Mahabharata · Chapter 6.88

bhīṣmaṃ tu samare kruddhaṃ pratapantaṃ samantataḥ /
na śekuḥ pāṇḍavā draṣṭuṃ tapantamiva bhāskaram //

tataḥ sarvāṇi sainyāni dharmaputrasya śāsanāt /
abhyadravanta gāṅgeyaṃ mardayantaṃ śitaiḥ śaraiḥ //

sa tu bhīṣmo raṇaślāghī tomakānsahasṛjjayān /
pāñcālāṃśca maheṣvāsānpātayāmāsa sāyakaiḥ //

te vadhyamānā bhīṣmeṇa pāñcālāḥ pāṇḍavaiḥ saha /
bhīṣmamevābhyayustūrṇaṃ tyaktvā mṛtyukṛtaṃ bhayam //

sa teṣāṃ rathināṃ vīro bhīṣmaḥ śāntanavo yudhi /
ciccheda sahasā rājanbāhūnatha śirāṃsi ca //

virathānrathinaścakre pitā devavratastava /
patitānyuttamāṅgāni hayebhyo hayasādinām //

nirmanuṣyāṃśca mātaṅgāñśayānānparvatopamān /
apaśyāma mahārāja bhīṣmāstreṇa pramāthitān //

na tatrāsītpumānkaścitpāṇḍavānāṃ viśāmpate /
anyatra rathināṃ śreṣṭhadbhīmasenānmahābalāt //

sa hi bhīṣmaṃ samāsādya chādayāmāsa sāyakaiḥ /
tato niṣṭānako ghoro bhīṣmabhīmasamāgame //

babhūva sarvasainyānāṃ ghorarūpo bhayānakaḥ /
tathaiva pāṇḍavā hṛṣṭāḥ siṃhanādamathānadan //

tato duryodhano rājā sodaryaiḥ parivāritaḥ /
bhīṣmaṃ jugopa samare vartamāne janakṣaye //

bhīmastu sārathiṃ hatvā bhīṣmasya rathināṃ varaḥ /
pradrutāśve rathe tasmindravamāṇe samantataḥ //

sunābhasya śareṇāśu śiraściccheda bhārata /
kṣurapreṇa sutīkṣṇena sa hato nyapatadbhuvi //

hate tasminmahārāja tava putre mahārathe /
nāmṛṣyanta raṇe śūrāḥ sodarāḥ sapta saṃyuge //

ādityaketurbahvāśī kuṇḍadhāro mahodaraḥ /
aparājitaḥ paṇḍitako viśālākṣaḥ sudurjayaḥ //

pāṇḍavaṃ citrasannāhā vicitrakavacadhvajāḥ /
abhyadravanta sangrāme yoddhukāmārimardanāḥ //

mahodarastu samare bhīmaṃ vivyādha patribhiḥ /
navabhirvadrasankāśairnamuciṃ vṛtrahā yathā //

ādityaketuḥ saptatyā bahvāśī cāpi pañcabhiḥ /
navatyā kuṇḍadhāraśca viśālākṣaśca pañcabhiḥ //

aparājito mahārāja parājiṣṇurmahāratham /
śarairbahubhirānarcchadbhīmasenaṃ mahābalam //

raṇe paṇḍitakaścainaṃ tribhirbāṇaiḥ samārpayat /
sa taṃ na mamṛṣe bhīmaḥ śatrubhirvadhamāhave //

dhanuḥ prapīḍya vāmena kareṇāmitrakarsanaḥ /
śiraściccheda samare śareṇānataparvaṇā //

aparājitasya sunasaṃ tava putrasya saṃyuge /
parājitasya bhīmena kṛttaṃ gāmapatacchiraḥ //

athāpareṇa bhallena kuṇḍadhāraṃ mahāratham /
prāhiṇonmṛtyulokāya sarvalokasya paśyataḥ //

tataḥ punarameyātmā prasandhāya śilīmukham /
preṣayāmāsa samare paṇḍitaṃ prati bhārata //

sa śaraḥ paṇḍitaṃ hatvā viveśa dharaṇītalam /
yathā naraṃ nihatyāśu bhujagaḥ kālacoditaḥ //

viśālākṣaśiraśchittvā pātayāmāsa bhūtale /
tribhiḥ śarairadīnātmā smarankleśaṃ purātanam //

mahodaraṃ maheṣvāsaṃ nārācena stanāntare /
vivyādha samare rājansa hato nyapatadbhuvi //

ādityaketoḥ ketuṃ ca cchittvā bāṇena saṃyuge /
bhallena bhṛśatīkṣṇena śiraściccheda bhārata //

bahvāśinaṃ tata bhīmaḥ śareṇānatarvaṇā /
preṣayāmāsa sankruddho yamasya sadanaṃ prati //

pradudruvustataste'nye putrāstava viśāmpate /
manyamānā hi tatsatyaṃ sabhāyāṃ tasya bhāṣitam //

tato duryodhano rājā bhrātṛvyasanakarśitaḥ /
abravīttāvakānyodhānbhīmo'yaṃ vadhyatāmiti //

evamete maheṣvāsāḥ putrāstva viśāmpate /
bhrātṝnsandṛśya nihatānprasmaraṃste hi tadvacaḥ //

yaduktavānmahāprājñaḥ kṣattā hitamanāmayam /
tadidaṃ samanuprāptaṃ vacanaṃ divyadarśinaḥ //

lobhamohasamāviṣṭaḥ putraprītyā janādhipa /
na budhyase purā yattattathyamuktaṃ vaco mahat //

tathaiva ca vadhārthāya putrāṇāṃ pāṇḍavo balī /
nūnaṃ jāto mahābāhuryathā hanti sma kauravān //

tato durayodhano rājā bhīṣmamāsādya saṃyuge /
duḥkhena mahatā'viṣṭo vilalāpa suduḥkhitaḥ //

nihatā bhrātaraḥ śūrā bhīmasenena me yudhi /
yatamānāstathānye'pi hanyante sarvasainikāḥ //

bhavāṃśca madhyasthatayā nityamasmānupekṣate /
so'haṃ kupathamārūḍhaḥ paśya daivamidaṃ mama //

etacchrutvā vacaḥ krūraṃ pitā devavratastava /
duryodhanamidaṃ vākyamabravītsamāśrulocanaḥ //

uktametanmayā pūrvaṃ droṇena vidureṇa ca /
gāndhāryā ca yaśasvinyā tattvaṃ tāta na buddhavān //

samayaśca mayā pūrvaṃ kṛto vai śatrukarśana /
nāhaṃyudhi niyoktavyo nāpyācāryaḥ kathañcanā //

yaya hi dhartarāṣṭrāṇāṃ bhīmo drakṣyati saṃyuge /
haniṣyati raṇe nityaṃ satyametadbravīmi te //

sa tvaṃ rājansthiro bhūtvā raṇe kṛtvā dṛḍhāṃ matim /
yodhayasva raṇe pārthānsvargaṃ kṛtvā parāyaṇam //

na śakyaḥ pāṇḍavā jetuṃ sendrairapi surāsuraiḥ /
tasmādyuddhe sthirāṃ kṛtvā matiṃ yuddhyasva bhārata //