Mahabharata · Chapter 6.69

vyuṣitāyāṃ tu śarvaryāmudite ca divākare /
ubhe sene mahārāja yuddhāyaiva samīyatuḥ //

abhyadhāvanta sankruddhāḥ parasparajigīṣavaḥ /
te sarve sahitā yuddhe samālokya parasparam //

pāṇḍavā dhārtarāṣṭrāśca rājandarmantrite tava /
vyūhau ca vyūhya saṃrabdhāḥ samprahṛṣṭāḥ prahāriṇaḥ //

arakṣanmakaravyūhaṃ bhīṣmo rājansamantataḥ /
tathaiva pāṇḍavā rājannarakṣanvyūhamātmanaḥ //

ajātaśatruḥ śatrūṇāṃ manāṃsi samakampayat / śyenavadvyūhya taṃ vyūhaṃ dhaumyasya vacanātsvayam //

sa hi tasya suvijñāta agnicityeṣu bhārata /
makarastu mahāvyūhastava putrasya dhīmataḥ //

svayaṃ sarveṇa sainyena droṇenānumatastadā /
yathāvyūhaṃ śāntanavaḥ so'nvavartata tatpunaḥ //

sa niryayau mahārāja pitā devavratastava /
mahatā rathavaṃśena saṃvṛto rathināṃ varaḥ //

itaretaramanvīyuryathābhāgamavasthitāḥ /
rathinaḥ pattayaścaiva dantinaḥ sādinastathā //

tāndṛṣṭvā'bhyudyatānsaṅkhye pāṇḍavā hi yaśasvinaḥ /
śyenavyūhena saṃvyūhya samanahyanta saṃyuge //

aśobhata mukhe tasya bhīmaseno mahābalaḥ /
netre śikhaṇḍī durdharṣo dhṛṣṭadyumnaśca pārṣataḥ //

śīrṣe tasyābhavadvīraḥ sātyakiḥ satyavikramaḥ /
vidhunvangāṇḍivaṃ pārtho grīvāyāmabhavattadā //

akṣauhiṇyā samaṃ tatra vāmapakṣo'bhavattadā /
mahātmā drupadaḥ śrīmānsaha putreṇa saṃyuge //

dakṣiṇaścābhavatpakṣaḥ kaikeyo'kṣauhiṇīpatiḥ /
pṛṣṭhato draupadeyāśca saubhadraścāpi vīryavān //

pṛṣṭhe samabhavacchrīmānsvayaṃ rājā yudhiṣṭhiraḥka /
bhrātṛbhyāṃ sahito vīro yamābhyāṃ cāruvikramaḥ //

praviśya tu raṇe bhīmo makaraṃ mukhatastadā /
bhīṣmamāsādya sangrāme cchādayāmāsa sāyakaiḥ //

tato bhīṣmo mahāsrāṇi pātayāmāsa bhārata /
mohayanpāṇḍuputrāṇāṃ vyūḍhaṃ sainyaṃ mahāhave //

sammuhyati tadā sainye tvaramāṇo dhanañjayaḥ /
bhīṣmaṃ śarasahasreṇa vivyādha raṇamūrdhani //

pratisaṃvārya cāsrāṇi bhīṣmamuktāni saṃyuge /
svenānīkena hṛṣṭena yuddhāya samupasthitaḥ //

tato duryodhano rājā bhārajvājamabhāṣata /
pūrvaṃ dṛṣṭvā vadhaṃ ghoraṃ balasya balināṃ varaḥ //

bhrātṝṇāṃ ca vadhaṃ yuddhe smaramāṇo mahārathaḥ /
ācāryaḥ satataṃ hi tvaṃ hitakāmo mamānagha //

vayaṃ hi tvāṃ samāśritya bhīṣmaṃ caiva pitāmaham /
devānapi raṇe jetuṃ prārthayāmo na saṃśayaḥ //

kimu pāṇḍusutākanyuddhe hīnavīryaparākramān /
sa tathā kuru bhadraṃ te yathā vadhyanti pāṇḍavāḥ //

evamuktastato droṇastava putreṇa māriṣa /
tatra samprekṣya rājanaṃ sankruddha iva niścasan //

bāliśastvaṃ na jānīṣe pāṇḍavānāṃ parākramam /
na śakyā hi yathā jetuṃ pāṇḍavā hi mahābalāḥ //

yathābalaṃ yathāvīryaṃ karma kuryāmahaṃ hi te / ityuktavā te sutaṃ rājannabhyapadyata vāhinīm /
abhinatpāṇḍavānīkaṃ prekṣamāṇasya sātyakeḥ //

sātyakistu tato drauṇaṃ vārayāmāta bhārata /
tayoḥ pravavṛte yuddhaṃ ghorarūpaṃ bhayāvaham //

śaineyaṃ tu raṇe kruddho bhāradvājaḥ pratāpāvān /
avidhyanniśitairbāṇairjatrudeśe hasanniva //

bhīmasenastataḥ kruddho bhāradvājamavidhyata /
saṃrakṣansātyakiṃ rājandroṇācchastrabhṛtāṃ varāt //

tato droṇaśca bhīṣmaśca tathā śalyaśca māriṣa /
bhīmasenaṃ raṇe kruddhāśchādayāñcakrire śaraiḥ //

tatrābhimanyuḥ sankruddho draupadeyāśca māriṣa /
vivyadhurniśitairbaiṇaiḥ sarvāṃstānudyatāyudhān //

droṇabhīṣmau tu sankruddhāvāpatantau mahābalau /
pratyudyayau śikhaṇḍī tu maheṣvāso mahāhave //

pragṛhya balavadvīro dhanurjaladaniḥśvanam /
abhyavarṣaccharaistūrṇaṃ chādayāno divākaram //

śikhaṇḍinaṃ samāsādya bharatānāṃ pitāmahaḥ /
avarjayata sangrāmaṃ strītvaṃ tasyānusaṃsmaran //

tato droṇo mahārāja abhyadravata taṃ raṇe /
rakṣamāṇastadā bhīṣmaṃ tava putreṇa coditaḥ //

śikhaṇḍī tu samāsādya droṇaṃ śastrabhṛtāṃ varam /
avarjayata santrasto yugāntāgnimivolbaṇam //

tato balena mahatā putrastava viśāmpate /
jugopa bhīṣmamāsādya prārthayāno mahadyaśaḥ //

tathaiva pāṇḍavā rājanpuruskṛtya dhanañjayam /
bhīṣmamevābhyavartanta jaye kṛtvā dṛḍhāṃ matim //

tadyuddhamabhavaddhoraṃ devānāṃ dānavairiva /
jayamākāṅkṣatāṃ saṅkṣye yaśaśca sumahādbhutam //