Mahabharata · Chapter 7.142

tamāpatantaṃ samprekṣya sātvataṃ yuddhadurmadam /
krodhādbhūriśravā rājansahasā samupādravat //

tamabravīnmahārāja kauravyaḥ śinipuṅgavam /
adya prāpto'pi diṣṭyā me cakṣurviṣayamityuta //

cirābhilaṣitaṃ kāmamahaṃ prāpsyāmi saṃyuge /
na hi me mokṣyase jīvanyadi notsṛjase raṇam //

adya tvāṃ samare hatvā nityaṃ śūrābhimāninam /
nandayiṣyāmi dāśārha kururājaṃ suyodhanam //

adya madbāṇanirdagdhaṃ patitaṃ dharaṇītale /
drakṣyatastvāṃ raṇe vīrau sahitau keśavārjunau //

adya dharmasuto rājā śrutvā tvāṃ nihataṃ mayā /
savrīḍo bhavitā sadyo yenāsīha praveśitaḥ //

adya me vikramaṃ pārtho vijñāsyati dhanañjayaḥ /
tvayi bhūmau vinihate śayāne rudhirokṣite //

cirābhilaṣito hyeṣa tvayā saha samāgamaḥ /
purā devāsure yuddhe śakrasya balinā yathā //

adya yuddhaṃ mahāghoraṃ tava dāsyāmi sātvata /
tato jñāsyasi tattvena madvīryabalapauruṣam //

adya saṃyamanīṃ yātā mayā tvaṃ nihato raṇe /
yathā rāmānujenājau rāvaṇirlakṣmaṇena ha //

adya kṛṣṇaśca pārthaśca dharmarājaśca mādhava /
hate tvayi nirutsāhāraṇaṃ tyakṣyantyasaṃśayam //

adya te'pacitiṃ kṛtvā śitairmādhava sāyakaiḥ /
tatstriyo nandayiṣyāmi ye tvayā nihatā raṇe //

maccakṣurviṣaye prāpto na tvaṃ mādhava mokṣyase /
siṃhasya viṣayaṃ prāpto yathā kṣudramṛgastathā //
sañjaya uvāca /

yuyudhānastu taṃ rājanpratyuvāca hasanniva /
kauraveya na santrāso vidyate mama saṃyuge //

nāhaṃ bhīṣayituṃ śakyo vāṅmātreṇa tu kevalam /
sa māṃ nihanyātsaṅgrāme yo māṃ kuryānnirāyudham //

samāstu śāśvatīrhanyādyo māṃ hanyāddhi saṃyuge /
kiṃ vṛthoktena bahunā karmaṇā tatsamācara //

śāradasyeva meghasya garjitaṃ niṣphalaṃ hite /
śrutvā tvadgarjitaṃ vīra hāsyaṃ hi mama jāyate //

cirakālepsitaṃ loke yuddhamadyāstu kaurava / tvarate me matistāta tava yuddhābhikāṅkṣiṇī /
nāhatvā'haṃ nivartiṣye tvāmadya puruṣādhama //
sañjaya uvāca /

anyonyaṃ tau tathā vāgbhistakṣantau narapuṅgavau /
jighāṃsū paramakruddhabhijaghnaturāhave //

sametau tau maheṣvāsau śuṣmiṇau spardhinau raṇe /
dviradāviva saṅkruddhau vāsitārthe madotkaṭau //

bhūriśravāḥ sātyakiśca vavarṣaturarindamau /
śaravarṣāṇi ghorāṇi meghāviva parasparam //

saumadattistu śaineyaṃ pracchādyeṣubhirāśugaiḥ /
jighāṃsurbharataśreṣṭha vivyādha niśitaiḥ śaraiḥ //

daśabhiḥ sātyakiṃ viddhvā saumadattirathāparān /
mumoca niśitānbāṇāñjighāṃsuḥ śinipuṅgavaṃ //

tānasya viśikhāṃstīkṣṇānantarikṣe viśāmpate /
aprāptānastramāyābhiragrasatsātyakiḥ prabho //

tau pṛthakśastravarṣābhyāmavarṣetāṃ parasparam /
uttamābhijanau vīrau kuruvṛṣmiyaśaskarau //

tau nakhairiva śārdūlau dantairiva mahādvipau /
rathaśaktibhiranyonyaṃ viśikhaiścāpyakṛntatām //

nirbhidantau hi gātrāṇi vikṣarantau ca śoṇitam /
vyaṣṭambhayetāmanyonyaṃ prāṇadyūtābhidevinau //

evamuttamakarmāṇau kuruvṛṣṇiyaśaskarau /
parasparamayudhyetāṃ vāraṇāviva yūthapau //

tāvadīrgheṇa kālena brahmalokapuraskṛtau /
yiyāsantau paraṃ sthānamanyonyaṃ sañjagarjatuḥ //

sātyakiḥ saumadattiśca śaravṛṣṭyā parasparam /
hṛṣṭavaddhārtarāṣṭrāṇāṃ paśyatāmabhyavarṣatām //

sampraikṣanta janāstau tu yudhyamānau yudhāmpatī /
yūthapau vāsitāhetoḥ prayuddhāviva kuñjarau //

bhūyobhūyaḥ śarai rājaṃstakṣantau krodhamūrcchitau /
ayudhyetāṃ mahāraṅge vane kesariṇāviva //

marmajñāviva saṅkruddhau jighāṃsantau jagarjatuḥ /
vimardantāvathānyonyaṃ balavajradharāviva //

athānyonyaṃ patākāśca rathopakaraṇāni ca /
sañcicchidaturāyāntau bāṇaiḥ sannataparvabhiḥ //

punaśca śaravarṣābhyāmanyonyamabhivarṣatām /
ubhau tu jaghnatustūrṇamitaretarasārathī //

anyonyasya hayānhatvā dhanuṣī vinikṛtya ca /
virathāvasiyuddhāya sameyātāṃ mahāraṇe //

ārṣabhe carmaṇī citre pragṛhya vipule śubhe /
vikośau cāpyasī kṛtvā samare tau viceratuḥ //

carantau vividhānmārgānmaṇḍalāni ca bhāgaśaḥ / muhurājaghnatuḥ kruddhāvanyonyamarimardanau /
sakhaṅgau citravarmāṇau saniṣkāṅgadabhūṣaṇau //

bhrāntamuddhāntamāviddhamāplutaṃ viplutaṃ sṛtam /
sampātaṃ samudīrṇaṃ ca darśayantau yaśasvinau //

asibhyāṃ samprajahāte parasparamarindamau /
ubhau chidraiṣiṇau vīrāvubhau citraṃ vavalgatuḥ //

darśayantāvubhau śikṣāṃ lāghavaṃ sauṣṭhavaṃ tathā /
raṇe raṇakṛtāṃ śreṣṭhāvanyonyaṃ paryakarṣatām //

muhūrtamiva rājendra samāhatya parasparam /
paśyatāṃ sarvasainyānāṃ vīrāvāśvasatāṃ punaḥ //

asibhyāṃ carmaṇī citre śatacandre narādhipa /
nikṛtya puruṣavyāghrau bāhuyuddhaṃ pracakratuḥ //

vyūḍhoraskau dīrghabhujau niyuddhakuśalāvubhau /
bāhubhiḥ samasajjetāmāyasaiḥ paridhairiva //

tayo rājanbhujāghātanigrahapragrahāstathā /
śikṣābalasamudbhūtāḥ sarvayodhapraharṣaṇāḥ //

tayornṛvarayo rājansamare yudhyamānayoḥ /
bhīmo'bhavanmahāśabdo vajraparvatayoriva //

dvipāviva viṣāṇāgraiḥ śṛṅgairiva maharṣabhau /
bhujayokrāvabandhaiśca śirobhyāṃ cāvaghātanaiḥ //

pādāvakarṣasandhānaistomarāṅkaśalāsanaiḥ /
pādodaravibandhaiśca bhūmāvuddhamaṇaistathā //

gatapratyāgatākṣepaiḥ pātanotthānasamputaiḥ /
yuyudhāte mahātmānau kurusātvatapuṅgavau //

dvātriṃśatkāraṇāni syuryāni yuddhāni bhārata /
tānyadarśayatāṃ tatra yudhyamānau mahābalau //

kṣīṇāyudhe sātvate yudhyamāne tato'bravīdarjunaṃ vāsudevaḥ /
paśyasvainaṃ virathaṃ yudhyamānaṃ raṇe varaṃ sarvadhanurdharāṇām //

sindhurājavadhe saktaṃ pārthaṃ kṛṣṇo'bravītpunaḥ /
sīdantaṃ sātyakiṃ paśya pārthainaṃ parirakṣa ca //

praviṣṭo bhāratīṃ bhittvā tava pāṇḍava pṛṣṭhataḥ /
yodhitaśca mahāvīryaiḥ sarvairbhārata bhārataiḥ //

dhārtarāṣṭrāśca ye mukhyā ye ca mukhyā mahārathāḥ /
nihatā vṛṣṇivīreṇa śataśo'tha sahasraśaḥ //

pariśrāntaṃ yudhāṃ śreṣṭhaṃ samprāpto bhūridakṣiṇaḥ /
yuddhākāṅkṣī samāyāntaṃ naitatsamamivārjuna //

tato bhūriśravāḥ kruddhaḥ sātyakiṃ yuddhadurmadaḥ /
udyamyābhyāhanadrājanmatto mattamiva dvipam //

tato jaladanirghoṣaḥ samīpe nṛpasattama / hāhākāro mahānāsītsainyānāṃ bharatarṣabha /
yadudyamya mahābāhuḥ sātyakiṃ nyahanadbhuvi //

rathasthayordvayoryuddhe kruddhayoryodhamukhyayoḥ /
keśavāryunayo rājansamare prekṣamāṇayoḥ //

atha kṛṣṇo mahābāhurarjunaṃ pratyabhāṣata /
paśya vṛṣṇyandhakavyāghraṃ saumadattivaśaṃ gatam //

pariśrāntaṃ gataṃ bhūmau kṛtvā karma suduṣkaram /
tavāntevāsinaṃ vīraṃ pālayārjuna sātyakim //

na vaśaṃ yajñaśīlasya gacchedeṣa varo'rjuna /
tvatkṛte puruṣavyāghra tadā'śu kriyatāṃ vibho //
sañjaya uvāca /

sa siṃha iva mātaṅgaṃ vikarṣanbhūridakṣiṇaḥ /
vyarocata kuruśreṣṭhaḥ sātvatapravaraṃ yudhi //

athābravīddhṛṣṭamanā vāsudevaṃ dhanañjayaḥ / paśya vṛṣṇipravīreṇa krīḍantaṃ kurupuṅgavam /
mahādvipeneva vane mattena hariyūthapam //

māmeva ca mahābāho pariyānti mahārathāḥ /
yathāśakti yatanto māṃ yodhayanto janārdana //

dhruvaṃ ca yodhayāmyetāñchidrānveṣaṇatatparān /
rakṣāmi sātyakiṃ caiva saumadattivaśaṃ gatam //

aprāpto'yaṃ mayā kṛṣma hantuṃ bhūriśravā raṇe /
anyena tu samāsaktaṃ mama notsahate manaḥ //

avaśyaṃ ca mayā kṛṣṇa vṛṣṇivīrasya rakṣaṇam /
madarthaṃ yudhyamānasya kāryaṃ prāṇairapi prabho //

adharmo vā'stu dharmo vā mama mādhava mādhavaḥ /
pareṇa nihato mā sma prāṇānhāsīnmahārathaḥ //
sañjaya uvāca /

evamuktvā'rjunaḥ kṛṣṇaṃ parānāśu śitaiḥ śaraiḥ /
chādayāmāsa saṅkruddhaḥ pare cāpi dhanañjayam //

evaṃ sma yudhyate vīraḥ sātyakiṃ ca muhurmuhuḥ /
prekṣate sma naravyāghro bhūriśravasameva ca //

tathā tu kṛṣyamāṇaṃ taṃ dṛṣṭvā sātyakimāhave /
vāsudevastadā vākyaṃ bhūyo'pyarjunamabravīt //

paśya vṛṣṇyandhakavyāghraṃ saumadattivaṃśaṃ gatam /
tava śiṣyaṃ mahābāho dhanuṣyanavamaṃ tvayā //

anityo vikramaḥ pārtha yatra bhūriśravā raṇe /
viśeṣayati vārṣṇeyaṃ sātyakiṃ satyavikramam //

bahubhirmahārathaireṣa parākrāntairyuyutsubhiḥ /
yuddhvā bhṛśaṃ pariśrāntaḥ kṣīṇāyudharaparicchadaḥ //
sañjaya uvāca /

evamukto mahārāja vāsudevena pāṇḍavaḥ /
manasā pūjayāmāsa bhūriśravasamāhave //

vikarṣansātvatāṃ śreṣṭhaṃ krīḍamāna ivāhave /
sa harṣayati māṃ bhūyaḥ kurūṇāṃ nandivardhanaḥ //

pravaraṃ vṛṣṇivīrāṇāṃ yannihantyeṣa sātyakim /
mahādvipamivāraṇye karṣanniva harirbhṛśam //

evaṃ tu manasā rājanpārthaḥ sampūjya kauravam /
ayudhyatāribhirvīrastaṃ ca samprekṣate muhuḥ //

atha kośādviniṣkṛṣya khaṅgaṃ bhūriśravāḥ śitam / mūrdhajeṣu ca jagrāha padā corasyātāḍayat /
ākramya cāpyathodyamya sahāsiṃ subhujo bhujam //

śuśubhe sa bhujastasya tapanīyavibhūṣaṇaḥ /
madhye rathasamūhasya indradhvaja ivocchritaḥ //

hāhākṛtamabhūtsarvaṃ pāṇḍavānāṃ mahadbalam /
tāvakāśca mudā yuktāḥ siṃhanādaṃ vicukruśuḥ //

nimīlitākṣāstvabhavañjanāḥ saṅgrāmabhīravaḥ /
tathā bhūriśravograste sātvate naṣṭavikrame //

vāsudevaṃ mahābāhurarjunaḥ pratyabhāṣata /
saindhave saktadṛṣṭitvānna taṃ paśyāmi mādhavam //

eṣa tvasukaraṃ karma yādavārthe karomyaham / mama śiṣyo mamārthāya yudhyate mama śatrubhiḥ /
taṃ kṛṣṇa mokṣayiṣyāmi dāvātsiṃhaśiśuṃ yathā //
sañjaya uvāca /

ityuktvā vacanaṃ kurvanvāsudevasya pāṇḍavaḥ /
tataḥ kṣurapraṃ niśitaṃ gāṇḍīve samayojayat //

pārthabāhuvisṛṣṭaḥ sa maholkeva nabhaścyutā /
sakhaṅgaṃ yajñaśīlasya bāhuṃ dakṣiṇamacchinat //