Mahabharata · Chapter 7.12

śuśrūṣasva sthiro bhūtvāṃ śaṃsato mama bhārata / hanta te kathayiṣyāmi sarvaṃ pratyakṣadarśivān /
yathā satyaparo droṇaḥ sāditāḥ pāṇḍusṛñjayaiḥ //

senāpatitvaṃ samprāpya bhāradvājo mahārathaḥ /
madhye sarvasya sainyasya putraṃ te vākyamabravīt //

yatkauravāṇāmṛṣabhādāpageyādanantaram /
saināpatye tvayā rājannadya satkṛtavānaham //

sadṛśaṃ karmaṇastasya phalaṃ prāpnuhi bhārata /
karomi kāmaṃ kaṃ te'dya pravṛṇīṣva yamicchasi //
sañjaya uvāca /

tato duryodhano rājā karṇaduḥśāsanādibhiḥ /
sammantryovāca durdharṣamācāryaṃ jayatāṃ varam //

dadāsi cedvaraṃ mahyaṃ jīvagrāhaṃ yudhiṣṭhiram /
gṛhītvā rayināṃ śreṣṭhaṃ matsamīpamihānaya //

iccheyaṃ vai mahātmānaṃ dharmātmānaṃ yudhiṣṭhiram /
bhrātṛṇāṃ paśyatāmeva jīvagrāheṇa me dvija //

gṛhītvā rathināṃ śreṣṭhaṃ matsakāśamihānaya /
prīṇāmyanena kāryeṇa sasuhṛjjanabāndhavaḥ //
sañjaya uvāca /

tataḥ kurūṇāmācāryaḥ śrutvā putrasya te vacaḥ /
senāṃ praharṣayansarvāmidaṃ vacanamabravīt //

dhanyaḥ kuntīsuto rājanyasya grahaṇamicchasi /
na vadhaṃ tasya durdharṣa varamadya prayācase //

kimarthaṃ ca naravyāghra na vadhaṃ tasya kāṅkṣase /
nāśaṃsasi kriyāmetāṃ matto duryodhana dhruvam //

āhosviddharmarājasya dveṣṭā kaścinna vidyate /
yadīcchasi tvaṃ jīvantaṃ kulaṃ rakṣasi cātmanaḥ //

athavā bharataśreṣṭha nirjitya yudhi pāṇḍavān /
rājyāṃśaṃ prati dattvā ca saubhrātraṃ kartumicchasi //

dhanyaḥ kuntīsuto rājā sujātaṃ cāsya dhīmataḥ /
ajātaśatrutā satyā tasya yatsnihyate bhavān //
sañjaya uvāca /

droṇena caivamuktasya tava putrasya bhārata /
sahasā niḥsṛto bhāvo yosya nityaṃ hṛdi sthitaḥ //

nākāro gūhituṃ śakyo bṛhaspatisamairapi /
tasmāttava suto rājanprahṛṣṭo vākyamabravīt //

vadhe kuntīsutasyājau nācārya vijayo mama /
hate yudhiṣṭhire pārthā hanyuḥsarvānhi no dhruvam //

naiva śakyā raṇe sarve nihantumamarairapi /
yadi sarve haniṣyante pāṇḍavāḥ sasutā mṛdhe //

tataḥ kṛtsnaṃ vaśe kṛtvā niḥśeṣaṃ nṛpamaṇḍalam /
sasāgaravanāṃ sphītāṃ vijitya vasudhāmimām //

viṣṇurdāsyati kṛṣṇāyai kuntyai vā puruṣottamaḥ /
yadyeṣa caiṣāṃ śeṣaḥsyātsa evāsmānna śeṣayet //

satyapratijñe tvānīte punardyūtena nirjite / tasmiñjīvati cāyāte hyupāyairbahubhiḥ kṛtaiḥ /
punaryāsyantyaraṇyāya pāṇḍavāstamanuvratāḥ //

so'yaṃ mama jayo vyaktaṃ dīrghakālaṃ bhaviṣyati /
ato na vadhamicchāmi dharmarājasya karhicit //
sañjaya uvāca /

tasya jihmamabhiprāyaṃ jñātvā droṇo'rthatattvavit /
taṃ varaṃ sāntaraṃ tasmai dadau sañcintya buddhimān //
droṇa uvāca /

na cedyudhiṣṭhiraṃ vīraḥ pālayedarjuno yudhi /
manyasva pāṇḍavaśreṣṭhamānītaṃ vaśamātmanaḥ //

na hi śakyo raṇe pārthaḥ sendrairdevāsurairapi /
pratyudyātumatastāta na tasmāddharṣayāmyaham //

asaṃśayaṃ sa me śiṣyo matpūrvaścāstrakarmaṇi /
taruṇaḥ sukṛtī yukta ekāyanagataśca saḥ //

astrāṇīndrācca rudrācca bhūyāṃsi samavāptavān /
amarṣitaśca te rājaṃstato nāmarṣayāmyaham //

sa cāpakramyatāṃ yuddhādyenopāyena śakyate /
apanīte tataḥ pārthe dharmarājo jitastvayā //

grahaṇe hi jayastasya na vadhe puruṣarṣabha / grahaṇaṃ hi vadhāttasya dharmarājasya manyase /
anenaivābhyupāyena grahaṇaṃ samupaiṣyasi //

ahaṃ gṛhītvā rājānaṃ satyadharmaparāyaṇam /
ānayiṣyāmi te rājanvaśamadya na saṃśayaḥ //

yadi syāsyati saṅgrāme muhūrtamapi me'grataḥ /
apanīte naravyāghre kuntīputre dhanañjaye //

phalgunasya samīpe tu na hi śakyo yudhiṣṭhiraḥ /
grahītuṃ samare rājansendrairapi surāsuraiḥ //
sañjaya uvāca /

evamukte tadā tasminyuddhe devāsuropame / sāntaraṃ tu pratijñāte rājño droṇena nigrahe /
gṛhītaṃ tamamanyanta tava putrāḥ subāliśāḥ //

tato duryodhanenāpi grahaṇaṃ pāṇḍavasya tat / skandhāvāreṣu sarveṣu yathāsthāneṣu māriṣa /
sainyasthāneṣu sarveṣu sughoṣitamarindama //

pāṇḍaveyeṣu sāpekṣaṃ droṇaṃ jānāti te sutaḥ /
tataḥ pratijñāsthairyārthaṃ sa mantro bahulīkṛtaḥ //