Mahabharata · Chapter 7.101

sraṃsanta iva majjānastāvakānāṃ bhayānnṛpa /
tau dṛṣṭvā samatikrāntau vāsudevadhanañjayau //

sarve tu pratisaṃrabdhā hīmantaḥ satvacoditāḥ /
sthirībhūtā mahātmānaḥ pratyagacchandhanañjayam //

ye gatāḥ pāṇḍavaṃ yuddhe roṣāmarṣasamanvitāḥ /
te'dyāpi na nivartante sindhavaḥ sāgarādiva //

asantastu nyavartanta vedebhya iva nāstikāḥ /
narakaṃ bhajamānāste pratyapadyanta kilbiṣam //

tāvatītya rathānīkaṃ vimuktau puruṣarṣabhau /
dadṛśāte yathā rāhorāsyānmuktau prabhākarau //

matsyāviva mahājālaṃ vidārya vigataklamau /
tathā kṛṣṇāvadṛśyetāṃ senājālaṃ vidārya tat //

vimuktau śastrasambādhādroṇānīkātsudurbhidāt /
adṛśyetāṃ mahātmānau kālasūryāvivoditau //

astrasambādhanirmuktau vimuktau śastrasaṅkaṭāt /
adṛśyetāṃ mahātmānau śatrusambādhakāriṇau //

vimuktau jvalanasparśānmakarāsyājjhaṣāviva /
akṣobhayetāṃ senāṃ tau samudraṃ makarāviva //

tāvakāstava putrāśca droṇānīkasthayostayoḥ /
naitau tariṣyato droṇamiti cakrustadā matim //

tau tu dṛṣṭvā vyatikrāntau droṇānīkaṃ mahādyutī /
nāśaśaṃsurmahārāja sindhurājasya jīvitam //

āśā balavatī rājansindhurājasya jīvite /
droṇahārdikyayoḥ kṛṣṇau na mokṣyete iti prabho //

tāmāśāṃ viphalīkṛtya santīrṇau tau parantapau /
droṇānīkaṃ mahārāja bhojānīkaṃ ca dustaram //

atha dṛṣṭvā vyatikrāntau jvalitāviva pāvakau /
nirāśāḥ sindhurājasya jīvitaṃ na śaśaṃsire //

mithaśca samabhāṣetāmabhītau bhayavardhanau /
jayadrathavadhe vācastāstāḥ kṛṣṇadhanañjayau //

asau madhye kṛtaḥ ṣaṅbhirdhārtarāṣṭrairmahārathaiḥ /
cakṣurviṣayasamprāpto na me mokṣyati saindhavaḥ //

yadyasya samare goptā śakro devagaṇaiḥ saha /
tathāpyenaṃ nihaṃsyāva iti kṛṣṇāvabhāṣatām //

iti kṛṣṇau mahābāhū mithaḥ kathayatāṃ tadā /
sindhurājamavekṣantau tvatputrā bahu cukruśuḥ //

atītya marudhanvānaṃ prayāntau tṛṣitau gajau /
pītvā vāri samāśvastau tathaivāstāmarindamau //

vyāghrasiṃhagajākīrṇānatikramya ca parvatān /
vaṇijāviva dṛśyetāṃ hīnamṛtyū jarātigau //

tathāhi mukhavarṇo'yamanayoriti menire /
tāvakā vīkṣya muktau tau vikrośanti sma sarvaśaḥ //

droṇādāśīviṣākārājjvalitādiva pāvakāt /
anyebhyaḥ pārthivebhyaśca bhāsvantāviva bhāskarau //

vimuktau sāgaraprakhyādroṇānīkādarridamau /
adṛśyetāṃ mudā yuktau samuttīryārṇavaṃ yathā //

astraughānmahato muktau droṇahārdikyarakṣitāt /
rocamānāvadṛśyetāmindrāgnyoḥ sadṛśau raṇe //

udbhinnarudhirau kṛṣṇau bhāradvājasya sāyakaiḥ /
śitaiścitau vyarocetāṃ karṇikārairivācalau //

droṇagrāhahūdānmuktau śaktyāśīviṣasaṅkaṭāt /
ayaḥśarogramakarātkṣatriyapravarāmbhasaḥ //

jyāghoṣatalanirhādādgadānistriṃśavidyutaḥ /
droṇāstrameghānnirmuktau sūryendū timirādiva //

bāhubhyāmiva santīrṇau sindhuṣaṣṭhāḥ samudragāḥ /
tapānte saritaḥ pūrṇā mahāgrāhasamākulāḥ //

mahāśailoccayāṃ ghorāṃ laṅghayitvā mahānadīm /
nistīrṇāvadhvagau yadvattadvattau tāritau raṇe //

iti kṛṣṇau maheṣvāsau praśastau lokaviśrutau /
sarvabhūtānyamanyanta droṇāstrabalavāraṇāt //

jayadrathaṃ samīpasthamavekṣantau jighāṃsayā /
ruruṃ vanānte lipsantau vyāghravattāvatiṣṭhatām //

yathā hi mukhavarṇo'yamanayoriti menire /
tava yodhā mahārāja hatameva jayadratham //

lohitākṣau mahābāhū saṃyuktau kṛṣṇapāṇḍavau /
sindhurājamabhiprekṣya hṛṣṭau vyanadatāṃ muhuḥ //

śaurerabhīṣuhastasya pārthasya ca dhanuṣmataḥ /
tayorāsītprabhā rājansūryapāvakayoriva //

harṣa eva tayorāsīddroṇānīkapramuktayoḥ /
samīpe saindhavaṃ dṛṣṭvā śyenayorāmiṣaṃ yathā //

tau tu saindhavamālokya vartamānamivāntike /
sahasā petatuḥkruddhau kṣipraṃ śyenāvivāmipam //

tau dṛṣṭvā tu vyatikrāntau hṛṣīkeśadhanañjayau /
sindhurājasya rakṣārthaṃ parākrāntaḥ sutastava //

droṇenābaddhakavaco rājā duryodhanastataḥ /
yayāvekarathenājau hayasaṃskarāvitprabho //

kṛṣṇapārthau maheṣvāsau vyatikramyātha te sutaḥ /
agrataḥ puṇḍarīkākṣaṃ pratīyāya narādhipa //

tataḥ sarveṣu sainyeṣu vāditrāṇi prahṛṣṭavat /
prāvādyanta vyatikrānte tava putre dhanañjayam //

siṃhanādaravāścāsañśaṅkhaśabdavimiśritāḥ /
dṛṣṭvā duryodhanaṃ tatra kṛṣṇayoḥ pramukhe sthitam //

ye ca te sindhurājasya goptāraḥ pāvakopamāḥ /
te prāhṛṣyanta samare dṛṣṭvā putraṃ tava prabho //

dṛṣṭvā duryodhanaṃ kṛṣṇo vyatikrāntaṃ sahānugam /
abravīdarjunaṃ rājanprāptakālamidaṃ vacaḥ //