Mahabharata · Chapter 6.68

stavaṃ vai brahmasaṃyuktaṃ śṛṇu kṛṣṇasya bhārata /
brahmarṣibhiśca devaiśca yaḥ purā kathito bhuvi //

sādhyānāmapi devānāṃ devadeveśvaraḥ prabhuḥ /
lokabhāvanabhāvajña iti tvāṃ nārado'bravīt //

bhūtaṃ bhavyaṃ bhaviṣyacca mārkaṇḍeyo'bhyuvāca ha /
yajñaṃ tvāṃ caiva yajñānāṃ tapaśca tapasāmapi //

devānāmapi devaṃ ca tvāmāha bhagavānbhṛguḥ /
purāṇāṃ caiva paramaṃ viṣṇo rūpaṃ taveti ca //

vāsudevo vasūnāṃ tvaṃ śakraṃ sthāpayitā tathā /
devadevo'si devānāmiti dvaipāyano'bravīt //

pūrve prajānisarge ca dakṣamāhuḥ prajāpatim /
sraṣṭāraṃ sarvabhūtānāmaṅgirāstvāṃ tathā'bravīt //

avyaktaṃ te śarīrotthaṃ vyaktaṃ te manasi sthitam /
devāstvatsambhavāścaiva devalastvasito'bravīt //

śirasā te divyaṃ vyāptaṃ bāhubhyāṃ pṛthivī tathā /
jaṭharaṃ te trayo lokāḥ puruṣo'si sanātanaḥ //

evaṃ tvāmabhijānanti tapasā bhāvitā narāḥ /
ātmadarśanatṛptānāmṛṣīṇāṃ cāsi sattamaḥ //

rājarṣīṇāmudārāṇāmāhaveṣvanivartinām /
sarvadharmapradhānānāṃ tvaṃ gatirmadhusūdana //

iti nityaṃ yogavirdbhirbhagavānpuruṣottamaḥ /
sanatkumārapramukhaiḥ stūyate'bhyarcyate hariḥ //

eṣa te vistarastāta sankṣepaśca prakīrtitaḥ /
keśavasya yathā tattvaṃ suprīto bhaja keśavam //
sañjaya uvāca /

puṇyaṃ śrutvaitadākhyānaṃ mahārāja sutastava /
keśavaṃ bahumene sa pāṇḍavāṃśca mahārathān //

tamabravīnmahārāja bhīṣmaḥ śāntanavaḥ punaḥ /
māhātmyaṃ te śrutaṃ rājankeśavasya mahātkamanaḥ //

narasya ca yathātattvaṃ yanmāṃ tvaṃ pṛcchase nṛpa /
yadarthaṃ nṛṣu sambhūtau narānārāyaṇāvṛṣī //

avadhyau ca yathā vīrau saṃyugeṣvaparājitau /
yathā ca pāṇḍavā rājannavadhyā yudhi kasyacit //

prītimānhi dṛḍhaṃ kṛṣṇaḥ pāṇḍaveṣu yaśasviṣu /
tasmādbravīmi rājendra śamo bhavatu pāṇḍavaiḥ //

pṛthivīṃ bhuṅkṣva sahito bhrātṛbhirbalibhirvaśī /
narānārāyaṇau devāvavajñāya naśiṣyasi //

evamuktvā tava pitā tūṣṇīmāsīdviśāmpate /
vyasarjayacca rājānaṃ śayanaṃ ca viveśa ha //

rājā ca śibiraṃ prāyātpraṇipatya mahātmane /
śiśye ca śayane śubhre rātriṃ tāṃ bharatarṣabha //