Mahabharata · Chapter 7.106

arjune saindhavaṃ prāpte bhāradvājena saṃvṛtāḥ /
pāñcālāḥ kurubhiḥ sārdhaṃ kimakurvata s̤añjaya //
sañjaya uvāca /

aparāhṇe mahārāja saṅgrame romaharṣaṇe /
pāñcālānāṃ kurūṇāṃ ca droṇadyūtamavartata //

pāñcālā hi jighāṃsanto droṇaṃ saṃhṛṣṭacetasaḥ /
abhyamuñcanta garjantaḥ śaravarṣāṇi māriṣa //

tatastula tumulasteṣāṃ saṅgrāmo'vartatādbhutaḥ /
pāñcālānāṃ kurūṇāṃ ca ghoro devāsuropamaḥ //

sarve droṇarathaṃ prāpya pāñcālāḥ pāṇḍavaiḥ saha /
tadanīkaṃ bibhitsanto mahāstrāṇi vyadarśayan //

droṇasya rathaparyantaṃ rathino rathamāsthitāḥ /
kampayanto'bhyavartanta vegamāsthāya madhyamam //

tamabhyayādbṛhatkṣatraḥ kekayānāṃ mahārathaḥ /
vimuñcanniśitānbāṇānmahendrāśanisannibhān //

taṃ tu pratyudyayau śīghraṃ kṣemadhūrtirmahāyaśāḥ /
vimuñcanniśitānbāṇāñśataśo'tha sahasraśaḥ //

dhṛṣṭaketuśca cedīnāmṛṣabho'tibaloditaḥ /
tvarito'bhyadravaddroṇaṃ mahendramiva śambaraḥ //

tamāpatantaṃ sahasā vyāditāsyamivāntakam /
vīradhanvā maheṣvāsastvaramāṇaḥ samabhyayāt //

yudhiṣṭhiraṃ mahārājaṃ jigīṣuṃ samavasthitam /
sahānīkaṃ tato droṇo nyavārayata vīryavān //

nakulaṃ kuśalaṃ yuddhe parākrantaṃ parākramī /
abhyagacchatsamāyāntaṃ vikarṇaste sutaḥ prabho //

sahadevaṃ tathā'yāntaṃ durmukhaḥ śatrukarśanaḥ /
śairaranekasāhasraiḥ samavākiradāśugaiḥ //

sātyakiṃ tu naravyāghraṃ vyāghradattastvavārayat /
śaraiḥ suniśitaistīkṣṇaiḥ kampayanvai muhurmuhuḥ //

draupadeyānnaravyāghrānmuñcataḥ sāyakottamān /
saṃrabdhānrathinaḥ śreṣṭhānsaumadattiravārayat //

bhīmasenaṃ tadā kruddhaṃ bhīmarūpo bhayānakaḥ /
pratyavārayadāyāntamārśyaśṛṅgirmahābalaḥ //

tayoḥ samabhavadyuddhaṃ nararākṣasayormṛdhe /
yādṛgeva purāvṛttaṃ rāmarāvaṇayornṛpa //

tato yudhiṣṭhiro droṇaṃ navatyā nataparvaṇām /
ājaghne bharataśreṣṭhaḥ sarvamarmasu bhārata //

taṃ droṇaḥ pañcaviṃśatyā nijaghāna stanāntare /
roṣito bharataśreṣṭha kaunteyena yaśasvinā //

adṛśyaṃ samare cakre rājānaṃ sāyakottamaiḥ /
sāśvasūtadhvajaṃ droṇaḥ paśyatāṃ sarvadhanvinām //

tāñśarāndroṇamuktāṃstu śaravarṣeṇa pāṇḍavaḥ /
avārayata dharmātmā darśayanpāṇilāghavam //

tato droṇo bhṛśaṃ kruddho darmarājasya saṃyuge /
ciccheda samare dhanvī dhanustasya mahātmanaḥ //

athainaṃ chinnadhanvānaṃ tvaramāṇo mahārathaḥ /
śarairanekasāhasraiḥ pūrayāmāsa sarvataḥ //

adṛśyaṃ vīkṣya rājānaṃ bhāradvājasya sāyakaiḥ /
sarvabhūtānyamanyanta hatameva yudhiṣṭhiram //

keciccainamamanyanta tathaiva vimukhīkṛtam /
hṛto rājeti rājendra brāhmaṇena mahātmanā //

sa kṛcchraṃ paramaṃ prāpto dharmarājo yudhiṣṭhiraḥ / tyaktvā tatkārmukaṃ chinnaṃ bhāradvājena saṃyuge /
ādade'nyaddhanurdivyaṃ bhāraghnaṃ vegavattaram //

tatastānsāyakāṃstatra doṇanunnānsahasraśaḥ /
ciccheda samare vīrastadadbhutamivābhavat //

chittvā tu tāñśarānrājakrodhasaṃraktalocanaḥ / śaktaṃ jagrāha samare girīṇāmapi dāriṇīm /
svarṇadaṇḍāṃ mahāghorāmaṣṭaghaṇṭāṃ bhayāvahām //

samutkṣipya ca tāṃ hṛṣṭo nanāda balavadbalī /
nādena sarvabhūtāni trāsayanniva bhārata //

śaktiṃ samudyatāṃ dṛṣṭvā dharmarājena saṃyuge /
svasti droṇāya sahasā sarvabhūtānyathābruvan //

sā rājabhujanirmuktā nirmuktoragasannibhā / prajvālayantī gaganaṃ diśaḥ sapradiśastathā /
droṇāntikamanuprāptā dīptāsyā pannagī yathā //

tāmāpatantīṃ sahasā dṛṣṭvā droṇo viśāmpate /
prāduścakrai tato brāhmamastramastravidāṃ varaḥ //

tadastraṃ bhasmasātkṛtvā tāṃ śaktiṃ ghoradarśanām /
jagāma syandanaṃ tūrṇaṃ pāṇḍavasya yaśasvinaḥ //

tato yudhiṣṭhiro rājā droṇāstraṃ tatsamudyatam /
aśāmayanmahāprājño brahmāstreṇaiva māriṣa //

vidvvā taṃ ca raṇe droṇaṃ pañcabhirnataparvabhiḥ /
kṣurapreṇa sutīkṣṇena cicchedāsya mahaddhanuḥ //

tadapāsya dhanuśchinnaṃ droṇaḥ kṣatriyamardanaḥ /
gadāṃ cikṣepa sahasā dharmaputrāya māriṣa //

tāmāpatantīṃ sahasā gadāṃ dṛṣṭvā yudhiṣṭhiraḥ /
gadāmevāgrahītkruddhaścikṣepa ca parantapa //

te gade sahasā mukte samāsādya parasparam /
saṅgharṣātpāvakaṃ muktvā sameyātāṃ mahītale //

tato droṇo bhṛśaṃ kruddho dharmarājasya māriṣa /
caturbhirniśitaistīkṣṇairhayāñjaghne śarottamaiḥ //

cicchedaikena bhallena dhanuścendradhvajopamam /
ketumekena ciccheda pāṇḍavaṃ cārdayattribhiḥ //

hatāśvāttula rathāttūrṇamavaplutya yudhiṣṭhiraḥ /
tasthāvūrdhvabhujo rājā vyāyudho bharatarṣabha //

virathaṃ taṃ samālokya vyāyudhaṃ ca viśeṣataḥ /
droṇo vyamohayacchatrūnsarvasainyāni cābhibho //

muñcaṃśceṣugaṇāṃstīkṣṇām̐llaghuhasto dṛḍhavrataḥ /
abhidudrāva rājānaṃ siṃho mṛgamivolbaṇaḥ //

tamabhidrutamālokya droṇenāmitraghātinā /
hāheti sumahāñśabdaḥ pāṇḍūnāṃ samajāyata //

hṛto rājā hṛto rājā bhāradvājena māriṣa /
ityāṃsītsumahāñśabdaḥ pāṇḍūsainyasya sarvataḥ //

tatastvaritamāruhya sahadevarathaṃ nṛpaḥ /
apāyājjavanairaśvaiḥ kuntīputro yudhiṣṭhiraḥ //