Mahabharata · Chapter 7.11

śṛṇu divyāni karmāṇi vāsudevasya sañjaya /
kṛtavānyāni govindo yathā nānyāḥpumānkvacit //

saṃvardhatā gopakule bālenaiva mahātmanā /
vikhyāpitaṃ balaṃ bāhvostriṣu lokeṣu sañjaya //

pūtanāṃ śakaṭaṃ hatvā keśinaṃ caiva vājinam /
ṛṣabhaṃ dhenukaṃ caiva ariṣṭaṃ ca mahābalam //

dāvānmuktvā mahābāhurdhṛtvā govardhanaṃ nigim /
cāṇūraṃ muṣṭikaṃ caiva raṅgamadhye nihatya ca //

pralambaṃ narakaṃ jambhaṃ pīṭhaṃ cāpi mahāsuram /
muruṃ cāntakasaṅkāśamavadhītpuṣkarekṣaṇaḥ //

tathā kaṃso mahātejā jarāsandhena pālitaḥ /
vikrameṇaiva kṛṣṇena sagaṇaḥ pātito raṇe //

sunāmā raṇavikrāntaḥ samagrākṣauhiṇīpatiḥ /
bhojarājasya madhyastho bhrātā kaṃsasya vīryavān //

baladevadvitīyena kṛṣṇenāmitraghātinā /
tarasvī samare dagdhaḥ sasainyaḥ śūrasenarāṭ //

durvāsā nāma viprarṣistathā paramakopanaḥ /
ārādhitaḥ sadāreṇa sa cāsmai pradadau varān //

tathā gāndhārarājasya sutāṃ vīraḥ svayaṃvare /
nirjitya pṛthivīpālānāvahatpuṣkarekṣaṇaḥ //

amṛṣyamāṇā rājāno yasya jātyā hayā iva /
rathe vaivāhike yuktāḥ pratodena kṛtavraṇāḥ //

jarāsandhaṃ mahābāhumupāyena janārdanaḥ /
pareṇa ghātayāmāsa samagrākṣauhiṇīpatim //

cedirājaṃ ca vikrāntaṃ rājasenāpatiṃ balī /
arghe vivadamānaṃ ca jaghāna paśuvattadā //

saubhaṃ daityapuraṃ khasthaṃ śālvaguptaṃ durāsadam /
samudrakukṣau vikramya pātayāmāsa mādhavaḥ //

aṅgānvaṅgānkaliṅgaṃśca māgadhānkāśikosalān /
vātsyagārgyakarūṣāṃśca pauṇḍrāṃścāpyajayadraṇe //

āvantyāndākṣiṇātyāṃśca pārvatīyāndaśerakān /
kāśmīrakānaurasikānpiśācāṃśca samudgalān //

kāmbhojānvāṭadhānāṃśca colānpāṇḍyāṃśca sañjaya /
trigartānmālavāṃścaiva daradāṃśca sudurjayān //

nānādigbhyaśca samprāptānkhaśāṃścaiva śakāṃstathā /
jitavānpuṇḍarīkākṣo yavanaṃ ca sahānugam //

praviśya makarāvāsaṃ yādogaṇaniṣevitam /
jigāya varuṇaṃ saṅkhye salilāntargataṃ purā //

yudhi pañcajanaṃ hatvā daityaṃ pātālavāsinam /
pāñcajanyaṃ hṛṣīkeśo divyaṃ śaṅkhamavāptavān //

khāṇḍave pārthasahitastoṣayitvā hutāśanam /
āgneyamastraṃ durdharṣaṃ cakraṃ lebhe mahābalaḥ //

vainateyaṃ samāruhya trāsayitvā'marāvatīm /
mahendrabhavanādvīraḥ pārijātamupānayat //

tacca marṣitavāñśakro jānaṃstasya parākramam /
rājñāṃ cāpyajitaṃ kañcitkṛṣṇeneha na śuśruma //

yacca tanmahadāścaryaṃ sabhāyāṃ mama sañjaya /
kṛtavānpuṇḍarīkākṣaḥ kastadanya ihārhati //

yacca bhaktyā prasanno'hamadrākṣaṃ kṛṣṇamīśvaram /
tanme suviditaṃ sarvaṃ pratyakṣamiva cāgamam //

nānto vikramayuktasya buddhyā yuktasya vā punaḥ /
karmaṇāṃ śakyate gantuṃ hṛṣīkeśasya sañjaya //

tathā gadaśca sāmbaśca pradyumno'tha vidūrathaḥ /
agāvaho'niruddhaśca cārudeṣṇaḥ sasāraṇaḥ //

ulmuko niśaṭhaścaiva jhillī babhruśca vīryavān /
pṛthuśca vipṛthuścaiva śamīṅko'thārimejayaḥ //

ete'nye balavantaśca vṛṣṇivīrāḥ prahāriṇaḥ /
kathañcitpāṇjavānīkaṃ śrayeyuḥ samare sthitāḥ //

āhūtā vṛṣṇivīreṇa keśavena mahātmanā /
tataḥ saṃśayitaṃ sarve bhavediti matirmama //

nāgāyutabalo vīraḥ kailāsaśikharopamaḥ /
vanamālī halī rāmastatra yatra janārdanaḥ //

yamāhuḥ sarvapitaraṃ vāsudevaṃ dvijātayaḥ /
api vā hyeṣa pāṇḍūnāṃ yotsyate'rthāya sañjaya //

sa yadā tāta sannahyetpāṇḍavārthāya sañjaya /
na tadā pratisaṃyoddhā bhavitā tatra kaścana //

yadi sma kuravaḥ sarve jayeyurnāma pāṇḍavān /
vārṣṇeyo'rthāya teṣāṃ vai gṛhṇīyācchastramuttamam //

tataḥ sarvānnaravyāghro hatvā narapatīnraṇe /
kauravāṃśca mahābāhuḥkuntyai dadyātsa medinīm //

yasya yantā hṛṣīkeśo yoddhā yasya dhanañjayaḥ /
rathasya tasya kaḥ saṅkhye pratyanīko bhavedrathaḥ //

na kenacidupāyena kurūṇāṃ dṛśyate jayaḥ /
tasmānme sarvamācakṣva yathā yuddhamavartata //

arjunaḥ keśavasyātmā kṛṣṇo'pyātmā kirīṭinaḥ /
arjune vijayo nityaṃ kṛṣṇe kīrtiśca śāśvatī //

sarveṣvapi ca lokeṣu bībhatsuraparājitaḥ /
prādhānyenaiva bhūyiṣṭhamameyāḥ keśave guṇāḥ //

mohādduryodhanaḥ kṛṣṇaṃ yo na vettīha keśavam / mohito daivayogena mṛtyupāśapuraskṛtaḥ /

na veda kṛṣṇaṃ dāśārhamarjunaṃ caiva pāṇḍavam /
pūrvadevau mahātmānau naranārāyaṇāvubhau //

ekātmānau dvidhābhūtau dṛśyete mānavairbhuvi /
manasāpi hi durdharṣau senāmetāṃ yaśasvinau //

nāśayetāmihecchantau mānuṣatvācca necchataḥ /
yugasyeva viparyāso lokānāmiva mohanam //

bhīṣmasya ca vadhastāta droṇasya ca mahātmanaḥ /
na hyeva brahmacaryeṇa na vedādhyayanena ca //

na kriyābhirna cāstreṇa mṛtyoḥ kaścinnirvāyate /
lokasambhāvitau vīrau kṛtāstrau yuddhadurmadau //

bhīṣmadroṇau hatau śrutvā kinnu jīvāmi sañjaya /
yāṃ tāṃ śriyamasūyāmaḥ purā dṛṣṭvā yudhiṣṭhire //

adya tāmanujānīmo bhīṣmadroṇavadhena ha /
matkṛte cāpyanuprāptaḥ kurūṇāmeṣa saṅkṣayaḥ //

pakvānāṃ hi vadhe sūta vajrāyante tṛṇānyuta /
anantamidamaiśvaryaṃ loke prāpto yudhiṣṭhiraḥ //

yasya kopānmahātmānau bhīṣmadroṇau nipātitau /
prāptaḥ prakṛtito dharmo na dharmo māmakānprati //

krūraḥ sarvavināśāya kālo'sau nātivartate / anyathā cintitā hyarthā naraistāta manasvibhiḥ /
anyathaiva prapadyante daivāditi matirmama //

tasmādaparihārye'rthe samprāpte kṛcchra uttame /
apāraṇīye duścintye yathābhūtaṃ pracakṣva me //