Mahabharata · Chapter 6.78

tato duryodhano rājā mahotpratyāgatasmṛtiḥ /
śaravarṣaiḥ punarbhīmaṃ pratyavārayadacyutam //

ekībhūtāstataścaiva tava putrā mahārathāḥ /
sametya samare bhīmaṃ yodhayāmāsurudyatāḥ //

bhīmaseno'pi samare samprāpya svarathaṃ punaḥ /
samāruhya mahābāhuryayau yena tavātmajaḥ //

pragṛhya ca mahāvegaṃ parāsukaraṇaṃ dṛḍham /
sajyaṃ śarāsanaṃ saṅkhye śarairvivyādha te sutam //

tato duryodhano rājā bhīmasenaṃ mahābalam /
nārācena sutīkṣṇena bhṛśaṃ marmaṇyatāḍayat //

so'tividdho maheṣvāsastava putreṇa dhanvinā /
krodhasaṃraktanayano vegenākṣipya kārmukam //

duryodhanaṃ tribhirbāṇairbāhvorurasi cārpayat /
sa tatra śuśubhe rājā śikharairgirirāḍiva //

tau daṣṭvā samare kruddhau vinighnantau parasparam /
duryodhanānujāḥ sarve śūrāḥ santyaktajīvitāḥ //

saṃsmṛtya mantritaṃ pūrvaṃ nigrahe bhīmakarmaṇaḥ /
niścayaṃ paramaṃ kṛtvā nigrahītuṃ pracakramuḥ //

tānāpatata evājau bhīmaseno mahābalaḥ /
pratyudyayau mahārāja gajaḥ pratigajāniva //

bhṛśaṃ kruddhaśca tejasvī nārācena samārpayat /
citrasenaṃ mahārāja tava putraṃ mahāyaśāḥ //

tathetarāṃstava sutāṃstāḍayāmāsa bhārata /
śarairbahuvidhaiḥ saṅkhye rukmapuṅkhaiḥ sutejanaiḥ //

tataḥ samprekṣya putraiste bhīmasenaṃ samāvṛtam /
abhimanyuprabhṛtayaste dvadaśa mahārathāḥ //

preṣitā dharmarājena bhīmasenapadānugāḥ /
pratijagmurmahārāja tava putrānmahābalān //

dṛṣṭvā rathasthāṃstāñśūrānsūryāgnisamatejasaḥ /
sarvāneva maheṣvāsānbhrājamānāñśriyā vṛtān //

mahāhave dīṣyamānānsuvarṇamakuṭoñjvalān /
tatyajuḥ samare bhīmaṃ tava putrā mahābalāḥ //

tānnāmṛṣyata kaunteyo jīvamānā gatā iti /
anvīya ca punaḥ sarvāṃstava putrānapīḍayat //

athābhimanyuḥ samare bhīmasenena sangataḥ /
pārṣatena ca te sarve kaikayā draupadīsutāḥ //

tādṛṣṭvā samare kruddhāṃstava sainye mahārathāḥ / duryodhanaprabhṛtayaḥ pragṛhītaśarāsanāḥ /
bhṛśamarśvaiḥ prajavitaiḥ prayayuryatra te rathāḥ //

aparāhṇe mahārāja prāvartata mahāraṇaḥ /
tāvakānāṃ ca balināṃ pareṣāṃ caiva bhārata //

abhimanyurvikarṇasya hayānhatvā mahāhave /
athainaṃ pañcaviṃśatyā kṣudrakāṇāṃ samārpayat //

hatāśvaṃ rathamutsṛjya vikarṇastu mahārathaḥ . āruroha rathaṃ rājaṃścitrasenasya bhārata /
yodhayāmāsa samare tadadbhutamivābhavat //

sthitāvekarathe tau tu bhrātarau kulavardhanau /
ārjiniḥ śarajālena cchādayāmāsa bhārata //

citraseno vikarṇaśca kārṣṇiṃ pañcabhirāyasaiḥ /
vivyadhāte na cākampatkārṣṇirmeruriva sthitaḥ //

duḥśāsanastu samare kekayānpañca māripa /
yodhayāmāsa rājendra tadadbhutamivābhavat //

draupadeyā raṇe kruddhā duryodhanamavārayan /
śarairāśīviṣākāraiḥ putraṃ tava viśāmpate //

putro'pi tava durdharṣo draupadyāstanayānraṇe /
sāyakairniśitai rājannājaghāna pṛthakpṛthak //

taiścāpi viddhaḥ śuśubhe rudhirema samukṣitaḥ /
giriḥ prasravaṇairyadvadgairikādivimiśritaiḥ //

bhīṣmo'pi samare rājanpāṇḍavānāmanīkinīm /
kālayāmāsa balavānpālaḥ paśugaṇāniva //

tato gāṇḍīvanirghoṣaḥ prādurāsīdviśāmpate /
dakṣiṇena varūthinyāḥ pārthasyarīnvinighnataḥ //

uttasthuḥ samare tatra kabandhāni samantataḥ /
kurūṇāṃ caiva sainyeṣu pāṇḍavānāṃ ca bhārata //

śoṇitodaṃ śarāvartaṃ gajadvīpaṃ hayormiṇam /
rathanaubhirnaravyāghrāḥ prateruḥ sainyasāgaram //

chinnahastā vikavacā videhāśca narottamāḥ /
dṛśyante patitāstatra śataśo'tha sahasraśaḥ //

nihatairmattamātaṅgaiḥ śoṇitaughapariplutaiḥ /
bhūrbhāti bharataśreṣṭha parvatairācitā yathā //

tatrādbhutamapaśyāma tava teṣāṃ ca bhārata /
na tatrāsītpumānkaścidyo yuddhaṃ nābhikāṅkṣati //

evaṃ yuyudhire vīrāḥ prārthayānā mahadyaśaḥ /
tāvakāḥ pāṇḍavaiḥ sārdhamākāṅkṣanto jayaṃ yudhi //