraṃ jighāṃsataḥ /
chinnavānyadahaṃ bāhuṃ naitallokavigarhitam //

nyastaśastrasya hi punarvikalasya vivarmaṇaḥ /
abhimanyorvadhaṃ tāta dhārmikaḥ ko nu pūjayet //
sañjaya uvāca /

evamukto mahārbāhuryūpaketurmahāyaśāḥ /
yuyudhānaṃ samutsṛjya raṇe prāyamupāviśat //

śarānāstīrya savyena pāṇinā puṇyalakṣaṇaḥ /
yiyāsurbrahmalokāya prāṇānprāṇeṣvathājuhot //

sūrye cakṣuḥ samādhāya prasannaṃ salile manaḥ /
dhyāyanmahopaniṣadaṃ yogayukto'bhavanmuniḥ //

tataste sarvasenāsu janāḥ kṛṣṇadhanañjayau /
garhayāmāsurapyetau śaśaṃsurbhūridakṣiṇam //

nindyamānau tathā kṛṣṇau nocatuḥ kiñcidapriyam /
tataḥ praśasyamānaśca nāhṛṣyadyūpaketanaḥ //

tāṃstathāvādino rājanputrāṃstava dhanañjayaḥ /
amūṣyamāṇo manasā teṣāṃ tasya ca bhāṣitam //

asaṅkruddhamanā vācaḥ smārayanniva bhārata /
uvāca pāṇḍutanayaḥ sākṣepamiva phalgunaḥ //

mama sarve'pi rājāno jānantyetanmahāvratam /
na śakyo māmako hantuṃ yo me syādbāṇagocare //

yūpaketuṃ samīkṣyaitanna māṃ garhitumarhatha /
na hi dharmamavijñāya yuktaṃ garhayituṃ param //

nyastaśastrasya bālasya virathasya vivarmaṇaḥ /
nābhimanyorvadhaṃ yūyaṃ garhayadhvaṃ kutastadā //

duryodhanasya kṣudrasya apramāṇe ca tiṣṭhataḥ /
saumadatterathaṃ sādhuḥ sarvasāhāyyakāriṇaḥ //

asmadīyā mayā rakṣyāḥ prāṇabādha upasthite /
ye me pratyakṣato vīrā hanyeranniti me matiḥ //

sātyakaśca vaśaṃ nītaḥ kauraveṇa mahātmanā /
tato mayaitaccaritaṃ pratijñārakṣaṇaṃ prati //
sañjaya uvāca /

punaśca kṛpayā'viṣṭo bahu tattadvicintayan /
uvāca cainaṃ kauravyamarjunaḥ śokapīḍitaḥ //

dhigastu kṣatradharmaṃ tu yatra tvaṃ puruṣeśvaraḥ /
avasthāmīdṛśīṃ prāptaḥ śaraṇyaḥ śaraṇapradaḥ //

nātibhāraḥ kṛtāntasya vidyate kurunandana /
yatra tvaṃ puruṣavyāghraḥ prāptaḥ pāpāmimāṃ daśām //

nātmanaḥ sukṛtasyāsya phalaṃ vai nṛpasattama /
yatra tvaṃ kuruśārdūla prāptaḥ pāpāmimāṃ daśām //

rauravaṃ narakaṃ bhīmaṃ gamiṣyati suyodhanaḥ /
yatkṛte naraśārdūlaḥ prāptaḥ pāpāmimāṃ daśām //

ko hi nāma pumām̐lloke mādṛśaḥ puruṣottama /
praharettvadvidhe tvadya pratijñā yadi no bhavet //

evamuktaḥ sa pārthena śirasā bhūmimaspṛśat /
pāṇinā caiva savyena prāhiṇodasya dakṣiṇam //

etatpārthasya tu vacastataḥ śrutvā mahādyutiḥ /
yupaketurmahārāja tūṣṇīmāsīdavāṅmukhaḥ //
arjuna uvāca /

yā prītirdharmarāje me bhīme ca balināṃ vare /
nakule sahadeve ca sā me tvayi śalāgraja //

mayā tvaṃ samanujñātaḥ kṛṣṇena ca mahātmanā /
gaccha puṇyakṛtāṃ lokāñchibirauśīnaro yathā //
vāsudeva uvāca /

ye lokā mama vimalāḥ sakṛdvibhātā brahmādyaiḥ suravṛṣabhairapīṣyamāṇāḥ /
tānkṣipraṃ vraja satatāgnihotrayāji-- nmattulyo bhava garuḍottamāṅgayānaḥ //
sañjaya uvāca /

dhanañjaye bruvatyevaṃ ghṛṇayā ca pariplute /
avāṅmukhā babhūvuśca sainikāḥ sarva eva te //

muhūrtādiva viśramya sātyakiḥ krodhamūrcchitaḥ /
amarṣavaśamāpannaḥ saumadattinirākṛtaḥ //

utthitaḥ sa tu śaineyo vimuktaḥ saumadattinā /
saṅgamādāya cicchitsuḥ śirastasya mahātmanaḥ //

nihataṃ pāṇḍuputreṇa prasaktaṃ bhūridakṣiṇam /
iyeṣa sātyakirhantuṃ śalāgrajamakalmaṣam //

nikṛttabhujamāsīnaṃ chinnahastamiva dvipam /
krośatāṃ sarvasainyānāṃ nindyamānaḥ sudurmanāḥ //

vāryamāṇaḥ sa kṛṣṇena pārthena ca mahātmanā /
bhīmena cakrakṣābhyāmaśvatthāmnā kṛpeṇa ca //

karṇena vṛṣasenena saindhavena tathaiva ca /
vikrośatāṃ ca sainyānāmavadhīttaṃ dhṛtavratam //

prāyopaviṣṭasya raṇe pārthena cchinnabāhunaḥ /
sātyakiḥ kauraveyasya khaṅgenāpāharacchiraḥ //

nābhyanandanta taṃ sainyāḥ sātyakiṃ tena karmaṇā /
arjunena hataṃ pūrvaṃ yajjaghāna kurūdvaham //

sahasrākṣasamaṃ caiva siddhacāraṇamānavāḥ /
bhūriśravasamālokya yuddhe prāyagataṃ hatam //

apūjayanta taṃ devā vismitāste'sya karmabhiḥ /
pakṣavādāṃśca subahūnprāvadaṃstava sainikāḥ //

na vārṣṇeyasyāparādho bhavitavyaṃ hi tattathā /
tasmānmanyurna vaḥ kāryaḥ krodho duḥkhataro nṛṇām //

hantavyaścaiṣa vīreṇa nātra kāryā vicāraṇā /
vihito hyasya dhātraiva mṛtyuḥ sātyakirāhave //

martavyameva sarveṇa caramaṃ pūrvameva vā /
manyadhvaṃ mṛta ityeṣa mābhūdvo buddhilāghavam //

tasminhate mahābāhau yūpaketau mahātmani /
dhigenamiti cākrandankṣatriyāḥ krodhamūrcchitāḥ //

anye na yuktamityeva bhavitavyaṃ tatheti ca /
kecidāsanvimanasaḥ kecidduḥkhasamanvitāḥ //
sātyakiruvāca /

na hantavyo na hantavya iti mandāḥ prabhāṣata /
dharmavādairadharmiṣṭhā dharmakañcukamāsthitāḥ //

yadā bālaḥ subhadrāyāḥ sutaḥ śastraninākṛtaḥ /
yuṣmābhirnihato yuddhe tadā dharmaḥ kva vo gataḥ //

mayā tvetatpratijñātaṃ kṣepe kasmiṃścideva hi / śrutvā tatsarvabhāvena garhayadhvaṃ na cārjunam /
śṛṇudhvaṃ sarvameveha śrutvā garhatha mānavāḥ //

yo māṃ niṣpiṣya saṅgrame jīvanhanyātpadā ruṣā /
sa me vadhyo bhavecchatruryadyapi syānmunivrataḥ //

ceṣṭamānaṃ pratīghāte sabhujaṃ māṃ sacakṣuṣaḥ /
manyadhvaṃ mṛta ityevametadvo buddhilāghavam //

yukto hyasya pratīghātaḥ kṛto me kurupuṅgavāḥ //

yattu pārthena māṃ dṛṣṭvā pratijñāmabhirakṣatā /
sakhaṅgo'sya hṛto bāhuretenaivāsmi vañcitaḥ //

bhavitavyaṃ hi yadbhāvi daivaṃ ceṣṭayate hi tat /
soyaṃ hato vimarde'sminkimatrādharmaceṣṭitam //

api cāpaṃ purā gītaḥ śloko vālmīkinā bhuvi /
na hantavyāḥ striya iti yadbravīṣi plavaṅgama //

sarvakālaṃ manuṣyeṇa vyavasāyavatā sadā / pīḍākaramamitrāṇāṃ yatsyātkartavyameva tat /
anuṣṭhitaṃ mayā tacca kasmādgarhatha mūḍhavat //
sañcaya uvāca /

evamukte mahārāja sarve kauravapuṅgavāḥ /
na sma kiñcidabhāṣanta manasā samapūjayan //

mantrabhipūtasya mahādhvareṣu yaśasvino bhūrisahasradasya /
munerivāraṇyagatasya tasya na tatra kaścidvadhamabhyanandat //

sunīlakeśaṃ varadasya tasya sūrasya pārāvatalohitākṣam /
aśvasya medhyasya śiro nikṛttaṃ nyastaṃ havirdhānamivāntareṇa //

sa tejasā śastrakṛtena pūto mahāhave dehavaraṃ visṛjya /
ākrāmadūrdhvaṃ varado varārho vyāvṛttya dharmeṇa parema rodasī //