Mahabharata · Chapter 6.70

akarottumulaṃ yuddhaṃ bhīṣmaḥ śāntanavastadā /
bhīmasenabhayādicchanputrāṃstārayituṃ tava //

pūrvāhṇe tanmahāraudraṃ rājñāṃ yuddhamavartata /
kurūṇāṃ pāṇḍavānāṃ ca mukhyaśūravināśanam //

tasminnākulasangrāme vartamāne mahābhaye /
abhavattumulaḥ śabdaḥ saṃspṛśangaganaṃ mahat //

nadadbhiśca mahānāgairheṣamāṇaiśca vājibhiḥ /
bherīśaṅkhaninādaiśca tumulaṃ samapadyata //

yuyutsavaste vikrāntā vijayāya mahābalāḥka /
anyonyamabhigarjanto goṣṭhiṣviva maharṣabhāḥ //

śirāsaṃ pātyamānānāṃ samare niśitaiḥ śaraiḥ /
aśyavṛṣṭirivākāśe babhūva bharatarṣabha //

kuṇḍaloṣṇīṣadhārīṇi jātarūpojjvalāni ca /
patitāni sma dṛśyante śirāṃsi bharatarṣabha //

viśikhonmathitairgātrairbāhubhiśca sakārmukaiḥ /
sahastābharaṇaiścānyairabhavacchāditā mahī //

kavacopahitairgātrairhastaiśca samalaṅkṛtaiḥ /
mukhaiśca candrasankāśai raktāntanayanaiḥ śubhaiḥ //

gajavājimanuṣyāṇāṃ sarvagātraiśca bhūpate /
āsītsarvā samāstīrṇā muhūrtena vasundharāḥ //

rajomeghaiśca tumulaiḥ śastravidyutprakāśibhiḥ /
āyudhānāṃ ca nirghoṣaḥ stanayitnusamo'bhavat //

sa samprahārastumulaḥka kaṭukaḥ śoṇitodakaḥ /
prāvartata kurūṇāṃ ca pāṇḍavānāṃ ca bhārata //

tasminmahābhaye ghore tumule romaharṣaṇe /
vavṛṣuḥ śaravarṣāṇi kṣatriyā yuddhadurmadāḥ //

ākrośankuñjarāstatra śaravarṣapratāpitāḥ /
tāvakānāṃ pareṣāṃ ca saṃyuge bharatarṣabha //

saṃrabdhānāṃ ca vīrāṇāṃ dhīrāṇāmamitaujasām /
dhanurjyātalaśabdena na prājñāyata kiñcana //

utthiteṣu kabandheṣu sarvataḥ śomitodake /
samare paryadhāvanta nṛpā ripuvadhodyatāḥ //

śaraśaktigadābhiste khaṅgaiścāmitatejasaḥ /
nijaghnuḥ samare'nyonyaṃ śūrāḥ parighabāhavaḥ //

babhramuḥ kuñjarāścātra śarairviddhā niraṅkuśāḥ /
aśvāśca paryadhāvanta hatārohā diśo daśa //

utpatya nipatantyanye śaraghātaprapīḍitāḥ /
tāvakānāṃ pareṣāṃ ca yodhā bharatasattama //

vāhānāmuttamāṅgānāṃ kārmukāṇāṃ ca bhārata /
gadānāṃ parighāṇāṃ ca hastānāṃ corubhiḥ saha //

pādānāṃ bhūṣaṇānāṃ ca keyūrāṇāṃ ca saṅghaśaḥ /
rāśayastatra dṛśyante bhīṣmabhīmasamāgame //

aśvānāṃ kuñjarāṇāṃ ca rathānāṃ cānivartinām /
saṅghātāḥ sma pradṛśyante tatratatra viśāmpate //

gadābhirasibhiḥ prāsairbāṇaiśca nataparvabhiḥ /
jaghnuḥ paraspara tatra kṣatriyāḥ kāla āgate //

apare bāhubhirvīrā niyuddhakuśalā yudhi /
bahudhā samasañjanta āyasaiḥ parighairiva //

muṣṭibhirjānubhiścaiva talaiścaiva viśāmpate /
anyonyaṃ jaghrire vīrāstāvakāḥ pāṇḍavaiḥ saha //

patitaiḥ pātyamānaiśca viceṣṭadbhiśca bhūtale /
ghoramāyodhanaṃ jajñe tatratatra janeśvara //

virathā rathinaścātra nistriṃśavaradhāriṇaḥka /
anyonyamabhidhāvantaḥ parasparavadhaiṣiṇaḥ //

tato duryodhano rājā kaliṅgairbahubhirvṛtaḥ /
puraskṛtya raṇe bhīṣmaṃ pāṇḍavānabhyavartata //

tathaiva pāṇḍavāḥ sarve parivārya vṛkodaram /
bhīṣmamabhyadravankruddhāstato yuddhamavartata //