Mahabharata · Chapter 7.128

samuttīrṇaṃ rathānīkaṃ pāṇḍavaṃ vihasanraṇe /
vivārayiṣurācāryaḥ śaravarṣairavākirat //

pibanniva śaraughāṃstāndroṇacāpaparicyutān /
so'bhyadravata sodaryānmohayanbalamāyayā //

taṃ mṛdhe vegamāsthāya paraṃ paramadhanvinaḥ /
coditāstava putraiśca sarvataḥ paryavārayan //

sa taistu saṃvṛto bhīmaḥ krodhena pradahanniva / udyacchansa gadāṃ tebhyaḥ sughorāṃ siṃhavannadan /
avāsṛjacca vegena śatrupakṣavināśinīm //

indrāśanirivendreṇa praviddhā saṃhatātmanā /
prāmathnātsā mahārāja sainikāṃstava saṃyuge //

ghoṣeṇa mahatā rājanpūrayantīva medinīm /
jvalantī tejasā bhīmā trāsayāmāsa te sutān //

tāṃ patantīṃ mahāvegāṃ dṛṣṭvā tejobhisaṃvṛtām /
prādravaṃstāvakāḥ sarve nadanto bairavānravān //

siṃhanādamasahyaṃ hi śrutvā bhīmasya saṃyuge /
prāpatanmunujāstrastā rathebhyo rathinastadā //

te hanyamānā bhīmena gadāhastena tāvakāḥ /
prādravanta raṇe bhītā vyāghraghrātā mṛgā iva //

sa tānvidrāvya kaunteyaḥ saṅkhye'mitrāndurāsadān /
suparṇa iva vegena pakṣirāḍatyagāccamūm //

tathā tu viprakurvāṇaṃ rathayūthapayūthapam /
bhāradvājo mahārāja bhīmasenaṃ samabhyayāt //

bhīmaṃ tu samare droṇo vārayitvā śarormibhiḥ /
akarotsahasā nādaṃ ṣāṇḍūnāṃ bhayamādadhat //

tadyuddhamāsītsumahaddhoraṃ devāsuropamam /
droṇasya ca mahārāja bhīmasya ca mahātmanaḥ //

yadā tu viśikhaistīkṣṇairdroṇacāpaviniḥsṛtaiḥ /
vadhyante samare vīrāḥ śataśo'tha sahasraśaḥ //

tato rathādavaplutya vegamāsthāya pāṇḍavaḥ /
nimīlya nayane rājanpadātirdroṇamabhyayāt //

aṃse śiro bhīmasenaḥ karau kṛtvorasi sthirau /
vegamāsthāya balavānmanonilagarutmatām //

yathā hi govṛṣo varṣaṃ pratigṛhṇāti līlayā /
tathā bhīmo naravyāghraḥ śaravarṣaṃ samagrahīt //

sa vadhyamānaḥ samare rathaṃ droṇasya māriṣa /
īṣāyāṃ pāṇinā gṛhya pracikṣepa mahābalaḥ //

droṇastu satvaro rājankṣipto bhīmena saṃyuge / dadṛśe tāvakairyodhairvismayotphullalocanaiḥ /
parihṛtya rathaṃ droṇaścūrṇitaṃ taṃ mahītale //

rathamanyaṃ samāruhya vyūhadvāraṃ yayau punaḥ /
tamāyāntaṃ tathā dṛṣṭvā bhagnotsāhaṃ guruṃ tadā //

gatvā vegātpunarbhīmo dhuraṃ gṛhya rathasya tu /
tamapyatirathaṃ bhīmaścikṣepa bhṛśaroṣitaḥ //

evamaṣṭau rathāḥ kṣiptā bhīmasenena līlayā //

vyadṛśyata nimeṣeṇa punaḥ svarathamāsthitaḥ /
dṛśyate tāvakairyodhairvismayotphullalocanaiḥ //

tasminkṣaṇe tasya yantā tūrṇamaśvānacodayat /
bhīmasenasya kauravya tadadbhutamivābhavat //

tataḥ svarathamāsthāya bhīmaseno mahābalaḥ /
abhyadravata vegena tava putrasya vāhinīm //

sa mṛdgankṣatriyānājau vāto vṛkṣānivoddhataḥ /
agacchaddārayansenāṃ sindhuvego nagāniva //

bhojānīkaṃ samāsādya hārdikyenābhirakṣitam /
pramathya tarasā vīrastadapyatibalo'bhyayāt //

santrāsayannanīkāni talaśabdena pāṇḍavaḥ /
ajayatsarvasainyāni śārdūla iva govṛṣān //

bhojānīkamatikramya daradānāṃ ca vāhinīm /
tathā mlecchagaṇānanyānbahūnyuddhaviśāradān //

sātyakiṃ caiva samprekṣya yudhyamānaṃ mahāratham /
rathena yattaḥ kaunteyo vegena prayayau tadā //

bhīmaseno mahārāja draṣṭukāmo dhanañjayam /
atītya samare yodhāṃstāvakānpāṇḍunandanaḥ //

so'paśyadarjunaṃ tatra yudhyamānaṃ mahāratham /
saindhavasya vadhārthaṃ hi parākrāntaṃ parākramī //

taṃ dṛṣṭvā puruṣavyāghraścukrośa mahato ravān /
prāvṛṭ्kāle mahārāja nardanniva balāhakaḥ //

taṃ tasya ninadaṃ ghoraṃ pārthaḥ śuśrāva nardataḥ /
vāsudevaśca kauravya bhīmasenasya saṃyuge //

tau śrutvā yugapadvīrau ninadaṃ tasya śuṣmiṇaḥ /
punaḥ punaḥ prāṇadatāṃ didṛkṣantau vṛkodaram //

tataḥ pārtho mahānādaṃ muñcanvai mādhavaśca ha /
abhyayātāṃ mahārāja nardantau govṛṣāviva //

bhīmasenaravaṃ śrutvā phalgunasya ca dhanvinaḥ /
aprīyata mahārāja dharmaputro yudhiṣṭhiraḥ //

viśokaścābhavadrājā śrutvā taṃ ninadaṃ tayoḥ /
dhanañjayasya samare jayamāśāstavānvibhiḥ //

tathā tu nardamāne vai bhīmasene madotkaṭe /
smitaṃ kṛtvā mahābāhurdharmaputro yudhiṣṭhiraḥ //

hṛdgataṃ manasā prāha dhyātvā dharmabhṛtāṃ varaḥ /
dattā bhīma tvayā saṃvitkṛtaṃ guruvacastathā //

na hi teṣāṃ jayo yuddhe yeṣāṃ dveṣṭā'si pāṇḍava /
diṣṭyā jīvati saṅgrame savyasācī dhanañjayaḥ //

diṣṭyā ca kuśalī vīraḥ sātyakiḥ satyavikramaḥ /
diṣṭyā śṛṇomi garjantau vāsudevadhanañjayau //

yena śakraṃ raṇe jitvā tarpito havyavāhanaḥ /
sa hantā dviṣatāṃ saṅkhye diṣṭyā jīvati phalgunaḥ //

yasya bāhubalaṃ sarve vayamāśritya jīvitāḥ /
sa hantā ri pusainyānāṃ diṣṭyā jīvati phalgunaḥ //

nivātakavacā yena devairapi sudurjayāḥ /
nirjitā dhanuṣaikena diṣṭyā pārthaḥ sa jīvati //

kauravānsahitānsarvāngograhārthe samāgatān /
yo'jayanmatsyanagare diṣṭyā pārthaḥ sa jīvati //

kālakeyasahasrāṇi caturdaśa mahāraṇe /
yo'vadhīdbhujavīryeṇa diṣṭyā pārthaḥ sa jīvati //

gandharvarājaṃ balinaṃ duryodhanakṛte ca vai /
jitavānyo'stravīryeṇa diṣṭyā pārthaḥ sa jīvati //

kirīṭamālī balavāñchetāśvaḥ kṛṣṇasārathiḥ /
mama priyaśca satataṃ diṣṭyā pārthaḥ sa jīvati //

putraśokābhisantaptaścikīrṣankarma duṣkaram / jayadrathavadhānveṣī pratijñāṃ kṛtavānhi yaḥ /
kaccitsa saindhavaṃ saṅkhye haniṣyati dhanañjayaḥ //

kaccittīrṇapratijñaṃ hi vāsudevena rakṣitam /
anastamita āditye sameṣyāmyahamarjunam //

kaccitsaindhavako rājā duryodhanahite rataḥ /
nandayiṣyatyamitrānhi phalgunena nipātitaḥ //

kaccidduryodhano rājā phalgunena nipātitam /
dṛṣṭvā saindhavakaṃ saṅkhye śamamasmāsu dhāsyati //

dṛṣṭvā vinihatānbhrātṝnbhīmasenena saṃyuge /
kaccidduryodhano mandaḥ śamamasmāsu yāsyati //

dṛṣṭvā cānyānmahāyodhānpātitāndharaṇītale /
kaccidduryodhano mandaḥ paścāttāpaṃ gamiṣyati //

śeṣasya rakṣaṇārthaṃ ca sandhāsyati suyodhanaḥ // evaṃ bahuvidhaṃ tasya rājñaścintayatastadā /

kṛpayā'bhiparītasya ghoraṃ yuddhamavartata //