Mahabharata · Chapter 7.130

tasminvilulite sainye saindhavāyārjune gate / sātvate bhīmasene ca putraste droṇamabhyayāt /
tvarannekarathenaiva bahu kṛtyaṃ vicintayan //

sa rathastava putrasya tvarayā parayā yutaḥ /
tūrṇamabhyadravaddroṇaṃ manomārutavegavān //

iha dṛṣṭa ito naṣṭaḥ sarathaḥ prādravannṛpaḥ / muhūrtādiva putraste droṇamāsādya māriṣa /
sasambhramāmidaṃ vākyamabravītkuranandanaḥ //

arjuno bhīmasenaśca sātyakiścāparājitaḥ /
vijitya sarvasainyāni sumahānti mahārathāḥ //

samprāptāḥ sindhurājasya samīpamanivāritāḥ /
vyāyacchanti ca tatrāpi sarva evāparājitāḥ //

yadi tāvadraṇe pārtho vyatikrānto mahārathaḥ /
kathaṃ sātyakibhīmābhyāṃ vyatikrānto'si mānada //

āścaryabhūto loke'sminsamudrasyeva śoṣaṇam / nirjayastava viprāgrya sātvatenārjunena ca /
tathaiva bhīmasenena lokaḥ saṃvadate bhṛśam //

kathaṃ droṇo jitaḥ saṅkhye dhanurvedasya pāragaḥ /
ityevaṃ bruvate yodhā aśraddheyamidaṃ tava //

nāśa eva tu me nūnaṃ mandabhāgyasya saṃyuge /
yatra tvāṃ puruṣavyāghraṃ vyatikrāntāstrayo rathāḥ //
droṇa uvāca /

evaṃ gate tu kṛtye'sminbrūhi yatte vivakṣitam /
yadgataṃ gatamevedaṃ śeṣaṃ cintaya mānada //
duryodhana uvāca /

yatkṛtyaṃ sindhurājasya prāptakālamanantaram /
tatsaṃvidhīyatāṃ kṣipraṃ sādhu sañcintya no dvija //
droṇa uvāca /

cintyaṃ bahuvidhaṃ tāta yatkṛtyaṃ tacchṛṇuṣva me /
trayo hi samatikrāntāḥ pāṇḍavānāṃ mahārathāḥ //

yāvatteṣāṃ bhayaṃ paścāttāvadeṣāṃ puraḥsaram /
tadgarīyastaraṃ manye yatra kṛṣṇadhanañjayau //

sā purastācca paścācca gṛhītā bhāratī camūḥ /
tatra kṛtyamahaṃ manye saindhavasyābhirakṣaṇam //

sa no rakṣyatamastāta kruddhādbhīto dhanañjayāt /
gatau ca saindhavaṃ bhīmau yuyudhānavṛkodarau //

samprāptaṃ tadidaṃ dyūtaṃ yattacchakunibuddhijam / na sabhāyāṃ jayo vṛtto nāpi tatra parājayaḥ /
iha no glahamānānāmadya tāvajjayājayau //

yānsma tānglahate ghorāñchakuniḥ kurusaṃsadi /
akṣānsa manyamānaḥ prākśarāste hi durāsadāḥ //

yatra te bahavastāta kauraveyā vyavasthitāḥ / sennāṃ durodaraṃ viddhi śarānakṣānviśāmpate /
glahaṃ ca saindhavaṃ rājaṃstatra dyūtasya niścayaḥ //

saindhave tu mahaddyūnta samāsaktaṃ paraiḥ saha /
atra te dhruvamāyatto jayo vā'jaya eva vā //

atra sarve mahārāja tyaktvā jīvitamātmanaḥ / saindhavasya raṇe rakṣāṃ vidhivatkartumarhatha /
tatra no glahamānānāṃ dhruvau jayaparājayau //

yatra te parameṣvāsā yattā rakṣanti saindhavam /
tatra gaccha svayaṃ śīghraṃ tāṃśca rakṣasva rakṣiṇaḥ //

ihaiva tvahamāsiṣye preṣayiṣyāmi cāparān /
nirotsyāmi ca pāñcālānsahitānpāṇḍusṛñjayaiḥ //
sañjaya uvāca /

tato duryodhano'gacchattūrṇamācāryaśāsanāt /
udyamyātmānamugrāya karmaṇe sa padānugaḥ //

cakrarakṣau tu pāñcālyau yudhāmanyūttamaujasau /
bāhyena senāmabhyetya jagmatuḥ savyasācinam //

yau tu pūrvaṃ mahārāja vāritau kṛtavarmaṇā /
praviṣṭe tvarjune rājaṃstava sainyaṃ yuyutsayā //

pārśve bhittvā camūṃ vīrau praviṣṭau tava vāhinīm /
pārśvena sainyamāyāntau kururājo dadarśa ha //

tābhyāṃ duryodhanaḥ sārdhamakarotsaṅkhyamuttamam /
tvaritastvaramāṇābhyāṃ bhrātṛbhyāṃ bhārato balī //

tāvenamabhyadravatāmubhāvudyatakārmukau /
mahārathasamākhyātau kṣatriyapravarau yudhi //

tamavidhyadyudhāmanyustriṃśatā kaṅkapatribhiḥ /
viṃśatyā sārathiṃ cāsya caturbhiścaturo hayān //

duryodhano yudhāmanyordhvajamekeṣuṇā'cchinat /
ekena kārmukaṃ cāsya cakarta tanayastava //

sārathiṃ cāsya bhallena rathanīḍādapāharat /
tato'vidhyaccharaistīkṣṇaiścaturbhiścaturo hayān //

yudhāmanyuśca saṅkruddhaḥ sarāṃstriṃśatamāhave /
vyasṛjattava putrasya tvaramāṇaḥ stanāntare //

tathottamaujāḥ saṅkruddhaḥ śarairhemavibhūṣitaiḥ /
avidhyatsārathiṃ cāsya prāhiṇodyamasādanam //

duryodhano'pi rājendra pāñcālyasyauttamaujasaḥ /
jaghāna caturo'syāścānubhau tau pārṣṇisārathī //

uttamaujā hatāśvastu hatasūtaśca saṃyuge /
āruroha rathaṃ bhrāturyudhāmanyorabhitvaran //

sa rathaṃ prāpya taṃ bhrāturduryodhanahayāñśaraiḥ /
bahubhistāḍayāmāsa te hatāḥ prāpatanbhuvi //

hayeṣu patiteṣvasya ciccheda parameṣuṇā / yudhāmanyurdhanuḥ śīghraṃ śarāvāpaṃ ca saṃyuge /
avidhyatsārathiṃ cāsya prāhiṇodyamasādanam //

hatāśvasūtātsarathādavatīrya narādhipaḥ /
gadāmādāya te putraḥ pāñcalyāvabhyadhāvata //

tamāpatantaṃ samprekṣya kruddhaṃ kurupatiṃ tadā /
avaplutau rathopasthādyudhāmanyūttamaujasau //

tataḥ sa hemacitraṃ taṃ gadayā syandanaṃ gatī /
saṅkruddhaḥ pothayāmāsa sāśvasūtadhvajaṃ nṛpa //

etadīdṛśakaṃ putrastavākārṣījjanādhipa /
gadayā gadināṃ śreṣṭhaḥ sarvalokamahārathaḥ //

bhaṅktvā rathaṃ sa putraste hatāśvo hatasārathiḥ /
madrarājarathaṃ tūrṇamāruroha parantapaḥ //

pāñcālānāṃ tato mukhyau rājaputrau mahārathau /
rathāvanyau samāruhya bībhatsumabhijagmutaḥ //