Mahabharata · Chapter 7.135

daivameva paraṃ manye dhikpauruṣamanarthakam /
yatrādhirathirāyattau nātaratpāṇḍavaṃ raṇe //

karṇaḥ pārthānsagovindāñjetumutsahate raṇe / na ca karṇasamaṃ loke paśyāmi kañcana /
iti duryodhanasyāhamaśrauṣaṃ jalpato muhuḥ //

karṇo hi balavāñchūro dṛḍhadhanvā jitaklamaḥ /
iti māmabravītsūta mando duryodhanaḥ purā //

vasuṣeṇasahāyaṃ māṃ nālaṃ devā'pi saṃyuge /
kiṃ nu pāṇḍusutā rājangatasatvā vicetasaḥ //

tatra taṃ nirjitaṃ dṛṣṭvā bhujaṅgamiva nirviṣam /
yuddhātkarṇamapakrāntaṃ kiṃsvidduryodhano'bravīt //

aho durmukhamevaikaṃ yuddhānāmaviśāradam /
prāveśayaddhutavahaṃ pataṅgamiva mohitaḥ //

aśvatthāmā madrarājaḥ kṛpaḥ karṇaśca saṅgatāḥ /
na śaktyāḥ pramukhe sthātuṃ nūnaṃ bhīmasya sañjaya //

te'pi cāsya mahāghoraṃ balaṃ nāgāyutopamam /
jānanto vyavasāyaṃ ca krūraṃ mārutatejasaḥ //

kimarthaṃ krūrakarmāṇaṃ yamakālāntakopamam /
balasaṃrambhavīryajñāḥ kopayiṣyanti saṃyuge //

karṇastveko mahābāhuḥ svabāhubaladarpitam /
bhīmasenamanādṛtya raṇe'yudhyata sūtajaḥ //

yo'jayatsamare karṇaṃ purandara ivāsuram /
na sa pāṇḍusuto jetuṃ śakyaḥ kenacidāhave //

droṇaṃ yaḥ sampramathyaikaḥ praviṣṭo mama vāhinīm /
bhīmo dhanañjayānveṣī kastamārcchejjijīviṣu //

ko hi sañjaya bhīmasya sthātumutsahate'grataḥ /
udyatāśanihastasya mahendrasyeva dānavaḥ //

pretarājapuraṃ prāpya nivartetāpi mānavaḥ /
na bhīmasenaṃ samprāpya nivarteta kadācana //

pataṅgā iva vahniṃ te prāviśannalpacetasaḥ /
ye bhīmasenaṃ saṅkruddhamanvadhāvanvimohitāḥ //

yattatsabhāyāṃ bhīmena mama putravadhāśrayam /
uktaṃ saṃrambhiṇogreṇa kurūṇāṃ śṛṇvatāṃ tadā //

tannūnamabhisañcintya dṛṣṭvā karṇaṃ ca nirjitam /
duḥśāsanaḥ saha bhrātrā bhayādbhīmādupāramat //

yaśca sañjaya durbuddhirabravītsamitau muhuḥ /
karṇo duḥśāsano'haṃ ca jeṣyāmo yudhi pāṇḍavān //

sa nūnaṃ virathaṃ dṛṣṭvā karṇaṃ bhīmena nirjitam /
pratyākhyānācca kṛṣṇasya bhṛśaṃ tapyati putrakaḥ //

dṛṣṭvā bhrātṝnhatānsaṅkhye bhīmasenena daṃśitān /
ātmāparādhātsammūḍho nūnaṃ tapyati putrakaḥ //

ko hi jīvitamanvicchanpratīpaṃ pāṇḍavaṃ vrajet /
bhīmaṃ bhīmāyudhaṃ kruddhaṃ sākṣātkālamiva sthitam //

baḍabāmukhamadhyastho mucyetāpi hi mānavaḥ /
na bhīmamukhasamprāpto mucyediti matirmama //

na pārthā na ca pañcālā na ca keśavasātyakī /
jānate yudhi saṃrabdhā jīvitaṃ parirakṣitum //

aho mama sutānāṃ hi vipannaṃ sūta jīvitam //
sañjaya uvāca /

yastvaṃ śocasi kauravya vartamāne mahābhaye /
tvamasya jagato mūlaṃ vināśasya na saṃśayaḥ //

svayaṃ vairaṃ mahatkṛtvā putrāṇāṃ vacane sthitaḥ /
ucyamāno na gṛhṇīṣe martyaḥ pathyamivauṣadham //

svayaṃ pītvā mahārāja kālakūṭaṃ sudurjaram /
tasyedānīṃ phalaṃ kṛtsnamavāpnuhi narottama //

yattu kutsayase yodhānyudhyamānānmahābalān /
tatra te vartayiṣyāmi yathā yuddhamavartata //

dṛṣṭvā karṇaṃ tu putrāste bhīmasenaparājitam /
nāmṛṣyanta maheṣvāsāḥ sodaryāḥ pañca bhārata //

durmarṣaṇo duḥsahaśca durmado durdharo jayaḥ /
pāṇḍavaṃ citrasannāhāstaṃ pratīpamupādravan //

te samantānmahābāhuṃ parivārya vṛkodaram /
diśaḥ śaraiḥ samāvṛṇvañśalabhānāmiva vrajaiḥ //

āgacchatastānsahasā kumārāndevarūpiṇaḥ /
pratijagrāha samare bhīmaseno hasanniva //

tava dṛṣṭvā tu tanayāndurmarṣaṇapurogamān /
abhyavartata rādheyo bhīmasenaṃ mahābalam //

visṛjanviśikhāṃstīkṣṇānsvarṇapuṅkhāññchilāśitān /
taṃ tu bhīmo'bhyayāttūrṇaṃ vāryamāṇaḥ sutaistava //

kuravastu tataḥ karṇaṃ parivārya samantataḥ /
avākiranbhīmasenaṃ śaraiḥ sannataparvabhiḥ //

tānbāṇaiḥ pañcaviṃśatyā sāśvānrājannararṣabhān /
sasūtānbhīmadhanuṣo bhīmo ninye yamakṣayam //

prāpatansyandanebhyaste sārdhaṃ sūtairgatāsavaḥ /
citrapuṣpadharā bhagnā vāteneva mahādrumāḥ //

tatrādbhutamapaśyāma bhīmasenasya vikramam /
saṃvāryādhirathiṃ bāṇairyajjaghāna tavātmajān //

sa vāryamāṇo bhīmena śitairbāṇaiḥ samantataḥ /
sūtaputro mahārāja bhīmasenamavaikṣata //

taṃ bhīsasenaḥ saṃrambhātkrodhasaṃraktalocanaḥ /
viṣphārya sumahaccāpaṃ muhuḥ karṇamavaikṣata //