Mahabharata · Chapter 7.107

bṛhatkṣatramathāyāntaṃ kekayaṃ dṛḍhavikramam /
kṣemadhūrtirmahārāja vivyādhorasi mārgaṇaiḥ //

bṛhatkṣatrastu taṃ rājā navatyā nataparvaṇām /
ājaghne tvarito rājandroṇānīkabibhitsayā //

kṣemadhūrtistu saṅ्kruddhaḥ kekayasya mahātmanaḥ /
dhanuściccheda bhallena pītena niśitena ha //

athainaṃ chinnadhanvānaṃ śareṇānataparvaṇā /
vivyādha samare tūrṇaṃ pravaraṃ sarvadhanvinām //

athānyaddhanurādāya bṛhatkṣatro hasanniva /
vyaśvasūtarathaṃ cakre kṣamadūrtiṃ mahāratham //

tato'pareṇa bhallena pītena niśitena ca /
jahāra nṛpateḥ kāyācchiro'jvalitakuṇ़ḍalam //

tacchinnaṃ sahasā tasya śiraḥ kuñcitamūrdhajam /
sakirīṭaṃ mahīṃ prāpya babhau jyotirivāmbarāt //

taṃ nihatya raṇe hṛṣṭo bṛhatkṣatro mahārathaḥ /
sahasā'bhyapatatsainyaṃ tāvakaṃ pārthakāraṇāt //

dhṛṣṭaketuṃ tathā'yāntaṃ droṇahetoḥ parākramī /
vīradhanvā maheṣvāso vārayāmāsa bhārata //

tau parasparamāsādya śaradaṃṣṭrau tarasvinau /
śarairanekasāhasreranyonyamabhijaghnatuḥ //

tāvubhau naraśārdūlau yuyudhāte parasparam /
mahāvane tīvramadau vāraṇāviva yūthapau //

girigahvaramāsādya śārdūlāviva roṣitau /
yuyudhāte mahāvīryau parasparajighāṃsayā //

tadyuddhamāsīttumulaṃ prekṣaṇīyaṃ viśāmpate /
siddhacāraṇasaṅghānāṃ vismayādbhutadarśanam //

vīradhanvā tataḥ kruddho dhṛṣṭaketoḥ śarāsanam /
dvidhā ciccheda bhallena prahasanniva bhārata //

tadutsṛjya dhanucchinnaṃ cedirājo mahārathaḥ /
śaktiṃ jagrāha vipulāṃ hemadaṇḍāmayasmayīm //

tāṃ tu śaktiṃ mahāvīryāṃ dorbhyāmāyasya bhārata /
cikṣepa sahasā yatto vīradhanvarathaṃ prati //

tayā tu vīraghātinyā śaktyā tvabhihato bhṛśam /
nirbhinnahṛdayastūrṇaṃ nipapāta rathānmahīm //

tasminvinihate vīre traigartānāṃ mahārathe /
balaṃ te'bhajyata vibho pāṇḍaveyaiḥ samantataḥ //

sahadeve tataḥ ṣaṣṭiṃ sāyakāndurmukho'kṣipat /
nanāda ca mahānādaṃ tarjayanpāṇḍavaṃ raṇe //

mādreyastu tataḥ kruddho durmukhaṃ ca śitaiḥ śaraiḥ /
bhrātā bhrātaramāyatto vivyādha prahasanniva //

taṃ raṇe rabhasaṃ dṛṣṭvā sahadevaṃ mahābalam /
durmukho navabhirbāṇaistāḍayāmāsa bhārata //

durmukhasya tu bhallena cchittvā ketuṃ mahābalaḥ /
jaghāna caturo vāhāṃścaturbhirniśitaiḥ śaraiḥ //

athāpareṇa bhallena pītena niśitena ha /
ciccheda sāratheḥ kāyācchiro jvalitakuṇḍalam //

kṣurapreṇa ca tīkṣṇena kauravyasya mahaddhanuḥ /
sahadevo raṇe chittvā taṃ ca vivyādha pañcabhiḥ //

hatāśvaṃ tu rathaṃ tyaktvā durmukho vimanāstadā /
āruroha rathaṃ rājanniramitrasya bhārata //

sahadevastataḥ kruddho niramitraṃ mahāhave /
jaghāna pṛthudhāreṇa bhallena paravīrahā //

sa papāta rathopasthānniramitro janeśvaraḥ /
trigartarājasya suto vyathayaṃstava vāhinīm //

taṃ tu hatvā mahābāhuḥ sahadevo vyarocata /
yathā dāśarathī rāmaḥ kharaṃ hatvā mahābalam //

hāhākāro mahānāsīttrigartānāṃ janeśvara /
rājaputraṃ hataṃ dṛṣṭvā niramitraṃ mahāratham //

nakulaste sutaṃ rājanvikarṇaṃ pṛthulocanam /
muhūrtājjitavām̐lloke tadadbhutamivābhavat //

sātyakiṃ vyāghradattastu śaraiḥ sannataparvabhiḥ /
cakre'dṛśyaṃ sāśvasūtaṃ sadhvajaṃ pṛtanāntare //

tānnivārya śarāñśūraḥ śaineyaḥ kṛtahastavat /
sāśvasūtadhvajaṃ bāṇairvyāghradattamapātayat //

kumāre nihate tasminmāgadhasya sute prabho /
māgadhāḥ sarvato yattā yuyudhānamupādravan //

visṛjantaḥ śarāṃścaiva tomarāṃśca sahasraśaḥ /
miṇḍipālāṃstathā prāsānmudrānmusalānapi //
ayodhayanraṇe śūrāḥ sātvataṃ yuddhadurmadam //

tāṃstu sarvānsa balavānsātyakiryuddhadurmadaḥ /
nātikṛcchrāddhasanneva vijigye puruṣarṣabhaḥ //

māgadhāndravato dṛṣṭvā hataśeṣānsamantataḥ /
balaṃ te'bhajyata vibho yuyudhānaśarārditam //

nāśayitvā raṇe sainyaṃ tvadīyaṃ tu samantataḥ /
vidhunvāno dhanuḥśreṣṭhaṃ vyabhrājata mahāyaśāḥ //

bhajyamānaṃ balaṃ rājansātvatena mahātmanā /
nābhyavartata yuddhāya trāsitaṃ dīrghabāhunā //

tato droṇo bhṛśaṃ kruddhaḥ sahasodvṛtya cakṣuṣī /
sātyakiṃ satyakarmāṇaṃ svayamevābhidudruve //