Scripture Library

Mahabharata · Chapter 6.72

6.72.1

śikhaṇḍī saha matsyena virāṭena viśāmpate /
bhīṣmamāśu maheṣvāsamāsasāda sudurjayam //

6.72.2

droṇaṃ kṛpaṃ vikarṇaṃ ca maheṣvāsaṃ mahābalam /
rājñaścānyānraṇe śūrānbahūnārcchaddhanañjayaḥ //

6.72.3

saindhavaṃ ca maheṣvāsaṃ sāmātyaṃ saha bandhubhiḥ /
prācyāṃśca dākṣiṇātyāṃśca bhūmipānbhūmiparṣabha //

6.72.4

putraṃ ca te maheṣvāsaṃ duryodhanamamarṣaṇam /
duḥsahaṃ caiva samare bhīmaseno'bhyavartata //

6.72.5

sahadevastu śakunimulūkaṃ ca mahāratham /
pitāputrau maheṣvāsāvabhyavartata durjayau //

6.72.6

yudhiṣṭhiro mahārāja gajānīkaṃ mahārathaḥ /
samavartata sangrāme putreṇa nikṛtastava //

6.72.7

mādrīputrastu nakulaḥ śūrasankrandano yudhi /
trigartānāṃ balaiḥ sārdhaṃ samasañjata pāṇḍavaḥ //

6.72.8

abhyavartanta sankruddhāḥ samare sālvakekayān /
sātyakiścekitānaśca saubhadraśca mahārathaḥ //

6.72.9

dhṛṣṭaketuśca samare rākṣasaśca ghaṭotkacaḥ . nākuliśca śatānīkaḥ samare rathapuṅgavaḥ /
putrāṇāṃ te rathānīkaṃ pratyudyātāḥ sudurjayāḥ //

6.72.10

senāpatirameyātmā dhṛṣṭadyumno mahābalaḥ /
droṇena samare rājansamiyāyograkarmaṇā //

6.72.11

evamete maheṣvāsāstāvakāḥ pāṇḍavaiḥ saha /
sametya samare śūrāḥ samprāhāraṃ pracakrire //

6.72.12

madhyandinagate sūrye nabhasyākulatāṃ gate /
kuravaḥ pāṇḍaveyāśca nijaghnuritaretaram //

6.72.13

dhvajino hemacitrāṅgā vicaranto raṇājire /
sapatākā rathā rejurvaiyāghraparivāraṇāḥ //

6.72.14

sametānāṃ ca samare jigīṣūṇāṃ parasparam /
babhūva tumulaḥ śabdaḥ siṃhānāmiva nardatām //

6.72.15

tatrādbhutamapaśyāsa samprahāraṃ sudāruṇam /
yadakurvanraṇe śūrāḥ sṛñjayāḥ kurubhiḥ saha //

6.72.16

naiva khaṃ na diśo rājanna sūryaṃ śatrutāpana /
vidiśo vāpi paśyāmaḥ śarairmuktaiḥ samantataḥ //

6.72.17

śaktīnāṃ vimalāgrāṇāṃ tomarāṇāṃ tathāsyatām /
nistriṃśānāṃ ca pītānāṃ nīlotpalanibhāḥ prabhāḥ //

6.72.18

kavacānāṃ vicitrāṇāṃ bhūṣaṇānāṃ prabhāstathā /
khaṃ diśaḥ pradiśaścaiva bhāsayāmāsurojasā //

6.72.19

vapurbhiśca narendrāṇāṃ candrasūryasamaprabhaiḥ /
virarāja tadā rājaṃstatratatra raṇāṅgaṇam //

6.72.20

rathasaṅghā naravyāghrāḥ samāyāntaśca saṃyuge /
virejuḥ samare rājangrahā iva nabhastale //

6.72.21

bhīṣmastu rathināṃ śreṣṭho bhīmasenaṃ mahābalam /
avārayata sankruddhaḥ sarvasainyasya paśyataḥ //

6.72.22

tato bhīṣmavinirmuktā rukmapuṅkhāḥ śilāśitāḥ /
abhyaṅgantamare bhīmaṃ tailaghautāḥ sutejanāḥ //

6.72.23

tasya śaktiṃ mahāvegaṃ bhīmaseno mahābalaḥ /
kruddhāśīviṣasankāśaṃ preṣayāmāsa bhārata //

6.72.24

tāmāpatantīṃ sahasā rukmadaṇḍaṃ durāsadām /
ciccheda samare bhīṣmaḥ śaraiḥ sannataparvabhiḥ //

6.72.25

tato'pareṇa bhallena pītena niśitena ca /
kārmukaṃ bhīmasenasya dvidhā ciccheda bhārata //

6.72.26

apāsya tu dhanuśchinnaṃ bhīmaseno mahābalaḥ /
śarairbahubhirānarcchadbhīṣmaṃ śāntanavaṃ yudhi //

6.72.27

sātyakistu tatastūrṇaṃ bhīṣmamāsādya saṃyuge /
ākarṇaprahitaistrīkṣṇairniśitaistigmatejanaiḥ //

6.72.28

śarairbahubhirānarcchatpitaraṃ te janeśvara /
tataḥ sandhāya vai tīkṣṇaṃ śaraṃ paramadāruṇam //

6.72.29

vārṣṇeyasya rathādbhīṣmaḥ pātayāmāsa sārathim /
tasyāśvāḥ pradrutā rājannihate rathasārathau //

6.72.30

tena tenaiva dhāvanti manomārutaraṃhasaḥ /
tataḥ sarvasya sainyasya niḥsvanastumulo'bhavat //

6.72.31

hāhākāraśca sañjajñe pāṇḍavānāṃ mahātmanām /
abhyadravata gṛhṇīta hayānyacchata dhāvata //

6.72.32

ityāsīttumulaḥ śabdo yuyudhānarathaṃ prati /
etasminneva kāle tu bhīṣmaḥ śāntanavastadā //

6.72.33

nyahanatpāṇḍavīṃ senāmāsurīmiva vṛtrāhā . te vadhyamānā bhīṣmeṇa pāñcālāḥ somakaiḥ saha /
sthirāṃ yuddhe matiṃ kṛtvā bhīṣmamevābhidudruvuḥ //

6.72.34

dhṛṣṭadyumnamukhāścāpi pārthāḥ śāntanavaṃ raṇe /
abhyadhāvañjigīṣantastava putrasya vāhinīm //

6.72.35

tathaiva kauravā rājanbhīṣmadroṇapurogamāḥ /
abhyadhāvanta vegena tato yuddhamavartata //

Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0