Mahabharata · Chapter 6.71

dṛṣṭvā bhīṣmeṇa saṃsaktānbhrātṝnanyāṃśca pārthivān /
samabhyadhāvadgānṅgeyamudyatāstro dhanañjayaḥ //

pāñcajanyasya nirghoṣaṃ dhanuṣo gāṇḍivasya ca /
dhvajaṃ ca dṛṣṭvā pārthasya sarvānno bhayamāviśat //

siṃhalāṅgūlamākāśe jvalantamiva parvatam /
asañjamānaṃ vṛkṣeṣu dhūmaketumivotthitam //

bahuvarṇaṃ vicitraṃ ca divyaṃ vānaralakṣaṇam /
apaśyāma mahārāja dhvajaṃ gāṇḍīvadhanvanaḥ //

suvarṇapṛṣṭhaṃ gāṇḍīvaṃ raṇe drakṣyāmi bhārata / vidyutaṃ meghamadhyasthāṃ bhrājamānāmivāmbare /
dadṛśurgāṇḍivaṃ yodhā rukmapṛṣṭhaṃ mahāmṛdhe //

āśuśruma bhṛśaṃ cāsya śakrasyevābhigarjataḥ /
sughoraṃ talayoḥ śabdaṃ nighnatastava vāhinīm //

caṇḍavāto yathā meghaḥ savidyutstanayitnumān /
diśaḥ samplāvayansarvāḥ śaravarṣaiḥ samantataḥ //

samabhyadhāvadgāṅgeyaṃ bhairavāstro dhanañjayaḥ /
diśaṃ prācīṃ pratīcīṃ ca na jānīmo'stramohitāḥ //

kāndigbhūtā śrāntapatrā hatāśvā hatacetasaḥ /
anyonyamabhisaṃśliṣya yodhāste bharatarṣabha //

bhīṣmamevābhyalīyanta saha sarvaistavātmajaiḥ /
teṣāmārtāyanamabhūdbhīṣmaḥ śāntanavo raṇe //

samutpatanti vitrastā rathebhyo rathinastathā /
sādinaścāśvapṛṣṭhebhyo bhūmau cāpi padātayaḥ //

śrutvā gāṇḍīvanirghoṣaṃ visphūrjitamivāśaneḥ /
sarvasainyāni bhītāni vyavālīyanta bhārata //

atha kāmbhojaijaraśvairmahadbhiḥ śīghragāmibhiḥ /
gopānāṃ bahusāhastrairbālairgāpāyanairvṛtaḥ //

madrasauvīragāndhāraistraigartaiśca viśāmpate /
sarvakāliṅgamukhyaiśca kaliṅgādhipatirvṛtaḥ //

nānānaragaṇaughaiśca duḥśāsanapuraḥsaraḥ /
jayadrathaśca nṛpatiḥ sahitaḥ sarvarājabhiḥ //

hayārohavarāścaiva tava putreṇa coditāḥ /
caturdaśasahasrāṇi saubalaṃ paryavārayan //

tataste sahitāḥ sarve vibhaktarathavāhanāḥ /
arjunaṃ samare jaghnustāvakā bharatarṣabha //

cedikāśipadātaiśca rathaiḥ pāñcālasṛñjayaiḥ . pāṇḍavāḥ sahitāḥ sarve dhṛṣṭadyumnapurogamāḥ /
tāvakānsamare jaghnurdharmaputreṇa coditāḥ //

rathibhirvāraṇairaśvaiḥ pādātaiśca samīritam /
ghoramāyodhanaṃ cakre mahābhrasadṛśaṃ rajaḥ //

tomaraprāsanārācagajāśvarathayodhinām /
balena mahatā bhīṣmaḥ samasañjatkirīṭinā //

āvantyaḥ kāśirājena bhīmasenena saindhavaḥ /
ajātaśatrurmadrāṇāmṛṣabheṇa yaśaśvinā //

sahaputraḥ sahāmātyaḥ śalyena samasañjata /
vikarṇaḥ sahadevena citrasenaḥ śikhaṇḍinā //

matsyā duryodhanaṃ jagmuḥ śankuniṃ na viśāmpate /
drupadaścekitānaśca sātyakiścaka mahārathaḥ //

droṇena samasañjanta saputreṇa mahātmanā /
kṛpaśca kṛtavarmā ca dhṛṣṭadyumnamabhidrutau //

evaṃ pravrajitāśvāni bhrāntanāgarathāni ca /
sainyāni samasañjanta prayuddhāni samantataḥ //

nirabhre vidyutastīvrā diśaśca rajasā vṛtāḥ /
prādurāsanmahotkāśca sanirghātā viśāmpate //

prādurbhūto mahāvātaḥ pāṃsuvarṣaṃ papāta ca /
nabhasyantardadhe sūryaḥ sainyena sajasā vṛtaḥ //

pramohaḥ sarvasatvānāmatīva samapadyata /
rajasā cābhibhūtānāmastrajālaiśca tudyatām //

vīrabāhuvisṛṣṭānāṃ sarvāvaraṇabhedinām /
sanghātaḥ śarajālānāṃ tumulaḥ samapadyata //

prakāśaṃ cakrurākāśamudyatāni bhujottamaiḥ /
nakṣatravimalābhāni śastrāṇi bharatarṣabha //

ārṣabhāṇi vicitrāṇi rukmajālāvṛtāni ca /
sampeturdikṣu sarvāsu carmāṇi bharatarṣabha //

sūryavarṇaiśca nistriṃśaiḥ pātyamānāni sarvaśaḥ . dikṣu sarvāsvadṛśyanta śarīrāṇi śirāṃsi ca /

bhagnacakrākṣanīḍāśca nipātitamahādhvajāḥ /
hatāśvāḥ pṛthivīṃ jagmustatratatra mahārathāḥ //

paripeturhayāścātra kecicchastrakṛtavraṇāḥ /
rathānviparikarṣanto hateṣu rathayodhiṣu //

śarāhatā bhinnadehā baddhayokrā hayottamāḥ . yugāni paryakarṣanta tatratatra sma bhārata /

adṛśyanta sasūtāśca sāśvāḥ sarathayodhinaḥ /
ekena balinā rājanvāraṇena vimarditāḥ //

gandhahastimadasrāvamāghrāya bahavo raṇe /
sannipāte balaughānāṃ gajairmamṛdire gajāḥ //

satomarairmahāmātrairnipatadbhirgatāsubhiḥ /
babhūvāyodhanaṃ channaṃ nārācābhihatairgajaiḥ //

sannipāte balaughānāṃ preṣitairvaravāraṇaiḥ /
nipeturyudhi sambhagnāḥ sayodhāḥ sadhvajā gajāḥ //

nāgarājopamairhastairnāgairākṣipya saṃyuge /
vyadṛśyanta mahārāja sambhagnā rathakūbarāḥ //

viśīrṇarathasaṅghāśca keśeṣvākṣipya dantibhiḥ /
drumaśākhā ivāvidhya niṣpiṣṭā rathino raṇe //

ratheṣu ca rathānyuddhe saṃsaktānvaravāraṇāḥ /
vikarṣanto diśaḥ sarvāḥ sampetuḥ sarvaśabdagāḥ //

teṣāṃ tathā karṣatāṃ tu gajānāṃ rūpamābabhau /
saraḥsu nalinījālaṃ viṣaktamiva karṣatām //

evaṃ sañchāditaṃ tatra babhūvāyodhanaṃ mahat /
sādibhiśca padātaiśca sadhvajaiśca mahārathaiḥ //