Mahabharata · Chapter 7.104

tāvakāstvabhisamprekṣya vṛṣṇyandhakarūdvahau /
satvarāstau jighāṃsantastathaiva vijayaḥ parān //

suvarṇacitrairvaiyāghraiḥ svanavadbhirmahārathaiḥ /
dīpayanto diśaḥ sarvā jvaladbhiriva pāvakaiḥ //

rukmapuṅkhaiśca duṣprekṣyaiḥ kārmukaiḥ pṛthivīpate /
kūjadbhiratulānnādanroṣitairuragairiva //

bhūriśravāḥ śalaḥ karṇo vṛṣaseno jayadrathaḥ /
kṛpaśca madrarājaśca droṇiśca rathināṃ varaḥ //

te pibanta ivākāśamaśvairaṣṭau mahārathāḥ /
vyarājayandaśa diśo vaiyārghrairhemacandrakaiḥ //

te daṃśitāḥ susaṃrabdhā rathairmeghaughaniḥsvanaiḥ /
samāvṛṇvandaśa diśaḥ pārthasya niśitaiḥ śaraiḥ //

kaulūtakā hayāścitrā vahantastānmahārathān /
vyaśobhanta tadā śīghrā dīpayanto diśo daśa //

ājāneyairmahāvegairnānādeśasamutthitaiḥ /
pārvatīyairnadījaiśca saindhavaiśca hayottamaiḥ //

kuruyodhavarā rājaṃstava putraṃ parīpsavaḥ /
dhanañjayarathaṃ śīghraṃ sarvataḥ samupādravan //

te pragṛhya mahāśaṅkhāndadhmuḥ puruṣasattamāḥ /
pūrayanto divaṃ rājanpṛthivīṃ ca sasāgarām //

tathaiva dadhmatuḥ śaṅkhau vāsudevadhanañjayau /
pravarau sarvadevānāṃ sarvaśaṅkhavarau bhuvi //

devadattaṃ ca kaunteyaḥ pāñcajanyaṃ ca keśavaḥ /
śabdastu devadattasya dhanañjayasamīritaḥ //

pṛthivīṃ cāntarikṣaṃ ca diśaścaiva samāvṛṇot /
tathaiva pāñcajanyo'pi vāsudevasamīritaḥ //

sarvaśabdānatikramya pūrayāmāsa rodasī /
tasmiṃstathā vartamāne dāruṇe nādasaṅkule //

bhīrūṇāṃ trāsajanane śūrāṇāṃ harṣavardhane /
pravāditāsu bherīṣu jharjhareṣvānakeṣu ca //

mṛdaṅgeṣvapi rājendra vādyamāneṣvenakaśaḥ /
mahārathasamākhyātā duryodhanahitaiṣiṇaḥ //

amṛṣyamāṇāstaṃ śabdaṃ kruddhāḥ paramadhanvinaḥ /
karṇādayo maheṣvāsāstvatsainyaparirakṣiṇaḥ //

amarṣitā mahāśaṅkhāndadhmurvīrā mahārathāḥ /
kṛte pratikariṣyantaḥ keśavasyārjunasya ca //

babhūva tava tatsainyaṃ śaṅkhaśabde samīrite /
udvignarathanāgāśvamasvasthamiva cābhibhoṃ //

tatprahṛṣṭajanābādhaṃ bherīśaṅkhanināditam /
babhūva bhṛśamudvignaṃ nirghātairiva saṃvṛtam //

sa śabdaḥ sumahānrājandiśaḥ sarvā vyanādayat /
trāsayāmāsa tatsainyaṃ yugānta iva sambhṛtaḥ //

tato duryodhano'ṣṭau ca rājānaste mahārathāḥ /
jayadrathasya rakṣārthaṃ pāṇḍavaṃ paryavārayan //

tato drauṇistrisaptatyā vāsudevamatāḍayat /
arjunaṃ ca tribhirbhallairdhvajamaśvāṃśca pañcabhiḥ //

tamarjunaḥ pṛṣatkānāṃ śataiḥ ṣaṅbhiratāḍayat /
atyarthamiva saṅkruddhaḥ pratividdhe janārdane //

karṇaṃ ca daśabhirviddhvā vṛṣasenaṃ tribhistathā /
śalyasya saśaraṃ cāpaṃ muṣṭau ciccheda vīryavān //

gṛhītvā dhanuranyattu śalyo vivyādha pāṇḍavam /
bhūriśravāstribhirbāṇairhemapuṅkhaiḥ śilāśitaiḥ //

karṇo dvātriṃśatā caiva vṛṣasenaśca saptabhiḥ / jayadrathastrisaptatyā kṛpaśca daśabhiḥ śaraiḥ /
madrājaśca daśabhirvivyadhuḥ phalgunaṃ raṇe //

tataḥ śarāṇāṃ ṣaṣṭyā tu drauṇiḥ pārthamavākirat /
vāsudevaṃ ca viṃśatyā punaḥ pārthaṃ ca pañcabhiḥ //

prahasaṃstu naravyāghraḥ śvetāśvaḥ kṛṣṇasārathiḥ /
pratyavidhyatsa tānsarvāndarśayanpāṇilāghavam //

karṇaṃ dvādaśabhirvidvvā vṛṣasenaṃ tribhiḥ śaraiḥ /
śalyasya saśaraṃ cāpaṃ muṣṭideśe vyakṛntata //

saumadattiṃ tribhirvidvvā śalyaṃ ca daśabhiḥ śaraiḥ /
śitairagniśikhākārairdrauṇiṃ vivyādha cāṣṭabhiḥ //

gautamaṃ pañcaviṃśatyā saindhavaṃ ca śatena ha /
punardrauṇiṃ ca saptatyā śarāṇāṃ so'bhyatāḍayat //

bhūriśravāstu saṅkruddhaḥ pratodaṃ cicchide hareḥ /
arjunaṃ ca trisaptatyā bāṇānāmājaghāna ha //

tataḥ śaraśataistīkṣṇaistānarīnśvetavāhanaḥ /
pratyaṣedhaddrutaṃ kruddho mahāvāto ghanāniva //