Mahabharata · Chapter 7.134

sarvathā virathaḥ karṇaḥ punarbhīmena nirjitaḥ /
rathamanyaṃ samāsthāya punarvivyādha pāṇḍavam //

mahāgajāvivāsādya viṣāṇāgraiḥ parasparam /
śaraiḥ pūrṇāyatotsṛṣṭairanyonyamabhijaghnatuḥ //

atha karṇaḥ śaravrātairbhīmasenaṃ samārpayat /
nanāda ca mahānādaṃ punarvivyādha corasi //

taṃ bhīmo daśabhirbāṇaiḥ pratyavidhyadajihmagaiḥ /
punarvivyādha saptatyā śarāṇāṃ nataparvaṇām //

karṇastu navabhirbhīmaṃ bhittvā rājaṃstanāntare /
dhvajamekena vivyādha viśokaṃ ca tribhiḥ śaraiḥ //

sāyakānāṃ tataḥ pārthastriṣaṣṭyā pratyavidhyata /
totrairiva mahānāgaṃ kaśābhiriva vājinam //

so'tividdho mahārāja pāṇḍavena yaśasvinā /
sṛkviṇī lelihanvīraḥ krodharaktāntalocanaḥ //

tataḥ śaraṃ mahārāja sarvakāyāvadāraṇam /
prāhiṇodbhīmasenāya balāyendra ivāśanim //

sa nirbhidya raṇe pārthaṃ sūtaputradhanuścyutaḥ /
agacchaddārayanbhūmiṃ citrapuṅkhaḥ śilīmukhaḥ //

tato bhīmo mahābāhuḥ krodhasaṃraktalocanaḥ / vajrakalpāṃ catuṣkiṣkuṃ gurvī rukmāṅgadāṃ gadām /
prāhiṇotmūtaputrāya ṣaḍasrāmavicārayan //

tayā jaghānādhiratheḥ sadaśvānsādhuvāhinaḥ /
gadayā bhārataḥ kruddho vajreṇendra ivāsurān //

tato bhīmo mahābāhuḥ kṣurābhyāṃ bharatarṣabha /
dhvajamāghiratheśchittvā sūtamabhyahanaccharaiḥ //

hatāśvasūtamutsṛjya sa rathaṃ patitadhvajam /
viṣphārayandhanuḥ karṇastasthau bhārata durmanāḥ //

tatrādbhutamapaśyāma rādheyasya parākramam /
viratho rathināṃ śreṣṭho vārayāmāsa yadripum //

virathaṃ taṃ naraśreṣṭhaṃ dṛṣṭvā'dhirathimāhave /
duryodhanastato rājannabhyabhāṣata durmukham //

eṣa durmukha rādheyo bhīmena virathīkṛtaḥ /
taṃ rathena naraśreṣṭha sampādaya mahāratham //

tato duryodhanavacaḥ śrutvā bhārata durmukhaḥ /
tvaramāṇo'bhyayātkarṇaṃ bhīmaṃ cāvārayaccharaiḥ //

durmukhaṃ prekṣya saṅgrāme sūtaputrapadānugam /
vāyuputraḥ prahṛṣṭo'bhūtsṛkviṇī parisaṃlihan //

tataḥ karṇaṃ mahārāja vārayitvā śilīmukhaiḥ /
durmukhāya rathaṃ tūrṇaṃ preṣayāmāsa pāṇḍavaḥ //

tasminkṣaṇe mahārāja navabhirnataparvabhiḥ /
sumukhairdurmukhaṃ bhīmaḥ śarairninye yamakṣayam //

tatastamevādhirathiḥ syandanaṃ durmukhe hate /
āsthitaḥ prababhau rājandīpyamāna ivāṃśumān //

śayānaṃ bhinnamarmāṇaṃ durmukhaṃ śoṇitokṣitam /
dṛṣṭvā karṇo'śrupūrṇākṣo muhūrtaṃ nābhyavartata //

taṃ gatāsumatikramya kṛtvā karṇaḥ pradakṣiṇam /
dīrghamuṣṇaṃ śvasanvīro na kiñcitpratyapadyata //

tasmiṃstu vivare rājannārācāngārdhavāsasaḥ /
prāhiṇotsūtaputrāya bhīmasenaścaturdaśa //

te tasya kavacaṃ bhittvā svarṇacitraṃ mahojasaḥ /
hemapuṅkhā mahārāja vyaśobhanta diśo daśa //

apibansūta putrasya śoṇitaṃ raktabhojanāḥ /
kruddhā iva manuṣyendra bhujaṅgāḥ kālacoditāḥ //

prasarpamāṇā medinyāṃ te vyarocanta mārgaṇāḥ /
ardhapraviṣṭāḥ saṃrabdhā bilānīva mahoragāḥ //

taṃ pratyavidhyadrādheyo jāmbūnadavibhūṣitaiḥ /
caturdaśabhiratyugrairnārācairavicārayan //

te bhīmasenasya bhujaṃ savyaṃ nirbhidya patriṇaḥ /
prāviśanmedinīṃ bhīmāḥ krauñcaṃ patrarathā iva //

te vyarocanta nārācāḥ praviśanto vasundharām /
gacchatyastaṃ dinakare dīpyamānā ivāṃśavaḥ //

sa nirbhinno raṇe bhīmo nārācairmarmabhedibhiḥ /
susrāva rudhiraṃ bhūri parvataḥ salilaṃ yathā //

sa bhīmastribhirāyastaḥ sūtaputraṃ patatribhiḥ /
suparṇavegairvivyādha sārathiṃ cāsya saptabhiḥ //

sa vihvalo mahārāja karṇo bhīmaśarāhataḥ /
prādravajjavanairaśvai raṇaṃ hitvā mahābhayāt //

bhīmasenastu viṣphārya cāpaṃ hemapariṣkṛtam /
āhave'tiratho'tiṣṭhajjvalanniva hutāśanaḥ //