Mahabharata · Chapter 7.136

tavātmajāṃstu patitāndṛṣṭvā karṇaḥ pratāpavān /
krodhena mahatā'viṣṭo nirviṇṇo'bhūtsa jīvito //

āgaskṛtamivātmānaṃ mene cādhirathistadā /
yatpratyakṣaṃ tava sutā bhīmena nihatā raṇe //

bhīmasenastataḥ kruddhaḥ karṇasya niśitāñśarān /
nicakhān sa sambhrāntaḥ pūrvavairamanusmaran //

sa bhīmaṃ pañcabhirviddhvā rādheyaḥ prahasanniva /
punarvivyādha saptatyā svarṇapuṅkhaiḥ śilāśitaiḥ //

avicintyātha tānbāṇānkarṇenāstānvṛkodaraḥ /
raṇe vivyādha rādheyaṃ śareṇānataparvaṇā //

punaśca viśikhaistīkṣṇairviddhvā marmasu pañcabhiḥ /
dhanuściccheda bhallena sūta putrasya māriṣa //

athānyaddhanurādāya karṇo bhārata durmanāḥ /
iṣubhiśchādayāmāsa mīmasenaṃ parantapaḥ //

tasya bhīmo hayānhatvā vinihatya ca sārathim /
prajahāsa mahāhāsaṃ kṛtapratikṛtaṃ mahat //

iṣubhiḥ kārmukaṃ cāsya cakarta puruṣarṣabhaḥ /
tatpapāta mahārāja svarṇapṛṣṭhaṃ mahāsvanam //

avārohadrathāttasmādatha karṇo mahārathaḥ /
gadāṃ gṛhītvā samare bhīmāya prāhiṇodruṣā //

tāmāpatantīmālakṣya bhīmaseno mahāgadām /
śarairavārayadrājansarvasainyasya paśyataḥ //

tato bāṇasahasrāṇi preṣayāmāsa pāṇḍavaḥ /
sūtaputravadhākāṅkṣī tvaramāṇaḥ parākramī //

tāniṣūniṣubhiḥ karṇo vārayitvā mahāmṛdhe /
kavacaṃ bhīmasenasya pāṭayāmāsa sāyakaiḥ //

athainaṃ pañcaviṃśatyā nārācānāṃ samārpayat /
paśyatāṃ sarvasainyānāṃ tadadbhutamivābhavat //

tato bhīmo mahābāhurnavabhirnataparvabhiḥ /
preṣayāmāsa saṅkruddhaḥ sūtaputrasya māriṣa //

te tasya kavacaṃ bhittvā tathā bāhuṃ ca dakṣiṇam /
abhyayurdharaṇīṃ tīkṣṇā valmīkamiva pannagāḥ //

sa cchādyamāno bāṇaudhairbhīmasenadhanuścyutaiḥ /
punarevābhavatkarṇo bhīmasenātparāṅmukhaḥ //

taṃ parāṅmukhamālokya padātiṃ sūtanandanam /
kaunteyaśarasañchannaṃ rājā duryodhano'bravīt //

tvaradhvaṃ sarvato yattā rādheyasya rathaṃ prati /
tatastava sutā rājañśrutvā bhrāturvaco drutam //

abhyayuḥ pāṇḍavaṃ yuddhe visṛjantaḥ śilīmukhān /
citropacitraścitrākṣaścārucitraḥ śarāsanaḥ //

citrāyudhaścitravarmā samare citrayodhinaḥ /
tānāpatata evāśu bhīmaseno mahārathaḥ //

ekaikena śareṇājau pātayāmāsa te sutān /
te hatā nyapatanbhūmau vātarūgṇā iva drumāḥ //

dṛṣṭvā vinihatānputrāṃstava rājanmahārathān /
aśrupūrṇamukhaḥ karṇaḥ kṣattuḥ sasmāra tadvacaḥ //

rathaṃ cānyaṃ samāsthāya vidhivatkalpitaṃ punaḥ /
abhyayātpāṇḍavaṃ yuddhe tvaramāṇaḥ parākramī //

tāvanyonyaṃ śarairbhittvā svarṇapuṅkhaiḥ śilāśitaiḥ /
vyabhrājetāṃ yathā meghau saṃsyūtau sūryaraśmibhiḥ //

ṣaṭ्triṃśadbhistato bhallairniśitaistigmatejanaiḥ /
vyadhamatkavanaṃ kruddhaḥ sūtaputrasya pāṇḍavaḥ //

sūtaputro'pi kaunteyaṃ śaraiḥ sannataparvabhiḥ /
pañcāśatā mahābāhurvivyādha bharatarṣabha //

raktacandanadigdhāṅgau śaraiḥ kṛtamahāvraṇau /
śoṇitāktau vyarājetāṃ kālasūryāvivoditau //

tau śoṇitokṣitairgātraiḥ śaraiśchinnatanucchadau /
vivṛtāṅgau vyarājetāṃ nirmuktāviva pannagau //

krodhāgnitejasā diptau saṃrambhādraktalocanau /
vyabhrājetāṃ mahārāja vidhūmāviva pāvakau //

vyāghrāviva naravyāghrau daṃṣṭrābhiritaretaram /
śaradhārāsṛjau vīrau meghāviva vavarṣatuḥ //

vāraṇāviva cānyonyaṃ viṣāṇābhyāmarindamau /
nirbhindantau svagātrāṇi sāyakaiścāru rejatuḥ //

nādayantau praharṣantau vikrīḍantau parasparam /
maṇḍalāni vikurvāṇau rathābhyāṃ rathiṣūttamau //

vṛṣāvivātha nardantau balinau vāsitāntare /
siṃhāviva parākrāntau narasiṃhau mahābalau //

parasparaṃ vīkṣamāṇau krodhasaṃraktalocanau /
yuyudhāte mahāvīryau śakravairocanī yathā //

tato bhīmo mahābāhurbāhubhyāṃ vikṣipandhanuḥ /
vyarājata raṇe rājansavidyudiva toyadaḥ //

sanemighoṣastanitaścāpavidyuccharāmbubhiḥ /
bhīmasenamahāmeghaḥ karṇaparvatamāvṛṇot //

tataḥ śarasahasreṇa samyagastena bhārata /
pāṇḍavo vyakiratkarṇaṃ bhīmo bhīmaparākramaḥ //

tatrāpaśyaṃstava sutā bhīmasenasya vikramam /
supuṅkhaiḥ kaṅkavāsobhiryatkarṇaṃ chādayañśaraiḥ //

sa nandayanraṇe pārthaṃ keśavaṃ ca yaśasvinam /
sātyakiṃ cakrarakṣau ca bhīmaḥ karṇamayodhayat //

vikramaṃ bhujayorvīryaṃ dhairyaṃ ca viditātmanaḥ /
putrāstava mahārāja dṛṣṭvā vimanaso'bhavan //