Mahabharata · Chapter 7.109

kirantaṃ śaravarṣāṇi roṣāddoṇaṃ mahāhave /
vitrāsayantaṃ tāṃ senāṃ kaunteyānāṃ mahīpate //

dṛṣṭvā tato maheṣvāso nighnantaṃ ca rathānbhṛśam /
ghaṭotkaco mahābāhū raṇāyābhijagāma ha //

piśācavadanairyuktaṃ rathaṃ kāñcanabhūṣitam /
samāsthāya mahārāja nānāpraharaṇairyutaḥ //

daṃśitastapanīyena kavacena suvarcasā /
bhūṣaṇairācitāṅgaśca nadanniva ca toyadaḥ //

haiḍimbeyaḥ susaṅkruddho droṇamabhyadravadbalī /
tamabhyadhāvadāyāntaṃ kraddharūpalambusaḥ //

ṛkṣacarmaparikṣiptaṃ rathamāsthāya daṃśitaḥ /
raktoṣṭhaḥ sadhanuṣpāṇiḥ prāṃśuḥ kalpa iva sthitaḥ //

kṣipañchataghnīrvipulā musalopamatomarān /
musaṇṭhīrbahulāścaiva triśūlānapi paṭṭasān //

karparāñchatadhārāṃśca pinākānvividhāṃstathā /
cakrāṇi ca kṣuraprāṇi kṣepaṇīśca kaṭaṅkaṭān //

nārāyānvividhānasyansakaṅkolūkavāyasān /
cikṣepa dhanurādāya ninadanbhairavānravān //

taṃ raudraṃ krūramāyāntaṃ dṛṣṭvā kālamivāgatam /
prādravadbhayasaṃvignā rājanpāṇḍavavāhinī //

sātyakistu rathavyāghro dṛṣṭvā taṃ rākṣasaṃ yudhi /
abhyayādamaraprakhyo bhrāmayitvā mahaddhanuḥ //

abhyadravacca tadrakṣastiṣṭhatiṣṭheti cābravīt /
alambusaṃ rākṣasendaraṃ so'stravarṣairavākirat //

tataḥ pāṇḍavasainyāni vidrutānyatha bhārata /
nirīkṣyābhyadravattūrṇaṃ tvaramāṇo ghaṭotkacaḥ //

cikṣepa ca gadāśaktīstomarānatha paṭṭasān /
hemacitratsarūnugrānkhaṅgānākāśasaprabhān //

anyonyamarādālokya rākṣasau tau mahābalau /
bhairavaṃ nadaturnādānsatoyāviva toyadau //

tataḥ pravavṛte yuddhaṃ ghoraṃ rākṣasasiṃhayoḥ /
yādṛgeva purā vṛttaṃ rāmarāvaṇayormṛdhe //

sa śaktīśca pinākāṃśca vajrānkhaṅgānparaśvathān /
anyonyamabhisaṅkruddhau tadā vyasṛjatāmubhau //

ākṛṣyamāṇe dhanuṣi tayorbāhubalena ca /
yantreṇeva tadā rājanbhṛśaṃ nādānpracakratuḥ //

alambusastataścakraṃ kṛtāntajvalanaprabham /
ghaṭotkacāya cikṣepa yatnamāsthāya vīryavān //

tadbhaimaseniḥ samprekṣya cakraṃ vegavadantare /
gadayā tāḍayāmāsa taddīrṇaṃ śatadhā'bhavat //

tato'gnicūrṇaiḥ sahasā cakraghātaviniḥsṛtaiḥ /
daṃśakairiva sā senā patadbhirbhṛśasankulā //

tataḥ pratihate cakre sa vīro roṣasankulaḥ /
prāhiṇottarasā śūlaṃ śaktīrdaśaśataṃ tadā / //

jvalantīśca kirantīśca jvālāmālāḥ samantataḥ /
yugāntolkānibhāstīkṣṇā hemadaṇḍā mahāsvanāḥ //

tāścāpatantīḥ samprekṣya rākṣasasya ghaṭotkacaḥ /
ardhacandraiḥ praciccheda nārācaiḥ kaṅkapatribhiḥ //

tato roṣaparītāṅgaḥ pramumoca sa rākṣasaḥ /
śaravarṣaṃ mahāghoraṃ ghaṭotkacarathaṃ prati //

tayoḥ pratibhayaṃ yuddhamāsīdrākṣasasiṃhayoḥ /
kurvatorvividhā māyāḥ śakraśambarayoriva //

alambuso bhṛśaṃ kruddho ghaṭotkacamatāḍayat //

tayoryuddhaṃ samabhavadrakṣogrāmaṇimukhyayoḥ /
yādṛgeva purā vṛttaṃ rāmarāvaṇayoḥ prabho //

ghaṭotkacastu viṃśatyā nārācānāṃ stanāntare /
alambusamatho viddhā siṃhavadvyanadanmuhuḥ //

tathaivālambuso rājanhaiḍimbiṃ yuddhadurmadam /
vidvvā vidvṛ'nadadvṛṣṭaḥ pūrayankhaṃ samantataḥ //

tathā tau bhṛśasaṅkruddhau rākṣasendrau mahābalau /
nirviśeṣamayudhyetāṃ māyābhiritaretaram //

māyāśatasṛjau nityaṃ mohayantau parasparam /
māyāyuddheṣu kuśalau māyāyuddhamayudhyatām //

yāṃyāṃ ghaṭotkaco yuddhe māyāṃ darśayate nṛpa /
tāṃ tāmalambuso rājanmāyayaiva nijaghnivān //

taṃ tathā yudhyamānaṃ tu māyāyuddhaviśāradam /
alambusaṃ rākṣasendraṃ dṛṣṭvā'krudhyanta pāṇḍavāḥ //

ta enaṃ bhṛśasaṃvignāḥ sarvataḥ pravarā rathaiḥ /
abhyadravanta saṅkuddhā bhīmasenādayo nṛpa //

ta enaṃ koṣṭhakīkṛtya rathavaṃśena māriṣa /
sarvato vyakiranbāṇairulkābhiriva kuñjaram //

sa teṣāmastravegaṃ taṃ pratihatyāstramāyayā /
tasmādrathavrajānmukto vanadāhādiva dvipaḥ //

sa viṣphārya anurdhoramindrāśanisamasvanam /
mārutiṃ pañcaviṃśatyā bhaimaseniṃ ca pañcabhiḥ //

yudhiṣṭhiraṃ tribhirviddhā sahadevaṃ ca saptabhiḥ / nakulaṃ ca trisaptatyā dropadeyāṃśca māriṣa /
pañcabhiḥpañcabhirviddhvā ghoraṃ nādaṃ nanāda ha //

taṃ bhīmaseno navabhiḥ sahadevastu pañcabhiḥ / yudhiṣṭhiraḥ śatenaiva rākṣasaṃ pratyavidhyata /
nakulastu catuḥṣaṣṭyā draupadeyāstribhistribhiḥ //

haiḍimbo rākṣasaṃ viddhvā yuddhe pañcāśatā śaraiḥ /
punarvivyādha saptatyā nanāda ca mahābalaḥ //

tasya nādena mahatā kampiteyaṃ vasundharā /
saparvatavanā rājansapādapajalāśayā //

so'tividdho maheṣvāsaiḥ sarvatastairmahārathaiḥ /
prativivyādha tānsarvānpañcabhiḥ pañcabhiḥ śaraiḥ //

taṃ kruddhaṃ rākṣasaṃ yuddhe pratikruddhastu rākṣasaḥ /
haiḍimbo bharataśreṣṭha śarairvivyādha saptabhiḥ //

so'tividdho balavatā rākṣasendro mahābalaḥ /
vyasṛjatsāyakāṃstūrṇaṃ rukmapuṅkhāñśilāśitān //

te śaṟā nataparvāṇo bhaimasenivinirbhidaḥ /
ruṣitāḥ pannagā yadvadyodhamukhyānupāgaman //

tataste pāṇḍavā rājansamantānniśitāñśarān /
preṣayāmāsurudvignā haiḍimbaśca ghaṭotkacaḥ //

sa vidhyamānaḥ samare pāṇḍavairjitakāśibhiḥ /
*nābhyapadyata kartavyamārśyaśṛṅgirmahābalaḥ //

ghaṭotkacaṃ mahārāja śaravarṣairavākirat /
dagdhādrikūṭasadṛśaṃ tamañjanacayoparamam //

ghaṭotkaco'pyasambhrāntaḥ śaravarṣaṃ mahattaram /
alambusavadhaprepsurmumocāgniriva jvalan //

alambusavadhāccogrāddhaṭotkacavadhādapi /
śarāḥ prādurbhavanti sma dvirephā iva śākhinaḥ //

abhracchāyeva racitā bāṇaistatra nareśvara /
na sma vijñāyate kiñcidandhakāre kṛte śaraiḥ //

tata ākarṇamuktena bhallena ca ghaṭotkacaḥ /
alambusasya ciccheda śiro yanturmahābalaḥ //

tato'parairvegavadbhiḥ kṣuraistasya ghaṭotkacaḥ /
akṣamīṣāṃ yugaṃ caiva ciccheda yudhi tāḍayan //

avaskandya rathāttūrṇaṃ kairmīraḥ krodhamūrcchitaḥ /
tasminmāyāmayaṃ ghoramastravarṣaṃ vavarṣa ha //

ghaṭotkaco'pyāśu rathātpraskandya sa tameva ca /
māyāstreṇaiva māyāstraṃ vyadhamatsamare ripoḥ //

haiḍimbenārdyamānastu yudhi so'lambuso'dravat /
antarhito mahārāja ghaṭotkacamayodhayat //

antardhānagataṃ dṛṣṭvā tatratatra ghaṭotkacaḥ /
gadayā tāḍayāmāsa vegavatyā mahābalaḥ //

utpapāta tato vyomni prahāraparipīḍitaḥ /
alambuso rākṣasendraḥ sahasā pakṣirāḍiva //

ghaṭotkaco'pyasambhrāntaḥ khaṅgapāṇirathotpatat /
tato vegena mahatā vivarṣiṣurivāmbudaḥ //

tamāpatantaṃ samprekṣya kairmīrī rākṣasottamaḥ /
abhidudrāva vegena siṃhaḥ siṃhamiva sthitam //

dakṣiṇenāsimudyamya vakṣaḥ pracchādya varmaṇā /
abhidudrāva vegena vegavantaṃ ghaṭotkacaḥ //

tāvubhau vegasaṃrabdhāvalambusaghaṭotkacau /
anyonyasya tathaivorū samājaghnaturañjasā //

anyonyasyābhighātena tayo rākṣasasiṃhayoḥ /
śailenābhihatasyeva śailasyābhūnmahāsvanaḥ //

tato'pasṛtya sahasā punarāpetaturbhṛśam /
carantāvasimārgāṃstānvividhānrākṣasottamau //

tayorgātreṣu patitāvasī bhinnau nipetatuḥ /
vegotsṛṣṭe maghavatā vajre śailataṭeṣviva //

tataḥ sainyāni dadṛśustadyuddhamatidāruṇam /
yuddhaṃ tayo rākṣasayorāmiṣe śyenayoriva //

tato lohitaraktākṣāvubhau tau rākṣasottamau /
tathaikṣyetāṃ tu śārdūlau sandhyāraktāvivāmbudau //

cakrāte śyenavaccaiva maṇḍalāni sahasraśaḥ /
ubhau nistriṃśahastau tau sapakṣāviva pakṣiṇau //

bhrāmayitvā tu taṃ khaṅgaṃ pāṇḍoḥ kirmīranandanaḥ /
cikṣepāsya śiro hartuṃ sa ca tasya ghaṭotkacaḥ //

tāvasī yugapaddīptau sametya vipulau bhuvi /
patitau tau tu bāhubhyāṃ rākṣasau samasajjatām //

śīrṣāghātāṃsadhātaiśca parasparamathāhatau /
punarvimiśritau vīrau vyāyudhyete muhurmuhuḥ //

bhaimasenirathotkṣipya samāvidhya punaḥ punaḥ /
niṣpipeṣa kṣitau kṣipraṃ pūrṇakumbhamivāśmani //

balalāghavasampannaḥ sampanno vikrameṇa ca /
bhaimaseniratha kruddhaḥ sarvasainyasya paśyataḥ //

asṛkkṣaritasarvāṅgaścūrṇitāsthivibhūṣaṇaḥ /
ghaṭotkacena niṣpiṣṭo hataḥ sālakaṭaṅkaṭaḥ //

pāṇḍavānāṃ tataḥ senā taṃ dṛṣṭvā vinipātitam /
nanāda sumahānādaṃ harṣavegasamāplutā //

tatastu nipapātāśu gatāsurbhuvi rākṣasaḥ /
śikharaṃ parvatasyeva vajravegena pātitam //

patatā tena mahatā rathināṃ dantināṃ daśa /
tava sainye mahārāja nihatāḥ subṛhattayā //

tato ghaṭotkaco hatvā tadrakṣo vṛtrasannibham /
punaḥ sa rathamāsthāya vijigīṣurnanādaha //

tataḥ sumanasaḥ pārthā hate tasminniśācare /
cukruśuḥ siṃhanādāṃśca vāsāṃsyādudhuvuśca ha //

tāvakāśca hataṃ dṛṣṭvā rākṣasendraṃ mahābalam / alambusaṃ tathā śūrā viśīrṇamiva parvatam /
hāhākāramakārṣuśca sainyāni bharatarṣabha //

janāśca taddadṛśire rakṣaḥ kautūhalānvitāḥ /
yadṛcchayā nipatitaṃ bhūmāvaṅgārakaṃ yathā //

ghaṭotkacastu taddhatvā rakṣo balavatāṃ varam /
mumoca balavannādaṃ balaṃ hatveva vāsavaḥ //

sa pūjyamānaḥ pitṛbhiḥ sabāndhavai-- rghaṭotkacaḥ karmaṇi duṣkare kṛte /
ripuṃ nihatyābhinananda vai tadā hyalambusaṃ pakvamalambuṣaṃ yathā //

tato ninādaḥ sumahānsamutthitaḥ saśaṅkhanānāvidhabāṇaghoṣavān /
niśamya taṃ pratyanadaṃstu pāṇḍavā-- stato dhvanirbhuvanamathā'spṛśadbhṛśam //

tato'bhigamya rājānaṃ dharmaputraṃ yudhiṣṭhiram /
svakarmāvedayanmūrdhnā prāñjalirnipapāta ha //

mūrdhnyupāghrāya taṃ jyeṣṭhaḥ pariṣvajya ca pāṇḍavaḥ /
prito'smītyabravīdrājanharṣādutphullalocanaḥ //

ghaṭotkacena niṣpiṣṭe hate sālakaṭaṅkaṭe /
babhūvurmuditāḥ sarve hate tasminniśācare //