Mahabharata · Chapter 7.133

atyadbhutamahaṃ manye bhīmasenasya vikramam /
yatkarṇaṃ yodhayāmāsa samare laghuvikramaḥ //

tridaśānapi vā yuktānsarvaśastradharānyudhi /
vārayedyo raṇe karṇaḥ sayakṣāsuramānuṣān //

sa kathaṃ pāṇḍavaṃ yuddhe bhrājamānamiva śriyā /
nātaratsaṃyuge tāta tanmamācakṣva sañjaya //

kathaṃ ca yuddhaṃ sambhūtaṃ tayoḥ prāṇadurodare /
atra manye samāyatto jayo vā'jaya eva ca //

karṇaṃ prāpya raṇe sūta mama putraḥ suyodhanaḥ /
jetumutsahate pārthānsagovindānsasātvatān //

śrutvā tu nirjitaṃ karṇamasakṛdbhīmakarmaṇā /
bhīmasenena samare moha āviśatīva mām //

vinaṣṭānkauravānmanye mama putrasya durnayaiḥ /
nahi karṇo maheṣvāsānpārthāñjeṣyati sañjaya //

kṛtavānyāni yuddhāni karṇaḥ pāṇḍusutaiḥ saha /
sarvatra pāṇḍavāḥ karṇamajayaṃste raṇājire //

ajeyāḥ pāṇḍavāstāta devairapi savāsavaiḥ /
na ca tadbudhyate mandaḥ putro duryodhano mama //

dhanaṃ dhaneśvarasyeva hṛtvā pārthasya me sutaḥ /
madhuprepsurivābuddhiḥ prapātaṃ nāvabudhyate //

nikṛtyā nikṛtiprajño rājyaṃ hṛtvā mahātmanām /
jitamityeva manvānaḥ pāṇḍavānavamanyate //

putrasnehābhibhūtena mayā cāpyakṛtātmanā /
dharme sthitā mahātmāno nikṛtāḥ pāṇḍunandanāḥ //

śamakāmaḥ sasodaryo dīrghaprekṣī yudhiṣṭhiraḥ /
aśakta iti matvā tu mama putrairnirākṛtaḥ //

tāni duḥkhānyanekāni viprakārāṃśca sarvaśaḥ /
hṛdi kṛtvā mahābāhurbhīmo'yudhyata sūtajam //

tasmānme sañjaya brūhi karṇabhīmau yathā raṇe /
ayudhyetāṃ yudhāṃśreṣṭhau parasparavadhaiṣiṇau //
sañjaya uvāca /

śṛṇu rājanyathāvṛttaṃ saṅgrāmaṃ karṇabhīmayoḥ /
parasparavadhaprepsvorvanakuñjarayoriva //

rājanvaikartano bhīmaṃ kruddhaḥ kruddhamarindamam /
parākrāntaṃ parākramya vivyādha triṃśatā śaraiḥ //

mahāvegaiḥ prasannāgraiḥ śātakumbhapariṣkṛtaiḥ /
nātaradbharataśreṣṭha bhīmaṃ vaikartanaḥ śaraiḥ //

tasyāsyato dhanurbhīmaścakarta viśikhaistribhiḥ /
rathanīḍācca yantāraṃ bhallenāpātayatkṣitau //

sa kāṅkṣanbhīmasenasya vadhaṃ vaikartano bhṛśam /
śaktiṃ kanakavaidūryacitradaṇḍāṃ parāmṛśat //

pragṛhya ca mahāśaktiṃ kālarātrimivāparām / samutkṣipya ca rādheyaḥ sandhāya ca mahābalaḥ /
cikṣepa bhīmasenāya jīvitāntakarīmiva //

śaktiṃ visṛjya rādheyaḥ purandara ivāśanim /
nanāda sumahānādaṃ balavānsūtanandanaḥ //

taṃ ca nādaṃ tataḥ śrutvā putrāste harṣitā'bhavan //

śaktiṃ viyati ciccheda bhīmaḥ saptabhirāśugaiḥ //

chittvā śaktiṃ tato bhīmo nirmuktoragasannibhām /
mārgamāṇāmiva prāṇānsūtaputrasya māriṣa //

prāhiṇotkṛtasaṃrambhaḥ śarānbarhiṇavāsasaḥ /
svarṇapuṅkhāñśilādhautānyamadaṇḍopamānmṛdhe //

karṇo'pyanyaddhanurgṛhya hemapṛṣṭhaṃ durāsadam /
vikṛṣya tanmahaccāpaṃ vyasṛjatsāyakāṃstadā //

tānpāṇḍuputraściccheda navabhirnataparvabhiḥ / vasuṣeṇena nirmuktānnava rājanmahāśarān /
chittvā bhīmo mahārāja nādaṃ siṃha ivānadat //

tau vṛṣāviva nardantau balinau vāsitāntare /
śārdūlāviva cānyonyamāmiṣārthe'bhyagarjatām //

anyonyaṃ prajihīrṣantāvanyonyasyāntaraiṣiṇau /
anyonyamabhivīkṣantau goṣṭheṣviva maharṣabhau //

mahāgajāvivasādya viṣāṇāgraiḥ parasparam /
śaraiḥ pūrṇāyatotsṛṣṭairanyonyamabhijaghnatuḥ //

nirdahantau mahārāja śastravṛṣṭyā parasparam /
anyonyamabhivīkṣantau kopādvivṛtalocanau //

prahasantau tathā'nyonyaṃ bhartsayantau muhurmuhuḥ /
śaṅkhaśabdaṃ ca kurvāṇau yuyudhāte parasparam //

tasya bhīmaḥ punaścāpaṃ muṣṭau ciccheda māriṣa / śaṅkhavarṇāṃśca tānaśvānbāṇairninye yamakṣayam /
sārathiṃ ca tathāpyasya rathanīḍādapātayat //

tato vaikartanaḥ karṇaścintāṃ prāpa duratyayām / sa cchādyamānaḥ samare hatāśvo hatasārathiḥ /
mohitaḥ śarajālena kartavyaṃ nābhyapadyata //

tathā kṛcchragataṃ dṛṣṭvā karṇaṃ duryodhano nṛpaḥ /
vepamāna iva krodhādvyādideśātha durjayam //

gaccha durjaya rādheyaṃ purā grasati pāṇḍavaḥ /
jahi tūbarakaṃ kṣipraṃ karṇasya balamādadhat //

evamuktastathetyuktvā tava putraṃ tavātmajaḥ /
abhyadravadbhīmasenaṃ vyāsaktaṃ vikirañcharaiḥ //

sa bhīmaṃ navabhirbāṇairaśvānaṣṭabhirārdayat /
ṣaṅbhiḥ sūtaṃ tribhiḥ ketaṃ punastaṃ cāpi saptabhiḥ //

bhīmaseno'pi saṅkruddhaḥ sāśvayantāramāśugaiḥ /
durjayaṃ bhinnamarmāṇamanayadyamasādanam //

bāḍhaṃ hataṃ kṣitau kṣuṇṇaṃ veṣṭamānaṃ yathoragam /
rudannārtastava sutaṃ karṇaścakre pradakṣiṇam //

sa tu taṃ virathaṃ kṛtvā smayannatyantavairiṇam /
samācinodbāṇagaṇaiḥ śataghnībhiśca śaṅkubhiḥ //

tathāpyatirathaḥ karṇo bhidyamāno'sya sāyakaiḥ /
na jahau samare bhīmaṃ kruddharūpaṃ parantapaḥ //