Mahabharata · Chapter 7.100

salile janite tasminkaunteyena mahātmanā /
nistārite dviṣatsainye kṛte ca śaraveśmani //

vāsudevo rathāttūrṇamavatīrya mahādyutiḥ /
mocayāmāsa turagānvinunnānkaṅkapatribhiḥ //

adṛṣṭapūrvaṃ taddṛṣṭvā sādhuvādo mahānabhūt /
siddhacāraṇasaṅghānāṃ sainikānāṃ ca sarvaśaḥ //

padātinaṃ tu kaunteyaṃ yudhyamānaṃ mahārathāḥ /
nāśaknuvanvārayituṃ tadadbhutamivābhavat //

āpatatsu rathaugheṣu prabhūtagajavājiṣu /
nāsambhramattadā pārthastadasya puruṣānati //

vyasṛjanta śaraughāṃste pāṇḍavaṃ prati pārthivāḥ /
na cāvyathata dharmātmā vāsaviḥ paravīrahā //

śatāni śarajālāni gadāḥ prāsāṃśca vīryavān /
āgatānagrasatpārthaḥ saritaḥ sāgaro yathā //

astravegena mahatā pārtho bāhubalena ca /
sarveṣāṃ pārthivendrāṇāmagrasattāñśarottamān //

tattu pārthasya vikrāntaṃ vāsudevasya cobhayoḥ /
apūjayanmahārāja kauravā mahadadbhutam //
kauravā ūcuḥ /

kimadbhutatamaṃ loke bhavitā'pyathavā hyabhūt /
yadaśvānpārtha govindau pāyayāmāsatū raṇe //

bhayaṃ vipulamasmāsu tāvadhattāṃ narottamau / tejo vidadhatuścograṃ yatsainyaṃ tāvakaṃ vibho /
dadhāraiko raṇe pārtho velevodvṛttamarṇavam //

pārthasya śarasañchanne tasminsadmani bhārata /
ākāśamiva samprāpya vicerustatra pakṣiṇaḥ //

na cainaṃ yudhi tiṣṭhantaṃ sainyeṣu tava māriṣa /
abhyadravatsusaṅkruddhaḥ pumānkaścittu tāvakaḥ //

sarve vimanaso'bhūvaṃstava yodhā viśāmpate /
samprekṣya tatra govindaṃ pāṇḍavaṃ ca dhanañjayam //

atha smayanhṛṣīkeśaḥ strīmadhya iva bhārata /
arjunena kṛte saṅkhye śaragarbhagṛhe tadā //

upāvartayadavyagrastānaśvānpuṣkarekṣaṇaḥ /
miṣatāṃ sarvasainyānāṃ tvadīyānāṃ viśāmpate //

upāvṛttyotthitānaśvānpāṇibhyāṃ puṣkarekṣaṇaḥ /
sammārjayanraṇe rājanpaśyatāṃ sarvayodhinām //

teṣāṃ śramaṃ ca glāniṃ ca vamathuṃ vepathuṃ vraṇān /
sarvaṃ vyapānudatkṛṣṇaḥ kuśalo hyaśvakarmaṇi //

śalyānuddhṛtya pāṇibhyāṃ parimṛjya ca tānhayān /
upāvartya yathānyāyaṃ pāyayāmāsa vāri saḥ //

sa tām̐llabdhodakānsnātāñjagdhānnānvigataklamān /
yojayāmāsa saṃhṛṣṭaḥ punareva rathottame //

sa taṃ rathavaraṃ śauriḥ sarvaśastrabhṛtāṃ varaḥ /
samāsthāya mahātejāḥ sārjunaḥ prayayau drutam //

yojayitvā hayāṃstasya vidhidṛṣṭena karmaṇā /
raṇe cacāra govindastṛṇīkṛtya mahārathān //

rathaṃ rathavarasyājau yuktaṃ labdhodakairhayaiḥ /
dṛṣṭvā kurubalaśreṣṭhāḥ punarvimanaso'bhavan //

viniḥsvasantaste rājanbhagnadaṃṣṭrā ivoragāḥ /
ghigaho'tigataḥ pārthaḥ kṛṣṇaścetyabruvanpṛthak //

tatsainyaṃ sarvato dṛṣṭvā romaharṣaṇamadbhutam /
tvaradhvamiti cākrandannaitadastīti cāvuvan //

sarvakṣatrasya miṣato rathenaikena daṃśitau /
bālaḥ krīḍanakeneva kadarthīkṛtya no balam //

krośatāṃ yatamānānāmasaṃsaktau parantapau /
darśayitvā'tmano vīryaṃ prayātau sarvarājasu //

yathā devāsure yuddhe tṛṇīkṛtya ca dānavān /
indrāviṣṇū purā rājañjambhasya vadhakāṅkṣiṇau //

tau prayātau punardṛṣṭvā tadā'nye sainikābruvan /
tvaradhvaṃ kuravaḥ sarve vadhe kṛṣṇakirīṭinoḥ //

rathaṃ yuṅktvā hi dāśārho miṣatāṃ sarvadhanvinām /
jayadrathāya yātyeṣa kadarthīkṛtya no raṇe //

tatra kecinmitho rājansamabhāṣanta bhūmipāḥ /
adṛṣṭapūrvaṃ saṅgrāme tadṛṣṭvā mahadadbhutam //

sarvasainyāni rājā ca dhṛtarāṣṭro'tyayaṃ gataḥ /
duryodhanāparāghena kṣatraṃ kṛtsnā ca medinī //

vilayaṃ samanuprāptā tacca rājā na budhyate /
ityevaṃ kṣatriyāstatra bruvantyanye ca bhārata //

sindhurājasya yatkṛtyaṃ gatasya yamasādanam /
tatkarotu vṛthādṛṣṭirdhārtarāṣṭro'nupāyavit //

tataḥ śīghrataraṃ prāyātpāṇḍavaḥ saindhavaṃ prati /
vivartamāne tigmāṃśau hṛṣṭaiḥ pītodakairhayaiḥ //

taṃ prayāntaṃ mahābāhuṃ sarvaśastrabhṛtāṃ varam /
nāśaknuvanvārayituṃ yodhāḥ kruddhamivāntakam //

vidrāvya tu tataḥ sainyaṃ pāṇḍavaḥ śatrutāpanaḥ /
yathā mṛgagaṇānsiṃhaḥ saindhavārthe vyaloḍayat //

gāhamānastvanīkāni tūrṇamaśvānacodayat /
balākābhaṃ tu dāśārhaḥ pāñcajanyaṃ vyanādayat //

kaunteyenāgrataḥ sṛṣṭā nyapatanpṛṣṭhataḥ śarāḥ /
tūrṇāttūrṇataraṃ hyaśvāḥ prāvahanvātaraṃhasaḥ //

tato nṛpatayaḥ kruddhāḥ parivavrurdhanañjayam /
kṣatriyā bahavaścānye jayadrathavadhaiṣiṇam //

sainyeṣu viprayāteṣu dhiṣṭhitaṃ puruṣarṣabham /
duryodhano'tvayātpārthaṃ tvaramāṇo mahāhave //

vātoddhūtapatākaṃ taṃ rathaṃ jaladaniḥsvanam /
ghoraṃ kapidhvajaṃ dṛṣṭvā viṣaṇṇā rathino'bhavan //

divākare'tha rajasā sarvataḥ saṃvṛte bhṛśam /
śarārtāścaraṇe yodhāḥ śekuḥ kṛṣṇau na vīkṣitum //