Mahabharata · Chapter 7.129

ninadantaṃ tathā taṃ tu bhīmasenaṃ mahābalam /
meghastanitanirghoṣaṃ ke vīrāḥ paryavārayan //

na hi paśyāmyahaṃ taṃ vai triṣu lokeṣu kañcana /
kruddhasya bhīmasenasya yastiṣṭhedagrato raṇe //

gadāṃ yuyutsamānasya kālasyeveha sañcaya /
na hi paśyāmyahaṃ yuddhe yastiṣṭhedagrataḥ pumān //

rathaṃ rathena yo hanyātkuñjaraṃ kuñcareṇa ca /
kastasya samare sthātā sākṣādapi purandaraḥ //

kruddhasya bhīmasenasya mama putrāñjighāṃsataḥ /
duryodhanahite yuktāḥ samatiṣṭhanta ke'grataḥ //

bhīmasenadavāgnestu mama putrāṃstṛṇolapam /
pradhakṣyato raṇamukhe ke'tiṣṭhannagrato narāḥ //

kālyamānāṃstu putrānme dṛṣṭvā bhīmasya saṃyuge /
kāleneva prajāḥ sarvāḥ ke bhīmaṃ paryavārayan //

na me'rjunādbhayaṃ tādṛkkṛṣṇānnāpi ca sātvatāt /
hutabhugjanmano naiva yādṛgbhīmādbhayaṃ mama //

bhīmavahneḥ pradīptasya mama putrāndidhakṣataḥ /
ke śūrāḥ paryavartanta tanmamācakṣva sañjaya //
sañcaya uvāca /

tathā tu nardamānaṃ taṃ bhīmasenaṃ mahābalam /
tumulenaiva śabdena karṇo'pyabhyadravadbalī //

vyākṣipansumahaccāpamatimātramamarṣaṇaḥ /
karṇaḥ suyuddhamākāṅkṣandarśayiṣyanbalaṃ mṛdhe //

rurodha mārgaṃ bhīmasya vātasyeva mahīruhaḥ /
bhīmo'pi dṛṣṭvā sāvegaṃ puro vaikartanaṃ sthitam //

cukopa balavadvīraścikṣepāsya śilāśitān /
tānpratyagṛhṇātkarṇo'pi pratīpaṃ prāpayaccharān //

tatastu sarvayodhānāṃ yatanāṃ prekṣatāṃ tadā /
prāvepanniva gātrāṇi karṇabhīmasamāgame //

rathināṃ sādināṃ caiva tayoḥ śrutvā talasvanam /
bhīmasenasya ninadaṃ śrutvā ghoraṃ raṇājire //

khaṃ ca bhūmiṃ ca saṃruddhāṃ menire kṣatriyarṣabhāḥ /
punarghoreṇa nādena pāṇḍavasya mahātmanaḥ //

samare sarvayodhānāṃ dhanūṃṣyabhyapatankṣitau /
śastrāṇi nyapatandorbhyaḥ keṣāñciccāsavo'dravan //

vitrastāni ca sarvāṇi śakṛnmūtraṃ prasusruvuḥ /
vāhanāni ca sarvāṇi babhūvurvimanāṃsi ca //

prādurāsannimittāni ghorāṇi subahūnyuta /
gṛdhrakaṅkabalaiścāsīdantarikṣaṃ samāvṛtam //

tasminsutumule rājankarṇabhīmasamāgame /
tataḥ karṇastu viṃśatyā śarāṇāṃ bhīmamārdayat //

vivyādha cāsya tvaritaḥ sūtaṃ pañcabhirāśugaiḥ /
prahasya bhīmaseno'pi karṇaṃ pratyādravadraṇe //

sāyakānāṃ catuḥ ṣaṣṭyā kṣiprakārī mahāyaśāḥ /
tasya karṇo maheṣvāsaḥ sāyakāṃścaturo'kṣipat //

asamprāptāṃśca tānbhīmaḥ sāyakairnataparvabhiḥ /
ciccheda bahudhā rājandarśayanpāṇilāghavam //

taṃ karṇaścādayāmāsa śaravrātairanekaśaḥ /
sañchādyamānaḥ karṇena bahudhā pāṇ़ḍunandanaḥ //

ciccheda cāpaṃ karṇasya muṣṭideśe mahārathaḥ /
vivyādha cainaṃ bahubhiḥ sāyakairnataparvabhiḥ //

athānyaddhanurādāya sañyaṃ kṛtvā ca sūtajaḥ /
vivyādha samare bhīmaṃ bhīmakarmā mahārathaḥ //

tasya bīmo bhṛśaṃ kruddhastrīñśarānnataparvaṇaḥ /
nicakhānorasi kruddhaḥ sūtaputrasya vegataḥ //

taiḥ karṇo'rājata śarairuromadhyagataiḥ sadā /
mahīdhara ivodagrastriśṛṅgo bharatarṣabha //

susrāva cāsya rudhiraṃ viddhasya parameṣubhiḥ /
dhātuprasyandinaḥ śailādyathā gairikadhātavaḥ //

kiñcidvicalitaḥ karṇaḥ suprahārābhipīḍitaḥ /
ākarṇapūrṇamākṛṣya bhīmaṃ vivyādha sāyakaiḥ //

cikṣepa ca punarbāṇāñśataśo'tha sahasraśaḥ / sa śarairarditastena karṇena dṛḍhadhanvinā /
dhanurjyāmacchinattūrṇaṃ bhīmastasya kṣureṇa ha //

sārathiṃ cāsya bhallena rathanīḍādapātayat /
vāhāṃśca caturastasya vyasūṃścakre mahārathaḥ //

hatāśvāttu rathātkarṇaḥ samāplutya viśāmpate /
syandanaṃ vṛṣasenasya tūrṇamāpupluve bhayāt //

nirjitya tu raṇe karṇaṃ bhīmasenaḥ pratāpavān /
nanāda balavānnādaṃ parjanyaninadopamam //

tasya taṃ ninadaṃ śrutvā prahṛṣṭo'bhūdyudhiṣṭhiraḥ /
karṇaṃ parājitaṃ matvā bhīmasenena saṃyuge //

samantācchaṅkhaninadaṃ pāṇḍusenā'karottadā /
śatrusenādhvaniṃ śrutvā tāvakā hyanadanbhṛśam //

sa śaṅkhabāṇaninadairharṣādrājā svavāhinīm /
cakre yudhiṣṭhiraḥ saṅkhye harṣanādaiśca saṅkulām //
gāṇḍīvaṃ vyākṣipatpārthaḥ kṛṣṇo'pyabjamavādayat

tamantardhāya ninadaṃ bhīmasya nadato dhvaniḥ /
aśrūyata tadā rājansarvasainyeṣu dāruṇaḥ //

tato vyāyacchatāmastraiḥ pṛthakpṛthagajihmagaiḥ /
mṛdupūrvaṃ tu rādheyo dṛḍhapūrvaṃ tu pāṇḍavaḥ //

bhīmo'pi ca mahārāja vaikartanamupādravat /
āsure tu mahāsainye tārakaṃ pāvakiryathā //

tayorevaṃ mahadyuddhamabhavadbhīmakarṇayoḥ /
taṃ bhīmaseno mahatā śaravarṣeṇa vārayan //

vivyādha sārathiṃ cāsya hayāṃśca caturaḥ śaraiḥ / dhvajaṃ cāsya patākāṃ ca bhallaiḥ sannataparvabhiḥ /
rathaṃ ca cakrarakṣau ca bhīmaściccheda māriṣa //

karṇo'pi rathināṃ śreṣṭho bhīmasenena kampitaḥ /
khaṅgacarmadharo rājanbhīmamabhyadravadbalī //

bhīmaściccheda khaṅgaṃ ca carmaṇā saha māriṣa //

dṛṣṭvā karṇaṃ ca pārthena bādhitaṃ bahubhiḥ śaraiḥ / duryodhano mahārāja duśśalaṃ pratyabhāṣata / karṇaṃ kṛcchragataṃ paśya śīghraṃ yānaṃ prayacchaha //
sañjaya uvāca /

evamuktastato rājñā duśśalaḥ samupādravat /
duśśalasya rathaṃ karṇaścāruroha mahārathaḥ //

tau pārthaḥ sahasā gatvā vivyādha daśabhiḥ śaraiḥ /
punaśca karṇaṃ viddhvā'pi duśśalasya śiro'harat //

duśśalaṃ nihataṃ dṛṣṭvā bhīmasenena māriṣa /
tasyaiva dhanurādāya karṇo vivyādha pāṇḍavam //

anyonyaṃ samare vīrau yuyudhāte mahābalau /
śatrughnau śatrumadhye tu balavajrabhṛtāviva //

bhīmo viddhā hayāṃścaiva sārathiṃ ca punaḥ punaḥ /
karṇamabhyadravatpārthaḥ prahasaṃśca mahābalaḥ //

tato vyāyacchamānasya bhīmasenasya saṃyuge /
tatsainyaṃ kalilībhūtaṃ na prājñāyata kiñcana //