Mahabharata · Chapter 6.87

pariṇāmya niśāṃ tāṃ tu sukhasuptā janeśvarāḥ /
kuravaḥ pāṇḍavāścaiva punaryuddhāya niryayuḥ //

tataḥ śabdo mahānāsītsenayorubhayornṛpa /
nirgacchamānayoḥ saṅkhye yathā sāgarayoriva //

tato duryodhano rājā citraseno viviṃśatiḥ /
bhīṣmaśca rathināṃ śreṣṭho bhāradvājaśca vai dvijaḥ //

ekībhūtāḥ susaṃyattāḥ kauravāṇāṃ mahācamūm /
vyūhāya vidadhū rājanpāṇḍavānpratidaṃśitān //

kūrmavyūhaṃ tataḥ kṛtvā pitā tava viśāmpate /
sāgarapratimaṃ ghoraṃ vāhanormitaraṅgiṇam //

agrataḥ sarvasainyānāṃ bhīṣmaḥ śāntanavo yayau /
mālavairdākṣiṇātyaiśca āvantyaiśca samanvitaḥ //

tato'nantaramevāsīdbhāradvājaḥ pratāpavāna /
pulindaiḥ pāradaiścaiva tathā kṣudrakamālavaiḥ //

droṇādanantaraṃ yatto bhagadattaḥ pratāpavān /
magadhaiśca kaliṅgaiśca piśācaiśca viśāmpate //

prāgjyotiṣādanu nṛpaḥ kausalyo'tha bṛhadbalaḥ /
mekalaiḥ kuruvindaiśca traipuraiśca samanvitāḥ //

bṛhadbalādanu nṛpastrigartaḥ prasthalādhipaḥ /
kāmbhojairbahubhiḥ sārdhaṃ yavanaiśca sahasraśaḥ //

drauṇistu rabhasaḥ śūrastraigartādanu bhārata /
prayayau siṃhanādena nādayāno dharātalam //

tathā sarveṇa sainyena rājā duryodhanastadā /
drauṇeranantaraṃ prāyātsodaryaiḥ parivāritaḥ //

duryodhanādanu tataḥ kṛpaḥ śāradvato yayau /
evameṣa mahāvyūhaḥ prayayau sāgaropamaḥ //

rejustatra patākāśca śvetacchatrāṇi bhārata /
aṅgadānyatra citrāṇi mahārhāṇi dhanūṃṣi ca //

taṃ tu dṛṣṭvā mahāvyūhaṃ tāvakānāṃ mahārathaḥ /
yudhiṣṭhiro'bravīttūrṇaṃ pārṣataṃ pṛtanāpatim //

paśya vyūhaṃ maheṣvāsa nirmitaṃ sāgaropamam /
prativyūhaṃ raṇe śūra kuru kṣipraṃ mahāratha //

tataḥ sa pārṣataḥ krūro vyūhaṃ cakre sudāruṇam /
śrṛṅgāṭakaṃ mahārāja paravyūhavināśanam //

śrṛṅgābhyāṃ bhīmasenaśca sātyakiśca mahārathaḥ /
rathairanekasāhasraistathā hayapadātibhiḥ //

nābhāvabhūnnaraśreṣṭhaḥ śvetāśvaḥ kṛṣṇasārathiḥ /
madhye yudhiṣṭhiro rājā mādrīputrau ca pāṇḍavau //

athetare maheṣvāsāḥ sahasainyā narādhipāḥ /
vyūhaṃ taṃ pūrayāmāsurvyūhaśāstraviśāradāḥ //

evametaṃ mahāvyūhaṃ vyūhya bhārata pāṇḍavāḥ /
atiṣṭhansamare śūrā yoddhukāmā jayaiṣiṇaḥ //

bherīśabdaiśca vimalairvimiśraiḥ śaṅkhaniḥsvanaiḥ /
kṣveḍitāsphoṭitotkruṣṭairnāditāḥ sarvato diśaḥ //

tataḥ śūrāḥ samāsādya samare te parasparama / netrairanimiṣai rājannavaikṣanta parasparam // 6-87-24amanobhiste manuṣyendra yuddhaṃ yodhāḥ pracakrire . punarāhūya te'nyonyaṃ śarīrairapi cakrire //

tataḥ pravavṛte yuddhaṃ ghorarūpaṃ bhayāvaham /
tāvakānāṃ pareṣāṃ ca nighnatāmitaretaram //

nārācā niśitāḥ saṅkhye sampatanti sma bhārata /
vyāttānanā bhayakarā uragā iva saṅghaśaḥ //

niṣpeturvimalāḥ śaktyastailadhautāḥ sutejanāḥ /
ambudebhyo yathā rājanbhrājamānāḥ śatahradāḥ //

gadāśca vimalaiḥ paṭṭaiḥ pinaddhāḥ svarṇabhūṣitāḥ /
patantyastatra dṛsyante giriśṛṅgopamāḥ śubhāḥ //

nistriṃśāśca vyadṛśyanta vimalāmbarasannibhāḥ /
ārṣabhāṇi ca carmāṇi śatacandrāṇi bhāratata //

aśobhanta raṇe rājanpātyamānāni sarvaśaḥ /
te'nyonyaṃ samare sene yudhyamāne narādhipa //

aśobhetāṃ yathā devadaityasene samudyate /
abhyadravanta samare te'nyonyaṃ vai samantataḥ //

rathāstu rathibhistūrṇaṃ preṣitāḥ paramāhave /
yugairyugāni saṃśliṣya yuyudhuḥ pārthivarṣabhāḥ //

dantināṃ yudhyamānānāṃ sangharṣātpāvako'bhavat /
danteṣu bharataśreṣṭha sadhūmaḥ sarvato diśam //

prāsairabhihatāḥ kecidgajayodhāḥ samantataḥ /
patamānāḥ sma dṛśyante giriśṛṅgānnagā iva //

pādātāścāpyadṛśyanta nighnanto'tha parasparam /
citrarūpadharāḥ śūrā nakharaprāsayodhinaḥ //

anyonyaṃ te samāsādya kurupāṇḍavasainikāḥ /
astrairnānāvidhairghorai raṇe ninyuryamakṣayam //

tataḥ śāntanavo bhīṣmo rathaghoṣeṇa nādayan /
abhyāgamadraṇe pārthāndhanuḥśabdena mohayan //

pāṇḍavānāṃ rathāścāpi nadanto bhairavaṃ svanam /
abhyadravanta saṃyattā dhṛṣṭadyumnapurogamāḥ //

tataḥ pravavṛte yuddhaṃ tava teṣāṃ ca bhārata /
narāśvarathanāgānāṃ vyatiṣaktaṃ parasparam //