Mahabharata · Chapter 6.74

atha rājanmahābāhuḥ sātyakiryuddhadurmadaḥ /
vikṛṣya cāpaṃ samare bhārasāhamanuttamam //

yattatsakhyustu pūrveṇa arjunādupaśikṣitam . pragāḍhaṃ laghu citraṃ ca darśayanhastalāghavam /
prāmuñcatpuṅkhasaṃyuktāñśarānāśīviṣopamān //

tasya vikṣipataschāpaṃ śarānanyāṃśca muñcataḥ /
ādadānasya bhūyaśca sandadhānasya cāparān //

kṣipataśca parāṃstasya raṇe śatrūnvinighnataḥ /
dadṛśe rūpamatyarthaṃ meghasyeva pravarṣataḥ //

tamudīryantamālokya rājā duryodhastataḥ /
rathānāmayutaṃ tasya preṣayāmāsa bhārata //

tāṃstu sarvānmaheṣvāsānsātyakiḥ satyavikramaḥ /
jaghāna parameṣvāso divyenāstreṇa vīryavān //

sa kṛtkavā dāruṇaṃ karma pragṛhītaśarāsanaḥ /
āsasāda tato vīro bhūriśravasamāhave //

sa hi sandṛśya senāṃ te yuyudhānena pātitām /
abhyadhāvata sankruddhaḥ kurūṇāṃ kīrtivardhanaḥ //

indrāyudhasavarṇaṃ tu visphārya sumahaddhanuḥ /
sṛṣṭavānvajrasankāśāñśarānāśīviṣopamān //

sahasraśo māhārāja darśayanpāṇilāghavam /
śarāṃstānmṛtyusaṃsparśānsātyakeśca padānugāḥ //

na viṣehustadā rājandudruvuste samantataḥ /
vihāya sātyakiṃ rājansamare yuddhadurmadam //

taṃ dṛṣṭvā yuyudhānasya sutā daśa mahābalāḥ /
mahārathāḥka samākhyātāścitravarmāyudhadhvajāḥ //

samāsādya maheṣvāsaṃ bhūriśravasamāhave /
ūcuḥ sarve susaṃrabdhā yūpaketuṃ mahāraṇe //

bhobho kauravādāyāda sahāsmābhirmahābala /
ehi yudhyasva sangrāme samastaiḥ pṛthageva vā //

asmānvā tvaṃ parājitya yaśaḥ prāpnuhi saṃyuge /
vayaṃ vā tvāṃ parājitya prītiṃ dhāsyāmahe pituḥ //

evamuktastadā śūraistānuvāca mahābalaḥ /
vīryaślāghī naraśreṣṭhastāndṛṣṭvā samavasthitān //

sādhvidaṃ kathyate vīrā yandyevaṃ matiradya vaḥ /
yudhyadhvaṃ sahitā yattā nihaniṣyāmi vo raṇe //

evamuktā maheṣvāsāste vīrāḥ kṣiprakāriṇaḥ /
mahatā śaravarṣeṇa abhyadhāvannarindamam //

so'parāhṇe mahārāja sangrāmastumulo'bhavat /
ekasya ca bahūnāṃ ca sametānāṃ raṇājire //

tamekaṃ rathināṃ śreṣṭhaṃ śaraiste samavākiran /
prāvṛṣīva yathā meruṃ siṣicurjaladā nṛpa //

taistu muktāñśarānghorānyamadaṇḍāśaniprabhān /
asamprāptānasambhrākantiścicchedāśu mahārathaḥ //

tatrādbhutamapaśyāma saumadatteḥ parākramam /
yadeko bahubiryuddhe samasañjadabhītavat //

visṛjya śaravṛṣṭiṃ tāṃ daśa rājanmahārathāḥ /
parivārya mahābāhuṃ nihantumupacakramuḥ //

samadattistataḥ kruddhasteṣāṃ cāpāni bhārata /
ciccheda samare rājanyudhyamāno mahārathaiḥ //

athaiṣāṃ chinnadhanuṣāṃ śaraiḥ sannataparvabhiḥ /
ciccheda samare rājañśirāṃsi bharatarṣabha //

te hatā nyapatanrājanvajrabhagnā iva drumāḥ . 6-74-26btāndṛṣṭvā nihatānvīro raṇe putrānmahābalān //

vārṣṇeyo vinadarājanbhūriśravasamabhyayāt /
rathaṃ rathena samare pīḍayitvā mahābalau //

tāvanyonyaṃ hi samare nihatya rathavājinaḥ /
virathāvabhivalgantau sameyātāṃ mahārathau //

pragṛhītamahākhaṅgau tau carmavaradhāriṇau /
śuśubhāte naravyāghrau yuddhāya samavasthitau //

asahyamasiyuddhāya bhūriśravasamāhave /
matvā vṛkodarastūrṇamabhiplutya mahārathaḥ //

tataḥ sātyakimabhyetya nistriṃśavaradhāriṇam /
bhīmasenastvaranrājanrathamāropayattadā //

tavāpi tanayo rājanbhūriśravasamāhave /
āropayadrathaṃ tūrṇaṃ paśyatāṃ sarvadhanvinām //

tasmistathā vartamāne raṇe bhīṣmaṃ mahāratham /
ayodhayanta saṃrabdhāḥ pāṇḍavā bharatarṣabha //

lohitāyati cāditye tvaramāṇo dhanañjayaḥ /
pañcaviṃśatisāhasrānnijaghāna mahārathān //

te hi duryodhanādiṣṭāstadā pārthanibarhaṇe /
samprāpyaiva gatā nāśaṃ śalabhā iva pāvakam //

tato matsyāḥ kekayāśca dhanurvedaviśāradāḥ /
parivavrustadā pārthaṃ sahaputraṃ mahāratham //

evasminneva kāle tu sūrye'stamupagacchati /
sarveṣāṃ caiva sainyānāṃ pramohaḥ samajāyata //

avahāraṃ tataścakre pitā devavratastava /
sandhyākāle mahārāja sainyānāṃ śrāntavāhanaḥ //

pāṇḍavānāṃ kurūṇāṃ ca parasparasamāgame /
te sene bhṛśasaṃvigne yayatuḥ svaṃ niveśanam //

tataḥ svaśibiraṃ gatvā nyaviśaṃstatra bhārata /
pāṇḍavāḥ sṛñjayaiḥ sārdhaṃ kuravaśca yathāvidhiḥ //