Mahabharata · Chapter 6.79

tato duryodhano rājā lohitāyati bhāskare /
sangrāmarabhaso bhīmaṃ hantukāmo'bhyadhāvata //

tamāyāntamabhiprekṣya nṛvīraṃ dṛḍhavairiṇam /
bhīmasenaḥ susankruddha idaṃ vacanamabravīt //

ayaṃ sa kālaḥ samprāpto varṣapūgābhivāñchitaḥ /
adya tvāṃ nihaniṣyāmi yadi notsṛjase raṇam //

adya kuntyāḥ parikleśaṃ vanavāsaṃ ca kṛtsnaśaḥ /
draupadyāśca parikleśaṃ praṇeṣyāmi hate tvayi //

yatpurā matsarībhūtvā pāṇḍavānavamanyase /
tasya pāpasya gāndhāre paśya vyasanamāgatam //

karṇasya matamāsthāya saubalasya ca yatpurā /
acintya pāṇḍavānkāmādyatheṣṭaṃ kṛtavānasi //

yācamānaṃ ca yanmohāddāśārhamavamanyase /
ulūkasya samādeśaṃ yaddadāsi ca hṛṣṭavat //

tena tvāṃ nihaniṣyāmi sānubandhaṃ sabāndhavam /
śamīkariṣye tatpāpaṃ yatpurā kṛtavānasi //

evamuktvā dhanurghoraṃ vikṛṣyodbhrāmya cāsakṛt /
samādhatta śarānghorānmahāśanisamaprabhān //

ṣaḍviṃśatimasaṃ kruddho mumocāśu suyodhane /
jvalitāgniśikhākārānvajrakalpānajihmagān //

tato'sya kārmukaṃ dvābhyāṃ sūtaṃ dvābhyāṃ ca vivyadhe /
caturbhiraśvāñjavanānanayadyamasādanam //

dvābhyāṃ ca suvikṛṣṭābhyāṃ śarābhyāmarimardanaḥ /
chatraṃ ciccheda samare rājñastasya narottam //

ṣaṅbhiśca tasya ciccheda jvalantaṃ dhvajamuttamam /
chittvā taṃ ca nanādoccaistava putrasya paśyataḥ //

rathācca sa dhvajaḥ śrīmānnānāratnavibhūṣitāt /
papāta sahasā bhūmau vidyuñjaladharādiva //

jvalantaṃ sūryasankāśaṃ nāgaṃ maṇimayaṃ śubham /
dhvajaṃ kurupateśchinnaṃ dadṛśuḥ sarvapārthivāḥ //

athainaṃ daśabhirbāṇaistotrairiva mahādvipam /
ājaghāna raṇe vīraṃ smayanniva mahārathaḥ //

sa gāḍhaviddho vyathito bhīmasenena saṃyuge /
niṣasāda rathopasthe mūrcchābhihatacetanaḥ //

tataḥ sa rājā sindhūnāṃ rathaśreṣṭho mahābalaḥ /
duryodhanasya jagrāha pārṣṇiṃ svapuruṣairvṛtaḥ //

kṛpaśca rathināṃ śreṣṭhastava putramacetanam /
āropayadrathaṃ rājanduryodhanamamarṣaṇam //

parivārya tato bhīmaṃ jetukāmo jayadrathaḥ /
rathairanekasāhasrairbhīmasyāvārayaddiśaḥ //

dhṛṣṭaketustato rājannabhimanyuśca vīryavān /
kekayā draupadeyāśca tava putrānayodhayan //

citrasenaḥ sucitraśca citrāṅgaścitradarśanaḥ /
cārucitraḥ sucāruśca tathā nandopanandakau //

aṣṭāvete maheṣvāsāḥ sukumārā yaśasvinaḥ /
abhimanyurathaṃ rājansamantātparyavārayan //

ājaghāna tatastūrṇamabhimanyurmahāmanāḥ /
ekaikaṃ pañcabhirbāṇaiḥ śitaiḥ sannataparvabhiḥ //

vajramṛtyupratīkāśairvicitrāyudhaniḥsṛtaiḥ /
amṛṣyamāṇāste sarve saubhadraṃ rathasattamam //

vavṛṣurmārgaṇaistīkṣṇairgiriṃ merumivāmbudāḥ /
sa pīḍyamānaḥ samare kṛtāstro yuddhadurmadaḥ //

abhimanyurmahārāja tāvakānsamakampayat /
yathā devāsure yuddhe vajrapāṇirmahāsurān //

vikarṇasya tato bhallānpreṣayāmāsa bhārata /
caturdaśa rathaśreṣṭho ghorānāśīviṣopamān //

sa tairvikarṇasya rathātpātayāmāsa vīryavān /
dhvajaṃ sūtaṃ hayāṃścaiva nṛtyamāna ivāhave //

punaścānyāñśarānpītānakuṇṭhāgrāñśilāśitān /
preṣayāmāsa sankruddho vikarṇāya mahābalaḥ //

te vikarṇaṃ samāsādya kaṅkabarhiṇavāsasaḥ /
bhittvā dehaṃ gatā bhūmiṃ jvalanta iva pannagāḥ //

te śarā hemapuṅkhāgrā vyadṛśyanta mahītale /
vikarṇarudhiraklinnā vamanta iva śoṇitam //

vikarṇaṃ vīkṣya nirbhinnaṃ tasyaivānye sahodarāḥ /
abhyadravanta samare saubhadrapramukhānrathān //

abhiyātvā tathaivānyānrathāṃstānsūryavarcasaḥ /
avidhyansamare'nyonyaṃ saṃrambhādyuddhadurmadāḥ //

durmukhaḥ śrutakarmāṇaṃ viddhvā saptabhirāśugaiḥ /
dhvajamekena ciccheda sārathiṃ cāsya saptamiḥ //

aśvāñjāmbūnadairjālaiḥ pracchannānvātaraṃhasaḥ /
jaghāna ṣaṅbhirāsādya sārathiṃ cābhyapātayat //

sa hatāśve rathe tiṣṭhañśrutakarmā mahārathaḥ /
śaktiṃ cikṣepa sankruddho maholkāṃ jvalitāmiva //

sā durmukhasya vimalaṃ varma bhittvā yaśasvinaḥ /
vidārya prāviśadbhūbhiṃ dīpyamānā svatejasā //

durmukho vihvalastatra niṣasāda raṇe vibho /
visañjñaṃ prekṣya te sarve bhrātaraḥ paryavārayan //

taṃ dṛṣṭvā virathaṃ tatra sutasomo mahārathaḥ /
paśyatāṃ sarvasainyānāṃ rathamāropayatsvakam //

śrutakīrtistathā vīro jayatsenaṃ sutaṃ tava /
abhyayātsamare rājanhantukāmo yaśasvinam //

tasya vikṣipataścāpaṃ śrutakīrtermahāsvanam /
ciccheda samare tūrṇaṃ jayatsenaḥ sutastava //

kṣurapreṇa sutīkṣṇena prahasanniva bhārata /
taṃ dṛṣṭvā cchinnadhanvānaṃ śatānīkaḥ sahodaram //

abhyapadyata tejasvī siṃhavanninadanmuhuḥ /
śatānīkastu samare dṛḍhaṃ vispārya kārmukam //

vivyādha daśabhistūrṇaṃ jayatsenaṃ śilīmukhaiḥ /
nanāda sumahānādaṃ prabhinna iva vāraṇaḥ //

athānyena sutīkṣṇena sarvāvaraṇabhedinā /
śatānīko jayatsenaṃ vivyādha hṛdaye bhṛśam //

tathā tasminvartamāne duṣkarṇo bhrāturantike . mumocāsmaiśitānbāṇāṃstīkṣṇānāśīviṣopamān
ciccheda samare cāpaṃ nākuleḥ krodhamūrcchitaḥ //

athānyaddhanurādāya bhārasāhamanuttamam /
samādatta śarānghorāñśatānīko mahābalaḥ //

tiṣṭhatiṣṭheti cāmantrya duṣkarṇaṃ bhrāturagrataḥ /
mumocāsmai śitānbāṇājjvalitānpannagāniva //

tato'sya dhanurekena dvābhyāṃ sūtaṃ ca māriṣa /
ciccheda samare tūrṇaṃ taṃ ca vivyādha saptabhiḥ //

aśvānmanojavāṃstasya karburānvātaraṃhasaḥ /
jaghāna niśitaistūrṇaṃ sarvāndvādaśabhiḥ śaraiḥ //

athāpareṇa bhallena suyuktenāśupātinā /
duṣkarṇaṃ nākuliḥ kruddho vivyādha hṛdaye bhṛśam //

sa papāta tato bhūmau vajrāhata iva drumaḥ /
duṣkarṇaṃ vyathitaṃ dṛṣṭvā pañca rājanmahārathāḥ //

dighāṃsantaḥ śatānīkaṃ sarvataḥ paryavārayan /
chādyamānaṃ śaravrataiḥ śatānīkaṃ yaśasvinam //

abhyadhāvanta sankruddhāḥ kekayāḥ pañca sodarāḥ /
tānabhyāpatataḥ prekṣya tava putrā mahārathāḥ //

pratyudyayurmahārāja gajāniva mahāgajāḥ /
durmukho durjayaścaiva tathā durmarṣaṇo yuvā //

śatruñjayaḥ satrusahaḥ sarve kruddhā yaśasvinaḥ /
pratyudyātā mahārāja kekayānbhrātaraḥ samam //

rathairnagarasankāśairhayairyuktairmanojavaiḥ /
nānāvarṇavicitrābhiḥ patākābhiralaṅkṛtaiḥ //

śaracāpadharā vīrā vicitrakavacadhvajāḥ /
viviśuste paraṃ sainyaṃ siṃhā iva vanādvanam //

teṣāṃ sutumulaṃ yuddhaṃ vyatiṣaktarathadvipam /
avartata mahāraudraṃ nighnatāmitaretaram //

anyonyāgaskṛtāṃ rājanyamarāṣṭravivardhanam /
muhūrtāstamite sūrye cakruryuddhaṃ sudāruṇam //

rathinaḥ sādinaścātha vyakīryanta sahasraśaḥ /
tataḥ śāntanavaḥ kruddhaḥ śaraiḥ sannataparvabhiḥ //

nāśayāmāsa senāṃ tāṃ bhīṣmasteṣāṃ mahātmanām /
pañcālānāṃ ca sainyāni śarairninye yamakṣayam //

evaṃ bhittvā maheṣvāsaḥ pāṇḍavānāmanīkinīm /
kṛtvā'vahāraṃ sainyānāṃ yayau svaśibiraṃ nṛpa //

nāśayāmāsaturvīrau dhṛṣṭadyumnavṛkodarau /
karavāṇāmanīkāni śaraiḥ sannataparvabhiḥ //

dharmarājo'pi samprekṣya dhṛṣṭadyumnavṛkodarau /
mūrdhni caitāvupāghrāya prahṛṣṭaḥ śibiraṃ yayau //

arjuno vāsudevaśca kauravāṇāmanīkinīm . hatvā vidrāvya ca śaraiḥ śibirāyaiva jagmatuḥ //