Mahabharata · Chapter 7.105

dhvajānbahuvidhākārānbhrājamānānatiśriyā /
pārthānāṃ māmakānāṃ ca tānmamācakṣva sañjaya //
sañjaya uvāca /

dhvajānbahuvidhākārāñśṛṇu teṣāṃ mahātmanām /
rūpato varṇataścaiva nāmataśca nibodha me //

teṣāṃ tu rathamukhyānāṃ ratheṣu vividhā dhvajāḥ /
pratyadṛśyanta rājendra jvalitā iva pāvakāḥ //

kāñcanāḥ kāñcanāpīḍāḥ kāñcanasragalaṅkṛtāḥ /
kāñcanānīva śṛṅgāṇi kāñcanasya mahāgireḥ //

anekavarṇā vividhā dhvajāḥ paramaśobhanāḥ / te dhvajāḥ saṃvṛtāsteṣāṃ patākābhiḥ samantataḥ /
nānāvarṇavirāṇābhiḥ śuśubhuḥ sarvato vṛtāḥ //

patākāśca tatastāstu śvasanena samīritāḥ /
nṛtyamānā vyadṛśyanta raṅgamadhye vilāsikāḥ //

indrāyudhasavarṇābhāḥ patākā bharatarṣabha /
dodhūyamānā rathināṃ śobhayanti mahārathān //

siṃhalāṅgūla ugrāsyo dhvajo vānaralakṣaṇaḥ /
dhanañjayasya saṅgrāme pratyadṛśyata bhārata //

sa vānaradhvajo rājanpatākābhiralaṅkṛtaḥ /
trāsayāmāsa tatsainyaṃ dhvajo gāṇḍīvadhanvanaḥ //

tathaiva siṃhalāṅgūlaṃ droṇaputrasya bhārata /
dhvajāghraṃ samapaśyāma bālasūryasamaprabham //

kāñcanaṃ pavanoddhūtaṃ śakradhvajasamaprabham /
nandanaṃ kauravendrāṇāṃ drauṇerlakṣma samucchritam //

hastikakṣyā punarhaimī babhūvādhiratherdhvajaḥ /
āhave khaṃ mahārāja dadṛśe pūrayanniva //

patākī kāñcanaḥ sragvī dhvajaḥ karṇasya saṃyuge /
nṛtyatīva rathopasthe śvasanena samīritaḥ //

ācāryasya tu pāṇḍūnāṃ brāhmaṇasya tapasvinaḥ /
govṛṣo gautamasyāsītkṛpasya supariṣkṛtaḥ //

sa tena bhrājate rājangovṛṣeṇa mahārathaḥ /
tripuraghnaratho yadvadgovṛṣeṇa virājatā //

mayūro vṛṣasenasya kāñcano maṇiratnavān /
vyāhariṣyannivātiṣṭhatsenāgramupaśobhayan //

tena tasya ratho bhāti mayūreṇa mahātmanaḥ /
yathā skandasya rājendra mayūreṇa virājatā //

madrarājasya śalyasya dhvajāgre'gniśikhāmiva /
sauvarṇīṃ pratipaśyāma sītāmapratimāṃ śubhām //

sā sītā bhrājate tasya rathamāsthāya māriṣa /
sarvabījavirūḍheva yathā sītā śriyā vṛtā //

varāhaḥ sindhurājasya rājato'bhivirājate /
dhvajāgre lohitāṅgābho hemajālapariṣkṛtaḥ //

śuśubhe ketunā tena rājatena jayadrathaḥ /
yathā devāsure yuddhe purā pūṣā sma śobhate //

saumadatteḥ punaryūpo yajñaśīlasya dhīmataḥ /
dhvajaḥ sūrya ivābhāti somaścātra pradṛśyate //

sa yūpaḥ kāñcano rājansaumadattervirājate /
rājasūye makhaśreṣṭhe yathā yūpaḥ samucchritaḥ //

śalasya tu mahārāja rājato dvirado mahān /
ketuḥ kāñcanacitrāṅgairmayūrairupaśobhitaḥ //

sa ketuḥ śobhayāmāsa sainyaṃ te bharatarṣabha /
yathā śveto mahānāgo devarājacamūṃ tathā //

nāgo maṇimayo rājño dhvajaḥ kanakasaṃvṛtaḥ /
kiṅkiṇīśatasaṃhādo bhrājaṃścitro rathottame //

vyabhrājata bhṛśaṃ rājanputrastava viśāmpate /
dhvajena mahatā saṅkhye kurūṇāmṛṣabhastadā //

navaite tava vāhinyāmucchritāḥ paramadhvajāḥ /
vyadīpayaṃste pṛtanāṃ yugāntādityasannibhāḥ //

daśamastvarjunasyāsīdeka eva mahākapiḥ /
adīpyatārjuno yena himavāniva śambhunā //

tataścitrāṇi śubhrāṇi sumahānti mahārathāḥ /
kārmukāṇyādadustūrṇamarjunārthe parantapāḥ //

tathaiva dhanurāyacchatpārthaḥ śatruvināśanaḥ /
gāṇḍīvaṃ divyakarmā tadrājandurmantrite tava //

tavāparādhādrājāno nihatā bahuśo yudhi /
nānādigbhyaḥ samāhūtāḥ sahayāḥ sarathadvipāḥ //

teṣāmāsīdvyātikṣepo gajartāmitaretaram /
duryodhanamukhānāṃ ca pāṇḍūnāmṛṣabhasya ca //

tatrādbhutaṃ paraṃ cakre kaunteyaḥ kṛṣṇasārathiḥ /
yadeko bahubhiḥ sārghaṃ samāgacchadabhītavat //

aśobhata mahābāhurgāṇḍīvaṃ vikṣipandhanuḥ /
jigīṣustānnaravyāghro jighāṃsuśca jayadratham //

tatrārjuno naravyāghraḥ śarairmuktaiḥ sahasraśaḥ /
adṛśyāṃstāvakānyodhānpracakre śatrutāpanaḥ //

tataste'pi naravyāghrāḥ pārthaṃ sarve mahārathāḥ /
adṛśyaṃ samare cakruḥ sāyakaughaiḥ samantataḥ //

saṃvṛte narasiṃhaistu kūrūṇāmṛṣabhe'rjune /
mahānāsītsamudbhūtastasya sainyasya niḥsvanaḥ //