Mahabharata · Chapter 6.91

irāvantaṃ tu nihataṃ dṛṣṭvā pārthā mahārathāḥ /
sangrāme kimakurvanta tanmamācakṣva sañjaya //
sañjaya uvāca /

irāvantaṃ tu nihataṃ sangrāme vīkṣya rākṣasaḥ /
vyanadatsumahānādaṃ bhaimasenirghaṭotkacaḥ //

nadatastasya śabdena pṛthivī sāgarāmbarā /
saparvatavanā rājaṃścacāla subhṛśaṃ tadā //

antarikṣaṃ diśaścaiva sarvāśca pradiśastathā . celuśca sahasā tatra tena nādena nāditāḥ

taṃ śrutvā sumahānādaṃ tava sainyasya bhārata // ūrustambhaḥ samabhavadvepathuḥ sveda eva ca /

sarva eva mahārāja tāvakā dīnacetasaḥ // sarvataḥ samaceṣṭanta siṃhabhītā gajā iva /

narditvā sumahānādaṃ nirghātamiva rākṣasaḥ // jvalitaṃ śūlamudyamya rūpaṃ kṛtvā vibhīṣaṇam /

nānārūpapraharaṇairvṛto rākṣasapuṅgavaiḥ // ājaghāna susankruddhaḥ kālāntakayamopabhaḥ /

tamāpatantaṃ samprekṣya sankruddhaṃ bhīmadarśanam // svabalaṃ ca bhayāttasya prāyaśo vimukhīkṛtam /

tato duryodhano rājā ghaṭotkacamupādravat // pragṛhya vipulaṃ cāpaṃ siṃhavadvinadanmuhuḥ /

pṛṣṭhato'nuyayau cainaṃ sravadbhiḥ parvatopamaiḥ //
kuñjarairdaśasāhasrairvaṅgānāmadhipaḥ svayam //

putraṃ tava mahārāja cukopa sa niśācaraḥ /
tataḥ pravavṛte yuddhaṃ tumulaṃ romaharṣaṇam //

rākṣasānāṃ ca rājendra duryodhanabalasya ca /
gajānīkaṃ ca samprekṣya meghabṛndamivoditam //

abhyadhāvanta sankruddhā rākṣasāḥ śastrapāṇayaḥ /
nadanto vividhānnādānmeghā iva savidyutaḥ //

śaraśaktyṛṣṭinārācairnighnanto gajayodhinaḥ /
bhiṇḍipālaistathā śūlairmudgaraiḥ saparaśvathaiḥ //

parvatāgraiśca vṛkṣaiśca nijaghnuste mahāgajān /
bhinnakumbhānvirudhirānbhinnagātrāṃśca vāraṇān //

apaśyāma mahārāja vadhyamānānniśācaraiḥ /
teṣu prakṣīyamāṇeṣu bhagneṣu gajayodhiṣu //

duryodhano mahārāja rākṣasānsamupādravat /
amarṣavaśamāpannastyaktvā jīvitātmanaḥ //

mumoca niśitānbāṇānrākṣaseṣu parantapa /
jaghāna ca maheṣvāsaḥ pradhānāṃstatra rākṣasān //

sankruddho bharataśreṣṭha putro duryodhanastava /
vegavantaṃ mahāraudraṃ vidyujjihvaṃ pramāthinam //

śaraiścaturbhiścaturo nijaghāna mahābalaḥ /
tataḥ punarameyātmā śaravarṣaṃ durāsadam //

mumoca bharataśreṣṭho niśācarabalaṃ prati /
tattu dṛṣṭvā mahatkarma putrasya tava māriṣa //

krodhenābhiprajajvāla bhaimasenirmahābalaḥ /
sa viṣphārya mahaccāpamindrāśanisamaprabham //

abhidudrāva vegena duryodhanamarindamam /
tamāpatantamudvīkṣya kālasṛṣṭamivāntakam //

na vivyathe mahārāja putro duryodhanastava /
athainamabravītkruddhaḥ krūraḥ saṃraktalocanaḥ //
ghaṭotkaca uvāca /

adyānṛṇyaṃ gamiṣyāmi pitṝṇāṃ mātureva ca /
ye tvayā sunṛśaṃsena dīrghakālaṃ pravāsitāḥ //

yacca te pāṇḍavā rājaṃśchaladyūte parājitāḥ /
yaccaiva draupadī kṛṣṇā evavastrā rajasvalā //

sabhāmānīya durbuddhe bahudhā kleśitā tvayā /
tava ca priyakāmena āśramasthā durātmanā //

saindhavena parāmṛṣṭā paribhūya pitṝnmama /
eteṣāmapamānānāmanyeṣāṃ ca kulādhama //

antamadya gamiṣyāmi yadi notsṛjase raṇam /
evamuktvā tu haiḍimbo mahadviṣphārya kārmukam //

sandaśya daśanairoṣṭhaṃ sṛkiṇī parisaṃlihan / śaravarṣeṇa mahatā duryodhanamavākirat /
parvataṃ vāridhārābhiḥ prāvṛṣīva balāhakaḥ //