Mahabharata · Chapter 7.103

evamuktvā'rjunaṃ rājā tribhirmarmātigaiḥ śaraiḥ /
abhyavidhyanmahāvegaiścaturbhiścaturo hayān //

vāsudevaṃ ca daśabhiḥ pratyavidhyatstanāntare /
pratodaṃ cāsya bhallena cchittvā bhūmāvapātayat //

taṃ caturdaśabhiḥ pārthaścitrapuṅkhaiḥ śilāśitaiḥ /
avidhyattūrṇamavyagraste cābhraśyanta varmaṇi //

teṣāṃ naiṣphalyamālokya punarnava ca pañca ca /
prāhiṇonniśitānbāṇāṃste cābhraśyanta varmaṇaḥ //

aṣṭāviṃśāṃstu tānbāṇānastānviprekṣya niṣphalān /
abravītparavīraghnaḥ kṛṣṇo'rjunamidaṃ vacaḥ //

adṛṣṭapūrvaṃ paśyāmi śilānāmiva sarpaṇam /
tvayā sampreṣitāḥ pārtha nārthaṃ kurvanti patriṇaḥ //

kaccidgāṇḍīvajaḥ prāṇastathaiva bharatarṣabha /
muṣṭiśca te yathā pūrvaṃ bhujayośca balaṃ tava //

na vā kaccidayaṃ kālaḥ prāptaḥ syādadya paścimaḥ /
tava caivāsya śatrośca tanmamācakṣva pṛcchataḥ //

vismayo me mahānpārtha tava dṛṣṭvā śarānimān /
vyarthānnipatitānsaṅkhe duryodhanarathaṃ prati //

vajrāśanisamā ghorāḥ parakāyāvabhedinaḥ /
śarāḥ kurvanti te nārthaṃ pārtha kā'dya viḍambanā //
arjuna uvāca /

droṇena niyataṃ kṛṣṇa dhārtarāṣṭre nidarśitam /
ante vihitamastrāṇāmetatkavacadhāraṇam //

asminnantarhitaṃ kṛṣṇa trailokyamapi varmaṇi /
eko droṇo hi vaidaitadahaṃ tasmācca sattamāt //

na śakyametatkavacaṃ bāṇairbhettuṃ kathañcana /
api vajreṇa govinda svayaṃ maghavatā yudhi //

jānaṃstvamapi vai kṛṣṇa māṃ vimohayase katham /
yadvṛttaṃ triṣu lokeṣu yacca keśava vartate //

yathā bhaviṣyadyaccaiva tatsarvaṃ viditaṃ tava /
na tvidaṃ veda vai kaścidyathā tvaṃ madhusūdana //

eṣa duryodhanaḥ kṛṣṇa droṇena vihitāmimām /
tiṣṭhatyabhītavatsaṅkhye bibhratkavacadhāraṇām //

yattvatra vihitaṃ kāryaṃ naiṣa tadvetti mādhava /
strīvadeṣa bibhartyetāṃ yuktāṃ kavacadhāraṇām //

paśya bāhvośca me vīryaṃ dhanuṣaśca janārdana /
parājayiṣye kauravyaṃ kavacenāpi rakṣitam //

idamaṅgirase prādāddeveśo varma bhāsvaram /
tasmādvṛhaspatiḥ prāpa tataḥ prāpa purandaraḥ //

punardadau surapatirmahyaṃ varma sasaṅgraham / daivaṃ yadyasya varmaitadbrahmaṇā vā svayaṃ kṛtam /
nainaṃ gopsyati durbuddhimadya bāṇahataṃ mayā //
sañjaya uvāca /

evamuktvā'rjuno bāṇānabhimantrya vyakarṣayat /
mānavāstreṇa mānārhastīkṣṇāvaraṇabhedinā //

vikṛṣyamāṇāṃstenaiva dhanurmadhyagatāñcharān /
tānasyāstreṇa ciccheda drauṇiḥ sarvāstraghātinā //

tānnikṛttāniṣūndṛṣṭvā dūrato brahmavādinā /
nyavedayatkeśavāya vismitaḥ śvetavāhanaḥ //

naitadastraṃ mayā śakyaṃ dviḥ prayoktuṃ janārdana /
astraṃ māmeva hanyāddhi hanyāccāpi balaṃ mama //

tato duryodhanaḥ kṛṣṇau navabhirnavabhiḥ śaraiḥ /
avidhyata raṇe rājañśarairāśīviṣopamaiḥ //

bhūya evābhyavarṣacca samare kṛṣṇapāṇḍavau / śaravarṣeṇa mahatā tato'hṛṣyanta tāvakāḥ /
cakrurvāditraninadānsiṃhanādaravāṃstathā //

tataḥ kruddho raṇe pārthaḥ sṛkviṇī parisaṃlihan /
nāpaśyacca tato'syāṅgaṃ yanna syādvarmarakṣitam //

tato'sya niśitairbāṇaiḥ sumuktairantakopamaiḥ /
hayāṃścakāra nirdehānubhau ca pārṣṇisārathī //

dhanurasyācchinattūrṇaṃ hastāvāpaṃ ca vīryavān /
rathaṃ ca śakalīkartuṃ savyasācī pracakrame //

duryodhanaṃ ca bāṇābhyāṃ tīkṣṇābhyāṃ virathīkṛtam /
āviddhyaddhastatalayorubhayorarjunastadā //

[prayatnajño hi kauntayo nakhamāṃsāntareṣubhiḥ / sa vedanābhirāvignaḥ palāyanaparāyaṇaḥ // ]

taṃ kṛcchrāmāpadaṃ prāptaṃ dṛṣṭvā paramadhanvinaḥ /
samāpetuḥ parīpsanto dhanañjayaśarārditam //

taṃ rathairbahusāhasraiḥ kalpitaiḥ kuñjarairhayaiḥ /
padātyoghaiśca saṃrabdhaiḥ parivavrurdhanañjayam //

atha nārjunagovindau na ratho vā vyadṛśyata /
astravarṣeṇa mahatā śaraughaiścāpi saṃvṛtau //

tato'rjuno'stravīryeṇa nijaghne tāṃ varūthinīm /
tatra vyaṅgī kṛtāḥ petuḥ śataśo'tha rathadvipāḥ //

te hatā hanyamānāśca nyagṛhṇaṃstaṃ rathottamam /
sa rathaḥ stambhitastasthau krośamātre samantataḥ //

tato'rjunaṃ vṛṣṇivīrastvarito vākyamabravīt /
dhanurviṣphārayātyarthamahaṃ dhmāsyāmi cāmbujam //

tato viṣphārya balavadgāṇḍīvaṃ jaghnivānripūn /
mahatā śaravarṣeṇa talaśabdena cārjunaḥ //

pāñcajanyaṃ ca balavāndadhmau tāreṇa keśavaḥ /
rajasā dhvastapakṣmāntaḥ prasvinnavadano bhṛśam //

tenācyutoṣṭhapuṭapūritamārutena śaṅkhāntarodaravivṛddhaviniḥsṛtena /
nādena sāsuraviyatsuralokapāla-- mudvignamīśvara jagatsphuṭatīva sarvam //

tasya śaṅkhasya nādena dhanuṣo niḥsvanena ca /
niḥsatvāśca sasatvāśca kṣitau petustadā janāḥ //

tairvimukto ratho reje vāyvīrita ivāmbudaḥ /
jayadrathasya goptārastataḥ kṣubdhāḥ sahānugāḥ //

te dṛṣṭvā sahasā pārthaṃ goptāraḥ saindhavasya tu /
cakrurnādānmaheṣvāsāḥ kampayanto vasundharām //

bāṇaśabdaravāṃścogrānvimiśrāñśaṅkhaniḥsvanaiḥ /
prāduścakrurmahātmānaḥ siṃhanādaravānapi //

taṃ śrutvā ninadaṃ ghoraṃ tāvakānāṃ samutthitam /
pradadhmatuḥ śaṅkhavarau vāsudevadhanañjayau //

tena śabdena mahatā pūriteyaṃ vasundharā /
saśailā sārṇavadvīpā sapātālā viśāmpate //

sa śabdo bharataśreṣṭha vyāpya sarvā diśo daśa /
pratisasvāna tatraiva kurupāṇḍavayorbale //

tāvakā rathinastatra dṛṣṭvā kṛṣṇadhanañjayau /
sambhramaṃ paramaṃ prāptāstvaramāṇā mahārathāḥ //

atha kṛṣṇau mahābhāgau tāvakā vīkṣya daṃśitau /
abhyadravanta saṅkruddhāstadadbhutamivābhavat //