Mahabharata · Chapter 7.131

vartamāne mahārāja saṅgrāme romaharṣaṇe /
vyākuleṣu ca sarveṣu pīḍyamāneṣu sarvaśaḥ //

rādheyo bhīmamānarccha yuddhāya bharatarṣabha /
yathā nāgo vane nāgaṃ matto mattamabhidravet //

tato vyāyacchatāmastraiḥ pṛthakpṛthagarindamau /
mṛdupūrvaṃ ca rādheyo dṛḍhapūrvaṃ ca pāṇḍavaḥ //
dhṛtarāṣṭra uvāca /

yau tau karṇaśca bhīmaśca samprayuddhau mahābalau /
arjunasya rathopānte kīdṛśaḥ so'bhavadraṇaḥ //

pūrvaṃ hi nirjitaḥ karṇo bhīmasenena saṃyuge /
kathaṃ bhūyaḥ sa rādheyo bhīmamāgānmahārathaḥ //

bhīmo vā sūtatanayaṃ pratyudyātaḥ kathaṃ raṇe /
mahārathasamākhyātaṃ pṛthivyāṃ pravaraṃ ratham //

bhīṣmadroṇāvatikramya dharmarājo yudhiṣṭhiraḥ /
nānyato bhayamādatta vinā karṇānmahārathāt //

bhayādyasya mahābāho na śete bahulāḥ samāḥ / cintayannityaśo vīryaṃ rādheyasya mahātmanaḥ /
taṃ kathaṃ sūtaputraṃ tu bhīmo'yodhayatāhave //

brahmaṇyaṃ vīryasampannaṃ samareṣvanivartinam /
kathaṃ karṇaṃ yudhāṃ śreṣṭhaṃ yodhayāmāsa pāṇḍavaḥ //

yau tau samīyaturvīrau vaikartanavṛkodarau /
kathaṃ tāvatra yudhyetāṃ mahābalaparākramau //

bhrātṛtvaṃ darśitaṃ pūrvaṃ ghṛṇī cāpi sa sūtajaḥ /
kathaṃ bhīmena yuyudhe kuntyā vākyamanusmaran //

bhīmo vā sūtaputreṇa smaranvairaṃ purā kṛtam /
ayudhyata kathaṃ śūraḥ karṇena saha saṃyuge //

āśāste ca sadā sūtaputre duryodhano mama /
karṇo jeṣyati saṅgrāme samastānpāṇḍavāniti //

jayāśā yatra putrasya mama mandasya saṃyuge /
sa kathaṃ bhīmakarmāṇaṃ bhīmasenamayodhayat //

yaṃ samāsādya putrairme kṛtaṃ vairaṃ mahārathaiḥ /
taṃ sūtatanayaṃ tāta kathaṃ bhīmo hyayodhayat //

anekānviprakārāṃśca sūtaputrasamudbhavān /
smaramāṇaḥ kathaṃ bhīmo yuyudhe sūtasūnunā //

yo'jayatpṛthivīṃ sarvāṃ rathenaikena vīryavān /
taṃ sūtatanayaṃ yuddhe kathaṃ bhīmo hyayodhayat //

yo jātaḥ kuṇḍalābhyāṃ ca kavacena sahaiva ca /
taṃ sūtaputraṃ samare bhīmaḥ kathamayodhayat //

astrahetoḥ purā tāta bhārgavaṃ samapūjayat /
tasya prasādādbrahmāstraṃ labdhavāṃśca bhṛgūttamāt //

yathā tayoryuddhamabhūdyaścāsīdvijayī tayoḥ /
tanmamācakṣva tattvena kuśalo hyasi sañjaya //
sañcaya uvāca /

bhīmasenastu rādheyamutsṛjya rathināṃ varam /
iyeṣa gantuṃ yatrāstāṃ vīrau kṛṣṇadhanañcayau //

taṃ prayāntamabhidrutya rādheyaḥ kaṅkapatribhiḥ /
abhyavarṣanmahārāja megho vṛṣṭyeva parvatam //

phullatā paṅkajeneva vaktreṇa vihasanbalī /
ājuhāva raṇe yāntaṃ bhīmamādhirathistadā //

karṇa uvāca / bhīmāhitaistava raṇaḥ svapne'pi na vibhāvitaḥ /

taddarśayasi kasmānme pṛṣṭhaṃ pārthadidṛkṣayā // kuntyāḥ putrasya sadṛśaṃ nedaṃ pāṇḍavanandana /

tena māmabhitaḥ sthitvā śaravarṣairavākira //
sañjaya uvāca /
bhīmasenastadāhvānaṃ karṇānnāmarṣayadyudhi /
ardhamaṇḍalamāvṛtya sūtaputramayodhayat //

avakragāmibhirbāṇairabhyavarṣanmahāyaśāḥ /
daṃśitaṃ dvairathe yattaṃ sarvaśastraviśāradam //

vidhitsuḥ kalahasyāntaṃ jighāṃsuḥ karṇamakṣiṇot //

hatvā tasyānugāṃstaṃ ca hantukāmo mahābalaḥ / tasmai vyasṛjadugrāṇi vividhāni parantapaḥ /
amarṣātpāṇḍavaḥ kruddhaḥ śaravarṣāṇi māriṣa //

tasya tānīṣuvarṣāṇi mattadviradagāminaḥ /
sūtaputro'stramāyābhiragrasatparamāstravit //

sa yathāvanmahābāhurvidyayā vai supūjitaḥ /
ācāryavanmaheṣvāsaḥ karṇaḥ paryacaradbalī //

yudhyamānaṃ tu saṃrambhādbhīmasenaṃ hasanniva /
abhyapadyata kaunteyaṃ karṇo rājanvṛkodaram //

tannāmṛṣyata kaunteyaḥ karṇasya smitamāhave /
yudhyamāneṣu vīreṣu paśyatsu ca samantataḥ //

taṃ bhīmasenaḥ saṅgrāptaṃ vatsadantaiḥ stanāntare /
vivyādha balavānkruddhastotrairiva mahādvipam //

punaśca sūtaputraṃ tu svarṇapuṅkhaiḥ śilāśitaiḥ /
sumuktaiścitravarmāṇaṃ nirbibheda trisaptabhiḥ //

karṇo jāmbūnadairjālaiḥ sañchannānvātaraṃhasaḥ /
hayānvivyādha bhīmasya pañcabhiḥ pañcabhiḥ śaraiḥ //

tato bāṇamayaṃ jalaṃ bhīmasenarathaṃ prati /
karṇena vihitaṃ rājannimeṣārdhādadṛśyata //

sarathaḥ sadhvajastatra sasūtaḥ pāṇḍavastadā /
prācchādyata mahārāja karṇacāpacyutaiḥ śaraiḥ //

tasya karṇaścatuḥṣaṣṭyā vyadhamatkavacaṃ dṛḍham /
kruddhaścāpyahanatpārthaṃ nārācairmarmabhedibhiḥ //

tato'cintya mahābāhuḥ karṇakārmukaniḥsṛtān /
samāśliṣyadasambhrāntaḥ sūtaputraṃ vṛkodaraḥ //

sa karṇacāpaprabhavāniṣūnāśīviṣopamān /
bibhradbhīmo mahārāja na jagāma vyathāṃ raṇe //

tato dvātriṃśatā bhallairniśitaistigmatejanaiḥ /
vivyādha samare karṇaṃ bhīmasenaḥ pratāpavān //

ayatnenaiva taṃ karṇaḥ śarairbhṛśamavākirat /
bhīmasenaṃ mahābāhuṃ saindhavasya vadhaiṣiṇam //

mṛdupūrvaṃ tu rādheyo bhīmamājāvayodhayat /
krodhapūrvaṃ tathā bhīmaḥ pūrvavairamanusmaran //

taṃ bhīmaseno nāmṛṣyadavamānamamarṣaṇaḥ /
sa tasmai vyasṛjattūrṇaṃ śaravarṣamamitrahā //

te śarāḥ preṣitāstena bhīmasenena saṃyuge /
nipetuḥ sarvato vīre kūjanta iva pakṣiṇaḥ //

hemapuṅkhā mahāvegā bhīmasenadhanuścyutāḥ /
prācchādayaṃste rādheyaṃ śalabhā iva pāvakam //

karṇastu rathināṃ śreṣṭhaśchādyamānaḥ samantataḥ /
rājanvyasṛjadugrāṇi śaravarṣāṇi bhārata //

tasya tānaśaniprakhyāniṣūnsamaraśobhinaḥ /
ciccheda bahubhirbhallairasamprāptānvṛkodaraḥ //

punaśca śaravarṣeṇa cchādayāmāsa bhārata /
karṇo vaikartano yuddhe bhīmasenamarindamaḥ //

tatra bhārata bhīmaṃ tu dṛṣṭavantaḥ sma sāyakaiḥ /
samācitatanuṃ saṅ्khye śvāvidhaṃ śalalairiva //

hemapuṅkhāñchilādhautānkarṇacāpacyutāñcharān /
dadhāra samare vīraḥ svaraśmīniva raśmimān //

rudhirokṣitasarvāṅgo bhīmaseno vyarājata /
samṛddhakusumāpīḍo vasante'śokavṛkṣavat //

tattu bhīmo mahābāhoḥ karṇasya caritaṃ raṇe /
nāmṛṣyata mahābāhuḥ krodhādudvṛttalocanaḥ //

sa karṇaṃ pañcaviṃśatyā nārācānāṃ samārpayat /
mahīdharamiva śvetaṃ gūḍhapādairviṣolbaṇaiḥ //

punareva ca vivyādha ṣaṅbhiraṣṭābhireva ca /
marmasvamaravikrāntaḥ sūtaputraṃ tanutyajam //

punaranyena bāṇena bhīmasenaḥ pratāpavān /
ciccheda kārmukaṃ tūrṇaṃ karṇasya prahasanniva //

jaghāna caturaścāśvānsūtaṃ ca tvaritaḥ śaraiḥ /
nārācairarkaraśmyābhaiḥ karṇaṃ vivyādha corasi //

te jagmurdharaṇīmāśu karṇaṃ nirbhidya patriṇaḥ /
yathā jaladharaṃ bhittvā divākaramarīcayaḥ //

sa vaiklavyaṃ mahatprāpya cchinnadhanvā śarāhataḥ / tathā puruṣamānī sa lajjāmutsṛjya bhārata /
bhīmasenabhayātkarṇaḥ pratyapāyādrathāntaram //