Mahabharata · Chapter 7.13

sāntare tu pratijñāne rājño droṇena nigrahe / tataste sainikāḥ śrutvā taṃ yudhiṣṭhiranigraham /
siṃhanādaravāṃścakrurbāhuśabdāṃśca kṛtsnaśaḥ //

tacca sarvaṃ yathānyāyaṃ dharmarājena bhārata /
āptaiścāraiḥ parijñātaṃ bhāradvājacikīrṣitam //

tataḥ sarvānsamānāyya bhrātṛnanyāṃśca sarvaśaḥ /
avravīddharmarājastu dhanañjayamidaṃ vacaḥ //

śrutaṃ te puruṣavyāghra droṇasyādya cikīrṣitam /
yathā tanna bhavetsatyaṃ tathā nītirvidhīyatām //

sāntaraṃ hi pratijñātaṃ droṇenāmitraghātinā /
taccāntaramamogheṣau tvayi tena samāhitam //

tattvamadya mahābāho yudhyasva madanantaram /
yathā duryodhanaḥ kāmaṃ nemaṃ droṇādavāpnuyāt //
arjuna uvāca /

yathā me na vadhaḥ kārya ācāryasya kathañcana /
tathā tava parityāgo na me rājaṃścikīrṣitaḥ //

apyevaṃ pāṇḍava prāṇānutsṛjeyamahaṃ yudhi /
pratiyātā'hamācāryaṃ tvāṃ na jahyāṃ kathañcana //

tvāṃ nigṛhyāhave rājandhārtarāṣṭro yamicchati /
na sa taṃ jīvaloke'sminkāmaṃ prāptā kathañcana //

prapateddyauḥ sanakṣatrā pṛthivī śakalī bhavet /
na tvāṃ droṇo nigṛhṇīyājjīvamāne mayi dhruvam //

yadi tasya raṇe sāhyaṃ kurute vajrabhṛtsvayam /
viṣṇurvā sahito devairna tvāṃ prāpsyatyasau mṛdhe //

mayi jīvati rājendra na bhayaṃ kartumarhasi /
droṇādastrabhṛtāṃ śreṣṭhātsarvaśastrabhṛtāmapi //

anyacca brūyāṃ rājendra pratijñāṃ mama niścalām //

na smarāmyanṛtaṃ tāvanna smarāmi parājayam /
na smarāmi pratiśrutya vismṛtya manasva'kṛtam //
sañjaya uvāca /

tataḥ śaṅkhāśca bheryaśca mṛdaṅgāścānakaiḥ saha /
prāvādyanta mahārāja pāṇḍavānāṃ niveśane //

siṃhanādaśca sañjajñe pāṇḍavānāṃ mahātmanām //
dhanurjyātalaśabdaśca gaganaspṛksubhairavaḥ //

śrutvā śaṅkhasya nirghoṣaṃ pāṇḍavasya mahaujasaḥ /
tvadīyeṣvapyanīkeṣu vāditrāṇyabhijaghnire //

tato vyūḍhānyanīkāni tava teṣāṃ ca bhārata /
śanairupeyuranyonyaṃ yotsyamānāni saṃyuge //

tataḥ pravavṛte yuddhaṃ tumulaṃ romaharṣaṇam /
pāṇḍavānāṃ kurūṇāṃ ca droṇapāñcālyayorapi //

yatamānāḥ prayatena droṇānīkaviśātane /
na śekuḥ sṛñjayā yuddhe taddhi droṇena pālitam //

tathaiva tava putrasya rathodārāḥ prahāriṇaḥ /
na śekuḥ pāṇḍavīṃ senāṃ pālyamānāṃ kirīṭīnā //

āstāṃ te stimite sene rakṣyamāṇe parasparam /
samprasupte yathā naktaṃ vanarājyau supuṣpite //

tato rukmaratho rājannarkeṇeva virājatā /
varūthinā viniṣpatya vyacaratpṛtanāmukhe //

tamudyantaṃ rathenaikamāśukāriṇamāhave /
anekamiva santrasānmenire pāṇḍusṛñjayāḥ //

tena muktāḥ śarā ghorā viceruḥ sarvatodiśam /
trāsayanto mahārāja pāṇḍaveyasya vāhinīm //

madhyandinamanuprāpto gabhastiśatasaṃvṛtaḥ /
yathā dṛśyeta gharmośustathā droṇo'pyadṛśyata //

na cainaṃ pāṇḍaveyānāṃ kaścicchaknoti bhārata /
vīkṣituṃ samare kruddhaṃ mahendramiva dānavāḥ //

mohayitvā tataḥ sainyaṃ bhāradvājaḥ pratāpavān /
dhṛṣṭadyumnabalaṃ tūrṇaṃ vyadhamanniśitaiḥ śaraiḥ //

sa diśaḥ sarvato ruddhvā saṃvṛtya khamajihmagaiḥ /
pārṣato yatra tatraināmabhinatpāṇḍuvāhinīm //