Mahabharata · Chapter 6.73

virāṭo'ya tribhirbāṇairbhīṣmamārcchanmahāratham /
vivyādha turamāntrāsya tribhirbāṇairmahārathaḥ //

taṃ pratyavidhyaddaśabhirbhīṣmaḥ śāntanavaḥ śaraiḥ /
rukmapuṅkhairmaheṣvāsaḥ kṛtahasto mahābalaḥ //

drauṇirgāṇḍīvadhanvānaṃ bhīmadhanvā mahārathaḥ /
avidhyadiṣubhiḥ ṣaṅbhirdṛḍhahastaḥ stanāntare //

kārmukaṃ tasya ciccheda phalgunaḥ paravīrahā /
avidhyacca bhṛśaṃ tīkṣṇaiḥ patribhiḥ śatrukarśanaḥ //

so'nyatkārmukamādāya vegavānkrodhamūrcchitaḥ /
amṛṣyamāṇaḥ pārthena kārmukacchedamāhave //

avidhyatphalgunaṃ rājannavatyā niśitaiḥ śaraiḥ /
vāsudevaṃ ca saptatyā vivyādha parameṣubhiḥ //

tataḥ krodhābhitāmrākṣaḥ kṛṣṇena saha phalgunaḥ /
dīrghamuṣṇaṃ ca niḥśvasya cintayitvā punaḥpunaḥ //

dhanuḥ prapīḍya vāmena kareṇāmitrakarśanaḥ /
gāṇḍīvadhanvā sankruddhaḥ śitānsannataparvaṇaḥ //

jīvitāntakarānghorānsamādatta śilīmukhān /
taistūrṇaṃ samare'vidhyadrauṇiṃ balavatāṃ varaḥ //

tasya te kavacaṃ bhittvā papuḥ śoṇitamāhave /
na vivyathe ca nirbhinno drauṇirgāṇḍīvadhanvanā //

tathaiva ca śarāndrauṇiḥ pravimuñcannavihvalaḥ /
tasthau ca samare rājaṃstrātumicchanmahāvratam //

tasya tatsumahatkarma śaśaṃsuḥ kurusattamāḥ /
yatkṛṣṇābhyāṃ sametābhyāmabhyāpatata saṃyuge //

sa hi nityamanīkeṣu yudhyate'bhayamāstitaḥ /
astragrāmaṃ sasaṃhāraṃ droṇātprāpya sudurlabham //

mamaiṣa ācāryasuto droṇasyāpi priyaḥ sutaḥ /
brāhmaṇaśca viśeṣeṇa mānanīyo mameti ca //

samāsthaāya matiṃ vīro bībhatsuḥ satrutāpanaḥ /
kṛpāṃ cakre rathaśreṣṭho bhāradvājasutaṃ prati //

drauṇiṃ tyaktvā tato yuddhe kaunteyaḥ śvetavāhanaḥ /
yuyudhe tāvakānnighnaṃstvaramāṇaḥ parākramī //

duryodhanastu daśabhirgārdhrapatraiḥ śilāśitaiḥ /
bhīmasenaṃ maheṣvāsaṃ rukmapuṅkhaiḥ samārpayat //

bhīmasenaḥ susankruddhaḥ parāsukaraṇaṃ dṛḍham /
citraṃ kārmukamādatta śarāṃśca niśitāndaśa //

ākarṇaprahitaistīkṣṇairvegavadbhirajihmagaiḥ /
avidhyattūrṇamavyagraḥ kururājaṃ mahorasi //

tasya kāñcanasūtrasthaḥ śaraiḥ sañchādito maṇiḥ /
rarājorasi khe sūryo grahairiva samāvṛtaḥ //

putrastu tava tejasvī bhīmasenena tāḍita /
nāmṛṣyata yathā nāgastalaśabdaṃ madotkaṭaḥ //

tataḥ śarairmahārāja rukmapuṅkhaiḥ śilāśitaiḥ /
bhīmaṃ vivyādha sankruddhastrāsayāno varūthinīm //

tau yudhyamānau samare bhṛśamanyonyavikṣatau /
putrau te devasankāśau vyarocetāṃ mahābalau //

citrasenaṃ naravyāghraṃ saubhadraḥ paravīrahā /
avidhyaddaśabhirbāṇaiḥ purumitraṃ ca saptabhiḥ //

satyavrataṃ ca saptatyā viddhvā śakrasamo yudhi /
nṛtyanniva raṇe vīra ārtiṃ naḥ samajījanat //

taṃ pratyavidhyaddaśabhiścitrasenaḥ śilīmukhaiḥ /
satyavrataśca navabhiḥ purumitraśca saptabhiḥ //

sa viddho vikṣaranraktaṃ śatrusaṃvāraṇaṃ mahat /
ciccheda citrasenasya citraṃ kārmukamārjuniḥ //

bhittvā cāsya tanutrāṇaṃ śareṇorasyatāḍayat /
tataste tāvakā vīrā rājaputrā mahārathāḥ //

sametya yudhi saṃrabdhā vivyadhurniśitaiḥ śaraiḥ /
tāṃśca sarvāñśaraistīkṣṇairjaghāna paramāstravit //

tasya dṛṣṭvā tu tatkarma parivavruḥ sutāstava /
dahantaṃ samare sainyaṃ vane kakṣaṃ yatholbaṇam //

apetaśiśire kāle samiddhamiva pāvakam /
atyarocata saubhadrastava sainyāni nāśayan //

tattasya caritaṃ dṛṣṭvā pautrastava viśāmpate /
lakṣmaṇo'bhyapatattūrṇaṃ sāttīputramāhave //

abhimanyustu sankruddho lakṣmaṇaṃ śubhalakṣaṇam /
vivyādha niśitaiḥ ṣaṅabhiḥ sārathiṃ ca tribhiḥ śaraiḥ //

tathaiva lakṣmaṇo rājansaubhadraṃ niśitaiḥ śaraiḥ /
avidhyata mahārāja tadadbhutamivābhavat //

tasyāśvāṃścaturo hatvā sārathiṃ ca mahābalaḥ /
abhyadravata saubhadro lakṣmaṇaṃ niśitaiḥ śaraiḥ //

hatāśve tu rathe tiṣṭham̐llakṣmaṇaḥ paravīrahā /
śaktiṃ cikṣepa sankruddhaḥ saubhadrasya rathaṃ prati //

tāmāpatantīṃ sahasā ghorarūpāṃ durāsadām /
abhimanyuḥ śaraistīkṣṇaiściccheda bhujagopamām //

tataḥ svarathamāropya lakṣmaṇaṃ gautamastadā /
apovāha rathenājau sarvasainyasya paśyataḥ //

tataḥ samākule tasminvartamāne mahābhaye /
abhyadravañjighāṃsantaḥ parasparavadhaiṣiṇaḥ //

tāvakāśca maheṣvāsāḥ pāṇḍavāśca mahārathāḥ /
juhvantaḥ samare prāṇānnijaghnuritaretaram //

muktakeśā vikavacā virathāśchinnakārmukāḥ /
bāhubhaiḥ samayudhyanta sṛñjayāḥ kurubhiḥ saha //

tato bhīṣmo mahābāhuḥ pāṇḍavānāṃ mahātmanām /
senāṃ jaghāna sankruddho divyairastrairmahābalaḥ //

hateśvarairgajaistatra narairaśvaiśca pātitaiḥ /
rathibhiḥ sādibhiścaiva samāstīryata medinī //