Mahabharata · Chapter 7.119

nirjitya kṛtavarmāṇaṃ bhāradvājaṃ ca saṃyuge /
sa sātyakiḥ satyadhṛtirmahātmā śinipuṅgavaḥ //

*duryodhanaṃ ca nirjitya śūraṃ caiva suyodhanam /
jalasandhaṃ nihatyājau śūrasenaṃ ca pārthivam //

mlecchāṃśca bahudhā rājankāśyaputraṃ ca saṃyuge /
niṣādāṃstaṅkaṇāṃścaiva kaliṅgānmagadhānapi //

kekayāñchūrasenāṃśca tathā parvatavāsinaḥ /
kāmbhojānyavanāṃścaiva vasātīṃśca śibīnapi //

kosalānmagadhāṃścaiva yātudhānānsatittirān /
etāṃścānyānraṇe hatvā'gacchadyuddhe sa sātyakiḥ //

rudhiraughanadīṃ ghorāṃ keśaśaivālaśādvalām /
śaktigrāhasamākīrṇāṃ chatrahaṃsopaśobhitām //

dustarāṃ bhīrubhirnityaṃ śūralokapravāhinīm /
pravartya hṛṣito rājanpunaryantāramabravīt //

dhvajanāgāśvakalilaṃ śaraśaktyūrmimālinam /
khaṅkamatsyaṃ gadāgrāhaṃ śūrāyudhamahāsvanam //

prāṇāpahāriṇaṃ raudraṃ vāditroddhuṣṭanāditam / śūrāṇāṃ sukhasaṃsparśamaspṛśyamatha bhīruṇām /
tīrṇāḥ sma dustaraṃ tāta droṇānīkamahārṇavam //

jalasandhabalenājau puruṣādairivāvṛtam /
ato'nyatpṛtanāśeṣaṃ manye kunadikāmiva //

tartavyāmalpasalilāṃ codayāśvānasambhramam /
hastaprāptamahaṃ manye sāmprataṃ savyasācinam //

nirjitya durdharaṃ droṇaṃ sapadānugamāhave /
hārdikyaṃ yodhavaryaṃ ca manye prāptaṃ dhanañjayam //

na hi me jāyate trāso dṛṣṭvā sainyānyanekaśaḥ /
vahneriva pradīptasya vane śuṣkatṛṇālayam //

paśya pāṇḍavamukhyena yātāṃ bhūmiṃ kirīṭinā /
pattyaśvarathanāgaughaiḥ patitairviṣamīkṛtām //

dravate tadyathā sainyaṃ tena bhagnaṃ mahātmanā / rathairviparidhāvadbhirgajairaśvaiśca sārathe /
kauśeyāruṇasankāśametadudvūyate rajaḥ //

abhyāśasthamahaṃ manye śvetāśvaṃ kṛṣṇasārathim //

śrūyate hyeṣa nirghoṣo jaladasyeva garjataḥ /
viṣphāryamāṇasya raṇe gāṇḍīvasyāmitaujasaḥ //

abhyāśasthamahaṃ manye saindhavasya kirīṭinam /
tādṛśaḥ śrūyate śabdaḥ sainyānāṃ sāgaropamaḥ //

yādṛśāni nimittāni mama prādurbhavanti vai /
anastangata āditye hantā saindhavamarjunaḥ //

śanairvisrambhayannaśvānyāhi yatrārivāhinī //

yatraite satalatrāmāḥ suyodhanapurogamāḥ /
daṃśitāḥ krūrakarmāṇaḥ kāmbhojā yuddhadurmadāḥ //

śarabāṇāsanadharā yavanāśca prahāriṇaḥ /
śakāḥ kirātā daradā barbarāstāmraliptakāḥ //

anye ca bahavo mlecchā vividhāyudhapāṇayaḥ /
māmevābhimukhāḥ sarve tiṣṭhanti samarārthinaḥ //

etānsarathanāgāśvānnihatyājau sapattinaḥ /
idaṃ durgaṃ mahāghoraṃ tīrṇamevopadhāraya //
sūta uvāca /

na sambhramo me vārṣṇeya vidyate satyavikrama /
yadyapi syāttava kruddho jāmadagnyo'grataḥ sthitaḥ //

droṇo vā rathināṃ śreṣṭhaḥ kṛpo madreśvaro'pi vā /
tathāpi sambhrāmo na syāttvāmāśritya mahābhuja //

tvayā subahavo yuddhe nirjitāḥ śatrusūdana /
daṃśitāḥkrūrakarmāṇaḥ kāmbhojā yuddhadurmadāḥ //

śaravāṇāsanadharā yavanāśca prahāriṇaḥ / śakāḥ kirātā daradā barbarāstāmraliptakāḥ /
anye ca bahavo mlecchā vividhāyudhapāṇayaḥ //

na ca me sambhramaḥ kaścidbhūtapūrvaḥ kathañcana /
kimutaitatsamāsādya dhīraṃ saṃyugagoṣpadam //

āyuṣmankatareṇa tvāṃ prāpayāmi dhanañjayam /
kebhyaḥ kruddho'si vārṣṇeya kānsvinmṛtyurupasthitaḥ //

keṣāṃ saṅghamanīkasya hantumutsahate manaḥ /
ketvāṃ yudhi parākrāntaṃ kālāntakayamopamam //

dṛṣṭvā vikramasampannaṃ vidraviṣyanti saṃyuge /
keṣāṃ vaivasvato rājā smarate'dya mahābhuja //
sātyakiruvāca /

muṇḍānetānhaniṣyāmi dānavāniva vāsavaḥ /
pratijñāṃ pārayiṣyāmi kāmbhojāneva māṃ vaha //

xxxxxkadanaṃ kṛtvā kṣipraṃ yāsyāmi pāṇḍavam //

xxxxxyanti me vīryaṃ kauravāḥ sasuyodhanāḥ /
xxxxxxnāke hate sūta sarvasainyeṣu cāsakṛt //

adya kauravasainyasya dīrghamāṇasya saṃyuge /
śrutvā virāvaṃ bahudhā santapsyati suyodhanaḥ //

adya pāṇḍavamukhyasya śvetāśvasya mahātmanaḥ /
ācāryakakṛtaṃ mārgaṃ darśayiṣyāmi saṃyuge //

adya madbāṇanihatānyodhamukhyānsahasraśaḥ /
dṛṣṭvā duryodhano rājā paścāttāpaṃ gamiṣyati //

adya me kṣiprahastasya kṣipataḥ sāyakottamān /
alātacakrapratimaṃ dhanurdrakṣyanti kauravāḥ //

matsāyakacitāṅgānāṃ rudhiraṃ sravatāṃ muhuḥ /
sainikānāṃ vadhaṃ dṛṣṭvā santapsyati suyodhanaḥ //

adya me kruddharūpasya nighnataśca varānvarān /
dviphalgunāmimaṃ lokaṃ maṃsyate'dya suyodhanaḥ //

adya rājasahasrāṇi nihatāni mayā raṇe /
dṛṣṭvā duryodhano rājā santapsyati mahāmṛdhe //

adya snehaṃ ca bhaktiṃ ca pāṇḍaveṣu mahātmasu /
hatvā rājasahasrāṇi darśayiṣyāmi rājasu //

balaṃ vīryaṃ kṛtajñatvaṃ mama jñāsyanti kauravāḥ //
sañjaya uvāca /

evamuktastadā sūtaḥ śikṣitānsādhuvāhinaḥ /
śaśāṅkasannikāśānvai vājino vyanudadbhṛśam //

te pibanta ivākāśaṃ yuyudhānaṃ hayottamāḥ /
prāpayanyavanāñśanīghraṃ manaḥ pavanaraṃhasaḥ //

sātyakiṃ te samāsādya pṛtanāsvanivartinam /
bahavo laghuhastāśca śaravarṣairavākiran //

teṣāmiṣūnathāstrāṇi vegavānnataparvabhiḥ /
acchinatsātyakī rājannainaṃ te prāpnuvañśarāḥ //

rukmapuṅkhaiḥ suniśitairgārdhrapatrairajihmagaiḥ /
uccakarta śirāṃsyugro yavanānāṃ bhujānapi //

śaikyāyasāni varmāṇi kāṃsyāni ca samantataḥ /
bhittvā dehāṃstathā teṣāṃ śarā jagmurmahītalam //

te hanyamānā vīreṇa mlecchāḥ sātyakinā raṇe /
śataśo'bhyapataṃstatra vyasavo vasudhātale //

supūrṇāyatamuktaistānavyavacchinnapiṇḍitaiḥ /
pañca ṣaṭ sapta cāṣṭau ca bhibheda yavanāñśaraiḥ //

kāmbhojānāṃ sahasraiśca śakānāṃ ca viśāmpate /
śabarāṇāṃ kirātānāṃ barbarāṇāṃ tathaiva ca //

agamyarūpāṃ pṛthivīṃ māṃsaśoṇitakardamām /
kṛtavāṃstatra śaineyaḥ kṣapayaṃstāvakaṃ balam //

dasyūnāṃ saśirastrāṇaiḥ śirobhirlūnamūrdhadauḥ /
dīrghakūrcairmahī kīrṇā vibarhairaṇḍajairiva //

rudhirokṣitasarvāṅgaistaistadāyodhanaṃ babhau /
kabandhaiḥ saṃvṛtaṃ sarvaṃ tāmrābhraiḥ khamivāvṛtam //

vajrāśanisamasparśaiḥ suparvabhirajihmagaiḥ /
te sātvatena nihatāḥ samāvavrurvasundharām //

teṣāmastrāṇi bāṇāṃśca śaineyo nataparvabhiḥ /
nicakarta mahārāja yavanānāṃ śirodharāḥ //

te śarā nataparvāṇo yuyudhānapracoditāḥ /
hitvā dehāṃstathā teṣāṃ patanti sma mahītale //

te hanyamānā vīrāstu vṛṣṇivīreṇa saṃyuge /
śastrāhatāḥ patantyurvyāṃ kāmbhojāḥ sapadānugāḥ //

kāmbhojānāṃ bhujaiśchinnairyavanānāṃ ca bhārata /
tatratatra mahī bhāti pañcāsyairiva pannagaiḥ //

alpāvaśiṣṭāḥ sambhagnāḥ kṛcchraprāṇā vicetasaḥ /
jitāḥ saṅkhye mahārāja yuyudhānena daṃśitāḥ //

pārṣṇibhiśca kaśābhiśca tāḍayantasturaṅgamān /
javamuttamamāsthāya sarvataḥ prādravanbhayāt //

kāmbhojasainyaṃ vidrāvya durjayaṃ yudhi bhārata /
yavanānāṃ ca tatsainyaṃ śakānāṃ ca mahadbalam //

tataḥ sa puruṣavyāghraḥ sātyakiḥ satyavikramaḥ /
prahṛṣṭastāvakāñjitvā sūtaṃ yāhītyacodayat //

tattasya samare karma dṛṣṭvā'nyairakṛtaṃ purā /
cāraṇāḥ sahagandharvāḥ pūjayāñcakrire bhṛśam //

taṃ yāntaṃ pṛṣṭhagoptāramarjunasya viśāmpate /
cāraṇāḥ prekṣya saṃhṛṣṭāstvadīyāścābhyapūjayan //