Mahabharata · Chapter 7.127

brahmeśānendravaruṇānavahadyaḥ purā rathaḥ /
tamāsthāya gatau kṛṣṇau na tayorvidyate bhayam //

tavājñāṃ śirasā bibhradeṣa gacchāmi mā śucaḥ /
sametya tānnaravyāghrāstava dāsyāmi saṃvidam //
sañjaya uvāca /

etāvaduktvā prayayau paridāya yudhiṣṭhiram / dhṛṣṭadyumnāya balavānsuhṛdbhyaśca punaḥpunaḥ /
dhṛṣṭadyumnaṃ cedamāha bhīmaseno mahābalaḥ //

viditaṃ te mahābāho yathā droṇo mahārathaḥ /
grahaṇe dharmarājasya sarvopāyena vartate //

na ca me gamane kṛtyaṃ tādṛkpārṣata vidyate /
yādṛśaṃ rakṣaṇe rājñaḥ kāryamātyayikaṃ hi naḥ //

evamukto'smi pārthena prativaktuṃ na cotsahe /
prayāsye tatra yatrāsau mumūrṣuḥ saindhavaḥ sthitaḥ //

dharmarājasya vacane sthātavyamaviśaṅkayā /
yāsyāmi padavīṃ bhrātuḥ sātvatasya ca dhīmataḥ //

so'dya yatto raṇe rārthaṃ parirakṣa yudhiṣṭhiram /
etaddhi sarvakāryāṇāṃ paramaṃ kṛtsamāhave //

tamabravīnmahārāja dhṛṣṭadyumno vṛkodaram /
īpsitaṃ te kariṣyāmi gaccha pārthāvicārayan //

nāhatvā samare droṇo dhṛṣṭadyumnaṃ kathañcana /
nigrahaṃ dharmarājasya prakariṣyati saṃyuge //
sañjaya uvāca /

tato nikṣipya rājānaṃ dhṛṣṭadyumne ca pāṇḍavam /
abhivādya guruṃ jyeṣṭhaṃ prayayau yena phalgunaḥ //

pariṣvaktaśca kaunteyo dharmarājena mārutiḥ /
āghrātaśca tathā mūrdhni śrāvitaścāśiṣaḥ śubhāḥ //

[kṛtvā pradakṣiṇānviprānarcitāṃstuṣṭamānasān /
ālabhya maṅgalānyaṣṭau pītvā kairātakaṃ madhu //

dviguṇadraviṇo vīro madaraktāntalocanaḥ /
vipraiḥ kṛtasvastyayano vijayotpādasūcitaḥ //

paśyannevātmano buddhiṃ vijayānandakāriṇīm /
anulomānilaiścāśu pradarśitajayodayaḥ //

bhīmaseno mahābāhuḥ kavacī śubhakuṇḍalī / sagadaḥ satalatrāṇaḥ saśarī rathināṃ varaḥ /
rathamāruhya niryuktaṃ sarvopakaraṇānvitam //

tasya kārṣṇāyasaṃ varma hemacitraṃ maharddhimat /
vibabhau sarvataḥ śliṣṭaṃ savidyudiva toyadaḥ //

pītaraktāsitasitairvāsaubhiśca suveṣṭitaḥ /
kaṇṭhasūtreṇa vibabhau sendrāyudha ivāmbudaḥ //

prayāte bhīmasene tu tava sainyaṃ yuyutsayā /
pāñcajanyaravo ghoraḥ punarāsīdviśāmpate //

taṃ śrutvā ninadaṃ ghoraṃ trailokyatrāsanaṃ mahat /
punarbhīmaṃ mahābāhuṃ dharmaputro'bhyabhāṣata //

eṣa vṛṣṇipravīreṇa dhmātaḥ salilajo bhṛśam /
pṛthivīṃ cāntarikṣaṃ ca vinādayati śaṅkharāṭ //

nūnaṃ vyasanamāpanne sumahatsavyasācini /
kurubhiryudhyate sārdhaṃ sarvaiścakragadādharaḥ //

nūnamāryā mahatkuntī pāpaṃ vyasanamīdṛśam / draupadī ca subhadrā ca paśyanti saha bandhubhiḥ /
tadbhīma tvarayā yukto yāhi yatra dhanañjayaḥ //

muhyatīva hi me cittaṃ dhanañjayadidṛkṣayā /
diśaśca pradiśaḥ pārtha sātvatasya ca kāraṇāt //

gacchagaccheti guruṇā so'nujñāto vṛkodaraḥ /
tataḥ pāṇḍusuto rājanbhīmasenaḥ pratāpavān //

baddhagodhāṅgulitrāṇaḥ pragṛhītaśarāsanaḥ /
jyeṣṭhena prahito bhrātrā bhrātā bhrātuḥ priyaṅkaraḥ //

āhatya dundubhiṃ bhīmaḥ śaṅkhaṃ pradhmāpya cāsakṛt /
vinadya siṃhanādena jyāṃ vikarṣanpunaḥpunaḥ //

tena śabdena vīrāṇāṃ pātayitvā manāṃsyuta /
darśayanghoramātmānamamitrānsahasā'bhyayāt //

tamūhurjavanā dāntā viruvanto hayottamāḥ /
viśokena susaṃyattā manomārutaraṃhasaḥ //

ārujanvirujanpārtho jyāṃ vikarṣaṃśca pāṇinā /
samprakarṣanvikarṣaṃśca senāgraṃ samaloḍayat //

taṃ prayāntaṃ mahābāhuṃ pāñcālāḥ sahasomakāḥ /
pṛṣṭhato'nuyayuḥ śūrā maghavantamivāmarāḥ //

taṃ sametya mahārāja tāvakāḥ paryavārayan /
duḥśāsanaścitrasenaḥ kuṇḍabhedī viviṃśatiḥ //

durmukho duḥsahaścaiva vikarṇaśca śalastathā /
vindānuvindau sumukho dīrghabāhuḥ sudarśanaḥ //

vṛndārakaḥ suhastaśca suṣeṇo dīrghalocanaḥ /
abhayo raudrakarṇā ca suvarmā durvimocanaḥ //

śobhanto rathināṃ śreṣṭhāḥ sahasainyapadānugāḥ /
saṃyattāḥ samare vīrā bhīmasenamupādravan //

taiḥ samantādvṛtaḥ śūraiḥ samareṣu mahārathaḥ / tānsamīkṣya tu kaunteyo bhīmasenaḥ parākramī /
abhyavartata vegena siṃhaḥ kṣudramṛgāniva //

te mahāstrāṇi divyāni tatra vīrā adarśayan /
chādayantaḥ śarairbhīmaṃ meghāḥ sūryamivoditam //

tataḥ kruddho mahārāja bhīmasenaḥ parākramī /
agrataḥ syandanānīkaṃ śaravarṣairavākirat //

te vadhyamānāḥ samare tava putrā mahārathāḥ /
bhīmaṃ bhīmabalā yuddhe yodhayanti jayaiṣiṇaḥ //

tato duḥśāsanaḥ kruddho rathaśaktiṃ samākṣipat /
sarvapārasavīṃ tīkṣṇāṃ jighāṃsuḥ pāṇḍunandanam //

āpatantīṃ mahāśaktiṃ tava putrapraṇoditām /
dvidhā ciccheda tāṃ bhīmastadadbhutamivābhavat //

athānyairviśikhaistīkṣṇaiḥ saṅkruddhaḥ kuṇḍabhedinam /
suṣeṇaṃ dīrghanetraṃ ca tribhistrīnavadhīdbalī //

tato vṛndārakaṃ vīraṃ kurūṇāṃ kīrtivardhanam /
putrāṇāṃ tava vīrāṇāṃ yudhyatāmavadhītpunaḥ //

abhayaṃ raudrakarmāṇaṃ durvimocanameva ca /
tribhistrīnavadhīdbhīmaḥ punareva sutāṃstava //

vadhyamānā mahārāja putrāstava balīyasā /
bhīmaṃ praharatāṃ śreṣṭhaṃ samantātparyavārayan //

te śarairbhīmakarmāṇaṃ vavarṣuḥ pāṇḍavaṃ yudhi /
meghā ivātapāpāye dhārābhirdharaṇīdharam //

sa tadbāṇamayaṃ varṣamaśmavarṣamivācalaḥ /
pratīcchanpāṇḍudāyādo na prāvyathata śatruhā //

vindānuvindau sahitau suvarmāṇaṃ ca te sutam /
prahasanneva kaunteyaḥ śarairninyaṃ yamakṣayam //

tataḥ sudarśanaṃ vīraṃ putraṃ te bharatarṣabha /
vivyādha samare tūrṇaṃ sa papāta mamāra ca //

so'cireṇaiva kālena tadrathānīkamāśugaiḥ /
diśaḥ sarvāḥ samālokya vyadhamatpāṇḍunandanaḥ //

tato vai rathaghoṣeṇa garjitena mṛgā iva / bhajyamānāśca samare tava putrā viśāmpate /
prādravansahasā sarve bhīmasenabhayarditāḥ //

anuyāyācca kaunteyaḥ putrāṇāṃ te mahadbalam /
vivyādha samare rājankauraveyānsamantataḥ //

vadhyamānā mahārāja bhīmasenena tāvakāḥ / tyaktvā bhīmaṃ raṇājjagmuścodayanto hayottamān /

tāṃstu nirjitya samare bhīmaseno mahābalaḥ /
siṃhanādaravaṃ cakre bāhuśabdaṃ ca pāṇḍavaḥ //

*mahāntaṃ talaśabdaṃ ca kṛtvā droṇāntikaṃ yayau /
tamāvārayadācāryo velevodvṛttamarṇavam //

tasya droṇo rathaṃ rājañchādayāmāsa saṃyuge /
sāśvasūtadhvajaṃ tūrṇaṃ tadadbhutamivābhavat //

lalāṭe'tāḍayaccainaṃ nārācena smayanniva /
ūrdhvaraśmirivādityo vibabhau tatra pāṇḍavaḥ //

sa manyamānastvācāryo mamāyaṃ phalguno yathā /
bhīmaḥ kariṣyate pūjāmityuvāca vṛkodaram //

bhīmasena na te śakyaṃ praveṣṭumarivāhinīm /
māmanirjitya samare śatrumadya mahābala //

yadi te sānujaḥ kṛṣṇaḥ praviṣṭo'numate mama /
anīkaṃ na tu śakyaṃ me praveṣṭumiha vai tvayā //
sañjaya uvāca /

atha bhīmastu tacchrutvā gurorvākyamaśeṣataḥ /
kruddhaḥ provāca vai droṇaṃ raktatāmrekṣaṇaḥ śvasan //

tavārjuno nānumate brahbandho ramājiram /
praviṣṭaḥ sa hi durdharṣaḥ śakrasyāpi viśedbalam //

yena tvaṃ paramāṃ pūjāṃ kurvatā mānito hyasi /
nārjuno'haṃ ghṛṇī vipra bhīmaseno'smi te ripuḥ //

pitā nastvaṃ gururbandhustadā putrā hi rte vayam /
iti manyāmahe sarve bhavantaṃ praṇatāḥ sthitāḥ //

tadadya viparītaṃ te vadato'smāsu dṛśyate / yadi śatruṃ tvamātmānaṃ manyase tattathā'stviha /
eṣa te sadṛśaṃ karma śatrorbhīmaḥ kariṣyati //
sañjaya uvāca /

athoddhāmya gadāṃ vīraḥ kāladaṇḍamivāntakaḥ /
droṇāyāvāsṛjadrājansa rathādavapupluve //

sāśvasūtadhvajaṃ yānaṃ droṇasyāpothayattadā /
tadadbhutamapaśyāma pāṇḍaveyasya vikramam //

droṇaṃ tu virathaṃ kṛtvā bhīmaseno mahābalaḥ /
abhyavartata sainyāni tāvakāni samantataḥ //

sa mṛdraṃstarasā yodhānvāyurvṛkṣānivaujasā /
vicacāra raṇe rājanvāyutulyaparākramaḥ //

nirjitastu tadā tena pāṇḍavena mahātmanā /
anyaṃ tu rathamātiṣṭhaddroṇaḥ praharatāṃ varaḥ //