Mahabharata · Chapter 7.108

draupadeyānmaheṣvāsānsaumadattirmahāyaśāḥ /
ekaikaṃ pañcabhirvidvvā punarvivyādha saptabhiḥ //

te pīḍitā bhṛśaṃ tena raudreṇa sahasā vibho /
pramūḍhā naiva vividurmṛdhe kṛtyaṃ sma kiñcana //

nākuliśca śatānīkaḥ saumadattiṃ nararṣabham /
dvābhyāṃ vidvvā'nadadvṛṣṭaḥ śarābhyāṃ śatrukarśanaḥ //

tathetare raṇe yattāstribhistribhirajihmagaiḥ /
vivyadhuḥ samare tūrṇaṃ saumadattimamarṣaṇam //

sa tānprati mahārāja pañca cikṣepa sāyakān /
ekaikaṃ hṛdi cājaghne ekaikena mahāyaśāḥ //

tataste bhrātaraḥ pañca śarairviddhā mahātmanā /
parivārya raṇe vīraṃ vivyadhuḥ sāyakairbhṛśam //

arjunistu hayāṃstasya caturbhirniśitaiḥ śaraiḥ /
preṣayāmāsa saṅkruddho yamasya sadanaṃ prati //

bhaimasenirdhanuśchittvā saumadattermahātmanaḥ /
nanāda balavannādaṃ vivyādha ca śitaiḥ śaraiḥ //

yaudhiṣṭhirirdhvajaṃ tasya cchittvā bhūmāvapātayat /
nākuliścātha yantāraṃ rathanīḍādapāharat //

sāhadevistu taṃ jñātvā bhrātṛbhirvimukhīkṛtam /
kṣurapreṇa śiro rājannicakarta mahātmanaḥ //

tacchiro nyapatadbhūtau tapanīyavibhūṣitam /
abhāsayadruṇoddeśaṃ bālasūryasamaprabham //

saumadatteḥ śiro dṛṣṭvā nipatattanmahātmanaḥ /
vitrastāstāvakā rājanpradudruvuranekadhā //

alambusastu samare bhīmasenaṃ mahābalam /
yodhayāmasa saṅkruddho lakṣmaṇaṃ rāvaṇiryathā //

samprayuddhau rame dṛṣṭvā tāvubhau nararākṣasau /
vismayaḥ sarvabhūtānāṃ bhayaṃ cāsītsudāruṇam //

ārśyaśṛṅgiṃ tato bhīmo navabhirniśitaiḥ śaraiḥ /
vivyādha prahasanrājanrākṣasendramamarṣaṇam //

tadrakṣaḥ samare viddhaṃ kṛtvā nādaṃ bhayāvaham /
abhyadravattato bhīmaṃ ye ca tasya padānugāḥ //

sa bhīmaṃ pañchabhirvidvvā śaraiḥ sannataparvabhiḥ / bhaimānparijaghānāśu rathāṃstriśatamāhave /
punaścatuḥśatānhatvā bhīmaṃ vivyādha patriṇā //

so'tividdhastathā bhīmo rākṣasena mahābalaḥ /
niṣasāda rathopasthe mūrcchayā'bhipariplutaḥ //

pratilabhya tataḥ sañjñāṃ mārutiḥ krodhamūrcchitaḥ / vikṛṣya kārmukaṃ ghoraṃ bhārasādhanamuttamam /
alambusaṃ śaraistīkṣṇairardayāmāsa sarvataḥ //

sa viddho bahubhirbāṇairnīlāñjanacayopamaḥ /
śuśubhe sarvato rājanpraphulla iva kiṃśukaḥ //

sa vadhyamānaḥ samare bhīmacāpacyutaiḥ śaraiḥ / smaranbhrātṛvadhaṃ caiva pāṇḍavena mahātmanā /
ghoraṃ rūpamatho kṛtvā bhīmasenamabhāṣata //

tiṣṭhedānīṃ raṇe pārtha paśya me'dya parākramam // bāko nāma sudurbuddhe rākṣasapravaro balī /

parokṣaṃ mama tadvṛttaṃ yaddhātā me hatastvayā //
sañjaya uvāca /

evamuktvā tato bhīmamantardhānaṃ gatastadā /
mahatā śaravarṣeṇa bhṛśaṃ taṃ samavākirat //

bhīmastu samare rājannadṛśye rākṣase tadā /
ākāśaṃ pūrayāmāsa śaraiḥ sannataparvabhiḥ //

sa vadhyamāno bhīmena nimeṣādrathamāsthitaḥ /
jagāma dharaṇīṃ caiva kṣudraḥ khaṃ sahasā'gamat //

uccāvacāni rūpāṇi cakāra subahūni ca /
aṇurbṛhatpunaḥ sthūlo nādānmuñcannivāmbudaḥ //

[nipeturgaganācatcaiva śaradhārāḥ sahasraśaḥ /
śaktayaḥ kaṇapāḥ prāsāḥ śūlapaṭṭasatomarāḥ //

śataghnyaḥ parighāścaiva bhiṇ़ḍipālāḥ paraśvathāḥ /
śilāḥ khaṅghā guḍāścaiva ṛṣṭīrvajrāṇi caiva ha //

sā rākṣasavisṛṣṭā tu śastravṛṣṭiḥ sudāruṇā / jaghāna pāṇḍuputrasya sainikānraṇamūrdhani // ]

uccāvacāstathā vāco vyājahāra samantataḥ /
tena pāṇḍavasainyānāṃ sūditā yudhi vāraṇāḥ //

hayāśca bahavo rājanpattayaśca tathā punaḥ /
rathebhyo rathinaḥ petustasya nunnāḥ sma sāyakaiḥ //

śoṇitodāṃ rathāvartāṃ hastigrāhasamākulām /
chatrahaṃsāṃ kardaminīṃ bāhupannagasaṅkulām //

nadīṃ pravartayāmāsa rakṣogaṇasamākulām /
vahantīṃ bahudhā rājaṃścedipāñcālasṛñjayān //

taṃ tathā samare rājanvicarantamabhītavat /
pāṇḍavā bhṛśasaṃvignāḥ prāpaśyaṃstasya vikramam //

tāvakānāṃ tu sainyānāṃ praharṣaḥ samajāyata /
vāditraninadaścograḥ sumahānromaharṣaṇaḥ //

taṃ śrutvā ninadaṃ ghoraṃ tava sainyasya pāṇḍavaḥ /
nāmṛṣyata yathā nāgastalaśabdaṃ samīritam //

tataḥ krodhābhitāmrākṣo nirdahanniva pāvakaḥ /
sandadhe tvāṣṭramastraṃ sa svayaṃ tvaṣṭeva mārutiḥ //

tataḥ śarasahasrāṇi prādurāsansamantataḥ /
taiḥ śaraistava sainyasya vidravaḥ sumahānabhūt //

tadastraṃ preritaṃ tena bhīmasenena saṃyuge /
rākṣasasya mahāmāyāṃ hatvā rākṣasamārdayat //

sa vadhyamāno bahudhā bhīmasenena rākṣasaḥ /
santyajya samare bhīmaṃ droṇānīkamupādravat //

tasmiṃstu nirjite rājanrākṣasendre mahātmanā /
anādayansiṃhanādaiḥ pāṇḍavāḥ sarvato diśam //

apūjayanmārutiṃ ca saṃhṛṣṭāste mahābalam /
prahādamiva daiteyā yathā śakraṃ marudgaṇāḥ //