Mahabharata · Chapter 7.120

jitvā yavanakāmbhojānyuyudhānastato'rjunam /
jagāma tava sainyasya madhyena rathināṃ varaḥ //

śaradaṃṣṭro naravyāghro vicitrakavacacchaviḥ /
mṛgaṃ vyāghra ivājighraṃstava sainyamabhīṣayat //

sa rathena caranmārgāndhanuruddhāmayadbhṛśam /
rukmapṛṣṭhaṃ mahāvegaṃ rukmacandrakasaṅkulam //

rukmāṅgadaśirastrāṇo rukmavarmasamāvṛtaḥ /
rukmadhvajadhanuḥ śūro meruśṛṅgamivābabhau //

sadhanurmaṇḍalaḥ saṅkhye tejobhāsuraraśmivān /
śaradīvoditaḥ sūryo nṛsūryo virarāja ha //

vṛṣabhaskandhavikrānto vṛṣabhākṣo nararṣabhaḥ /
tāvakānāṃ babhau madhye gavāṃ madhye yathā vṛṣaḥ //

mattadviradasaṅkāśaṃ mattadviradagāminam /
prabhinnamiva mātaṅgaṃ yūthamadhye vyavasthitam //

vyādhā iva jighāṃsantastvadīyāḥ samupādravan /
sātyakiṃ samare rājanparivavrustavātmajāḥ //

droṇānīkamatikrāntaṃ bhojānīkaṃ ca dustaram /
jalasandhārṇavaṃ tīrtvā kāmbhojānāṃ ca vāhinīm //

hārdikyamakarānmuktaṃ tīrṇaṃ vai sainyasāgaram /
parivavruḥ susaṅkrudvāstvadīyāḥ sātyakiṃ rathāḥ //

duryodhanaścitraseno duḥśāsanaviviṃśatī /
śakunirduḥsahaścaiva yuvā durdharṣaṇaḥ krathaḥ //

anye ca bahavaḥ śūrāḥ śastravanto durāsadāḥ /
pṛṣṭhataḥ sātyakiṃ yāntamanvadhāvannamarṣiṇaḥ //

atha śabdo mahānāsīttava sainyasya māriṣa /
mārutoddhūtavegasya sāgarasyeva parvaṇi //

tānabhidravataḥ sarvānsamīkṣya śinipuṅgavaḥ /
śanairyāhīti yantāramabravītprahasanniva //

idameti samuddhūtaṃ dhārtarāṣṭrabalaṃ mahat / māmevābhimukhaṃ tūrṇaṃ gajāśvarathapattimat /
nādayadvai diśaḥ sarvā rathaghoṣeṇa sārathe //

pṛthivīṃ cāntarikṣaṃ ca kampayansāgarānapi / etadbalārṇavaṃ sūta vārayiṣye mahāraṇe /
paurṇamāsyāmivoddhūtaṃ veleva makarālayam //

paśya me sūta vikrāntamindrasyeva mahāmṛdhe /
eṣa sainyāni śatrūṇāṃ vidhamāmi śitaiḥ śaraiḥ //

nihatānāhave paśya padātyaśvarathadvipān /
maccharairagnisaṅkāśairviddhadehānsahasraśaḥ //

ityevaṃ bruvatastasya sātyakeramitaujasaḥ / samīpe sainikāste tu śīghramīyuryuyutsavaḥ /
jahyādravasva tiṣṭheti paśyapaśyeti vādinaḥ //

tānevaṃ bruvato vīrānsātyakirniśitaiḥ śaraiḥ / jaghānaṃ triśatānaśvānkuñjarāṃśca catuḥśatān /
ladhvastraścitrayodhī ca praharañśinipuṅgavaḥ //

sa samprahārastumulastasya teṣāṃ ca dhanvinām /
devāsuraraṇaprakhyaḥ prāvartata janakṣayaḥ //

meghajālanibhaṃ sainyaṃ tava putrasya māriṣa /
pratyagṛhṇācchineḥ pautraḥ śarairāśīviṣopamaiḥ //

pracchādyamānaḥ samare śarajālaiḥ sa vīryavān /
asambhramanmahārāja tāvakānavadhīdbahūn //

āścaryaṃ tatra rājendra sumahaddṛṣṭavānaham /
na moghaḥ sāyakaḥ kaścitsātyakerabhavatprabho //

rathanāgāśvakalilaḥ padātyūrmisamākulaḥ /
śaineyavelāmāsādya sthitaḥ sainyamahārṇavaḥ //

sambhrāntanaranāgāśvamāvartata muhurmuhuḥ / tatsainyamiṣubhistena vadhyamānaṃ samantataḥ /
babhrāma tatratatraiva gāvaḥ śītārditā iva //

padātinaṃ rathaṃ nāgaṃ sādinaṃ turagaṃ tathā /
avidvaṃ tatra nādrākṣaṃ yuyudhānasya sāyakaiḥ //

na tādṛkkadanaṃ rājankṛtavāṃstatra phalgunaḥ /
yādṛkkṣayamanīkānāmakarotsātyakirnṛpa //

atyarjunaṃ śineḥ pautro yudhyate puruṣarṣabhaḥ /
vītabhīrlāghavopetaḥ kṛtitvaṃ sampradarśayan //

tato duryodhano rājā sātvatasya tribhiḥ śaraiḥ /
vivyādha sūtaṃ niśitaiścaturbhiścaturo hayān //

sātyakiṃ ca tribhirvidvvā punaraṣṭābhireva ca /
duḥśāsanaḥ ṣoḍaśabhirvivyādha śinipuṅgavam //

śakuniḥ pañcaviṃśatyā citrasenaśca pañcabhiḥ /
duḥsahaḥ pañcadaśabhirvivyādhorasi sātyakim //

utsmayanvṛṣṇiśārdūlastathā bāṇaiḥ samāhataḥ /
tānavidhyanmahārāja sarvāneva tribhistribhiḥ //

gāḍhaviddhānarīnkṛtvā mārgaṇaiḥ so'titejanaiḥ /
śaineyaḥ śyenavatsaṅkhye vyacarallaghuvikramaḥ //

saubalasya dhanuśchittvā hastāvāpaṃ nikṛtya ca /
duryodhanaṃ tribhirbāṇairabhyavidhyatstanāntare //

citrasenaṃ śatenaiva daśabhirduḥsahaṃ tathā /
duḥśāsanaṃ tu viṃśatyā vivyādha śinipuṅgavaḥ //

athānyaddhanurādāya śyālastava viśāmpate /
aṣṭābhiḥ sātyakiṃ vidvvā punarvivyādha pañcabhiḥ //

duḥśāsanaśca daśabhirduḥsahaśca tribhiḥ śaraiḥ /
durmukhaśca dvādaśabhī rājanvivyādha sātyakim //

duryodhanastrisaptatyā kidvvā bhārata mādhavam /
tatosya niśitairbāṇaistribhirvivyādha sārathim //

tānsarvānsahitāñśūrānyatamānānmahārathān /
pañcabhiḥ pañcabhirbāṇaiḥ punarvivyādha sātyakiḥ //

tataḥ sa rathināṃ śreṣṭhastava putrasya sārathim /
ājaghānāśu bhallena sa hato nyapatadbhuvi //

patite sārathau tasmiṃstava putrarathaḥ prabho /
vātāyamānaistairaśvairapānīyata saṅgarāt //

tatastava suto rājansainikāśca viśāmpate /
rājño rathamabhiprekṣya vidrutāḥ śataśo'bhavan //

vidrutaṃ tatra tatsainyaṃ dṛṣṭvā bhārata sātyakiḥ /
avākiraccharaistīkṣṇai rukmapuṅkhaiḥ śilāśitaiḥ //

vidrāvya sarvasainyāni tāvakāni sahasraśaḥ /
prayayau sātyakī rājañśvetāśvasya rathaṃ prati //

taṃ prayāntaṃ mahābāhuṃ tāvakāḥ prekṣya māriṣa /
dṛṣṭaṃ cādṛṣṭavatkṛtvā kriyāmanyāmayojayan //

taṃ śarānādadānaṃ ca rakṣamāṇaṃ ca sārathim /
ātmānaṃ pālayānaṃ ca tāvakāḥ samapūjayan //