Mahabharata · Chapter 6.67

vāsudevo mahadbhūtaṃ sarvalokeṣu kathyate /
tasyāgamaṃ pratiṣṭhāṃ ca jñātumicche pitāmaha //
bhīṣma uvāca /

vāsudevo mahadbhūtaṃ sarvadaivatadaivatam /
na paraṃ puṇḍarīkākṣāddṛśyate bharatarṣabha //

śrutaṃ me tāta rāmasya jāmadagnyasya jalpataḥ / nāradasya ca devarṣeḥ kṛṣṇadvaipāyanasya ca /
asito devalaścāpi vālakhilyāstapodhanāḥ //

mārkaṇḍeyaśca govinde kathayatyadbhutaṃ mahat /
sarvabhūtādibhūtātmā mahātmā puruṣottamaḥ //

āpo vāyuśca tejaśca trayametadakalpayat /
sa sṛṣṭvā pṛthivīṃ devīṃ sarvalokeśvaraḥ prabhuḥ //

apsu vai śayanaṃ cakre mahātmā puruṣottamaḥ /
sarvadevamayo devaḥ śayānaḥ śayane sukham //

mukhataḥ so'gnimasṛjatprāṇādvāyumathāpi ca /
sarasvatīṃ ca vedāṃśca manasaḥ sasṛje'cyuta //

eṣaka lokānsasarjādau devāṃśca ṛṣibhiḥ saha /
amṛtaṃ caiva mṛtyuṃ ca prajānāṃ prabhavāpyayau //

eṣa dharmaśca dharmajño varadaḥ sarvakāmadaḥ /
eṣa kartā ca kāryaṃ ca āderādiḥ svayaṃ prabhuḥ //

bhūtaṃ bhavyaṃ bhaviṣyacca pūrvametadakalpayat /
ubhe sandhye divaḥ khaṃ ca niyamāṃśca janārdanaḥ //

ṛṣīṃścaiva hi govindastapaścaivābhyakalpayat /
sraṣṭāraṃ jagataścāpi mahātmā prabhuravyayaḥ //

agrajaṃ sarvabhūtānāṃ sankarṣaṇamakalpayat /
śeṣaṃ cākalpayaddevamanantamiti taṃ viduḥ //

yo dhārayati bhūtāni dharāṃ cemāṃ saparvatām / dhyānayogena viprāśca taṃ vidanti mahaujasam /
karṇasrotobhavaṃ cāpi madhuṃ nāma mahāsuram //

tamugramugrakarmāṇamugrāṃ buddhaiṃ samāsthitam . harantaṃ brahmaṇo vedāñjaghāna brahmaṇaḥ pitā /
brahmaṇopacitiṃ kurvanmahātmā puruṣottamaḥ //

tasya tāta vadhādeva devadānavamānavāḥ /
madhusūdanamityāhurṛṣayaśca janārdanam //

varāhaṃ nārasiṃhaṃ ca trivikramamiti prabhum /
eṣa dhātā vidhātā ca sarveṣāṃ prāmināṃ hariḥ //

paraṃ hi puṇḍarīkākṣānna bhūtaṃ na bhaviṣyati /
mukhataḥ sosṛjadviprānbāhubhyāṃ kṣatriyāṃstathā //

vaiśyāṃścāpyūruto rājañśūdrānpadbhyāṃ tathaivaca /
tapasā niyataṃ devaṃ nidhānaṃ sarvadehinām //

brahmabhūtamamāvāsyāṃ paurṇamāsyāṃ tathaiva ca /
yogabhūtaṃ paricarankeśavaṃ mahadāpnuyāt //

keśavaḥ paramaṃ tejaḥ sarvalokapitāmahaḥ /
evamārhurhṛṣīkeśaṃ munayo vai narādhipa //

evamenaṃ vijānīhi ācāryaṃ pitaraṃ gurum /
kṛṣṇo yasya prasīdeta lokāstenākṣayā jitāḥ //

yaścaivainaṃ bhayasthāne keśavaṃ śaraṇaṃ vrajet /
sadā naraḥ paṭhaṃścedaṃ svastimānsa sukhī bhavet //

ye ca kṛṣṇaṃ prapadyante te na muhyanti mānavāḥ /
bhaye mahati magnāṃśca pāti nityaṃ janārdanaḥka //

sa taṃ yudhiṣṭhiro jñātvā yāthātathyena bhārata / sarvātmanā mahātmānaṃ keśavaṃ jagadīśvaram /
prapannaḥ śaraṇaṃ rājanyogānāṃ prabhumīśvaram //