Mahabharata · Chapter 7.126

vyūheṣvāloḍyamāneṣu pāṇḍavānāṃ tatastataḥ /
sudūramanvayuḥ pārthāḥ pāñcālāḥ saha somakaiḥ //

vartamāne tathā raudre saṅgrāme romaharṣaṇe /
saṅkṣaye jagatastīvre yugānta iva bhārata //

droṇe yudhi parākrānte nardamāne muhurmuhuḥ /
pāñcāleṣu ca kṣīṇeṣu vadhyamāneṣu pāṇḍuṣu //

nāpaśyaccharaṇaṃ kañcidvarmarājo yudhiṣṭhiraḥ /
cintayāmāsa rājendra kathametadbhaviṣyati //

tato vikṣya diśaḥ sarvāḥ savyasācididṛkṣayā /
yudhiṣṭhiro dadarśātha naiva pārthaṃ na mādhavam //

so'paśyannaraśārdūlaṃ vānararṣabhalakṣaṇam /
gāṇ़ḍīvasya ca nirghoṣamaśṛṇvanvyathitendriyaḥ //

apaśyansātyakiṃ cāpi vṛṣṇīnāṃ pravaraṃ ratham / cintayābhiparītāṅgo dharmarājo yudhiṣṭhiraḥ /
nādhyagacchattadā śānti tāvapaśyannarottamau //

lokopakrośabhīrutvādvarmarājo mahāmanāḥ /
acintayanmahābāhuḥ śaineyasya rathaṃ prati //

padavīṃ preṣitaścaiva phalgunasya mayā raṇe /
śaineyaḥ sātyakiḥ satyo mitrāṇāmabhayaṅkaraḥ //

tadidaṃ hyekamevāsīdddvidhā jātaṃ mamā'dya vai /
sātyakiśca hi vijñeyaḥ pāṇḍavaśca dhanañjayaḥ //

sātyakiṃ preṣayitvā tu pāṇḍavasya padānugam /
sātvatasyāpi kaṃ yuddhe preṣayiṣye padānugam //

pariṣyāmi prayatnena bhrāturanveṣaṇaṃ yadi /
yuyudhānamananviṣya loko māṃ garhayiṣyati //

bhrāturanveṣaṇaṃ kṛtvā dharmaputro yudhiṣṭhiraḥ /
parityajati vārṣṇeyaṃ sātyakiṃ satyavikramam //

lokāpavādabhīrutvātso'haṃ pārthaṃ vṛkodaram /
padavīṃ preṣayiṣyāmi mādhavasya mahātmanaḥ //

yathaiva ca mama prītirarjune śatrumūdane /
tathaiva vṛṣṇivīre'pi sātvate yuddhadurmade //

atibhāre niyuktaśca mayā śaineyanandanaḥ / sa tu mitroparodhena gauravāttu mahābalaḥ /
praviṣṭo bhāratīṃ senāṃ makaraḥ sāgaraṃ yathā //

asau hi śrūyate śabdaḥ śūrāṇāmanivartinām /
mithaḥ saṃyudhyamānānaṃ vṛṣṇivīreṇa dhīmatā //

prāptakālaṃ subalavanniścitaṃ bahudhā hi me / tatraiva pāṇḍaveyasya bhīmasenasya dhanvinaḥ /
gamanaṃ rocate mahyaṃ yatra yātau mahārathau //

na cāpyasahyaṃ bhīmasya vidyate bhuvi kiñcina //

śakto hyeṣa raṇe yattaḥ pṛthivyāṃ sarvadhanvinām /
svabāhubalamāsthāya prativyūhitumañjasā //

yasya bāhubalaṃ sarve samāśritya mahātmanaḥ /
vanavāsānnivṛttāḥ sma na ca yuddheṣu nirjitāḥ //

ito gate bhīmasene sātvataṃ prati pāṇ़ḍave /
sanāthau bhavitārau hi yudhi sātvataphalgunau //

kāmaṃ tvaśocanīyau tau raṇe sātvataphalgunau /
rakṣitau vāsudevena svayaṃ śastraviśāradau //

avaśyaṃ tu mayā kāryamātmanaḥ śokanāśanam /
tasmādbhīmaṃ niyokṣyāmi sātvatasya padānugam //

tataḥ pratikṛtaṃ manye vidhānaṃ sātyakiṃ prati // evaṃ niścitya manasā dharmaputro yudhiṣṭhiraḥ /

yantāramabravīdrājā bhīmaṃ prati nayasva mām //

dharmarājavacaḥ śrutvā sārathirhayakovidaḥ /
rathaṃ hemapariṣkāraṃ bhīmāntikamupānayat //

bhīmasenamanujñāpya prāptakālamacintayat /
kaśmalaṃ prāviśadrājā bahu tatra samādiśat //

sa kaśmalasamāviṣṭo bhīmamāhūya pārthivaḥ / abravīdvacanaṃ rājankuntīputro yudhiṣṭhiraḥ /

abravīdvacanaṃ rājankuntīputro yudhiṣṭhiraḥ // yaḥ sadevānsagandharvāndaityāṃścaikaratho'jayat /

tasya lakṣma na paśyāmi bhīmasenānujasya te //
sañjaya uvāca /
tato'bravīddharmarājaṃ bhīmasenastathāgatam /
naivādrākṣaṃ nacāśrauṣaṃ tava kaśmalamīdṛśam //

purātiduḥkhadīrṇānāṃ bhavāngatirabhūddhi naḥ /
uttiṣṭhottiṣṭha rājendra śādhi kiṃ karavāṇi te //

na hyasādhyamakāryaṃ vā vidyate mama mānada /
ājñāpaya kuruśreṣṭha mā ca śoke manaḥ kṛthāḥ //
sañjaya uvāca /

tamabravīdaśrupūrṇaḥ kṛṣṇasarpa iva śvasan /
bhīmasenamidaṃ vākyaṃ pramlānavadano nṛpaḥ //

śrūyate pāñcajanyasya yathā śaṅkhasya nisvanaḥ /
pūrito vāsudevena saṃrabdhena yaśasvinā //

nūnamadya hataḥ śete tava bhrātā dhanañjayaḥ /
tasminvinihate nūnaṃ yudhyate'sau janārdanaḥ //

yasya satvavato vīryaṃ hyupajīvanti pāṇḍavāḥ /
yaṃ bhayeṣvabhigacchanti sahasrākṣamivāmarāḥ //

sa śūraḥ saindhavaprepsuranvayādbhāratīṃ camūm /
tasya vai gamanaṃ vidmo bhīma nāvartanaṃ punaḥ //

śyāmo yuvā guḍākeśo darśanīyo mahārathaḥ /
vyūḍhorasko mahābāhurmattadviradavikramaḥ //

cakoranetrastāmrāsyo dviṣatāṃ bhayavardhanaḥ /
mama priyahitārthaṃ ca śakralokādihāgataḥ //

vṛddhopasevī dhṛtimānkṛtajñaḥ satyasaṅgaraḥ /
praviṣṭo mahatīṃ senāmaparyantāṃ dhanañjayaḥ //

praviṣṭe ca camūṃ ghorāmarjune śatrunāśane /
preṣitaḥ sātvato vīraḥ phalgunasya padānugaḥ //

tasyābhigamanaṃ jāne bhīma nāvartanaṃ punaḥ /
tadidaṃ mama bhadraṃ te śokasthānamarindama //

arjunārthe mahābāho sātvatasya ca kāraṇāt /
vardhate haviṣevāgniridhyamānaḥ punaḥ punaḥ //

tasya lakṣma na paśyāmi tena vindāmi kaśmalam /
taṃ viddhi puruṣavyāghraṃ sātvataṃ ca mahāratham //

sa taṃ mahārathaṃ paścādanuyātastavānujam /
tamapaśyanmahābāhumadaṃ vindāmi kaśmalam //

athainaṃ punarācakṣva lohitākṣaṃ sakeśavam /
dṛṣṭvā kuśalinaṃ pārthaṃ saindhavānte sasātyakim //

saṃvidaṃ mama kuryāstvaṃ siṃhanādena pāṇḍava //

nūnaṃ vinihataḥ śūraḥ savyāsācī parantapa /
pārthe tasminhate caiva yudhyate garuḍadhvajaḥ //

sahayo nāsya vai kaścittena vindāmi kaśmalam /
tasmātkṛṣṇo raṇe nūnaṃ yudhyate yuddhakovidaḥ //

na hi me śudhyate bhāvastayoreva parantapa /
sa tatra gaccha kaunteya yatra yāto dhanañjayaḥ //

sātyakiśca mahāvīryaḥ kartavyaṃ yadi manyase /
vacanaṃ mama dharmajña bhrātā jyeṣṭho bhavāmi te //

na me'rjunastathā jñeyo jñātavyaḥ sātyakiryathā //

cikīrṣurmatpriyaṃ pārtha sa yātaḥ savyasācinaḥ /
padavīṃ durgamāṃ ghorāmagamyāmakṛtātmabhiḥ //

dṛṣṭvā kuśalinau kṛṣṇau sātvataṃ caiva sātyakim /
saṃvidaṃ caiva kuryāstvaṃ siṃhanādena pāṇ़ḍava //