મહાભારત · અધ્યાય 6.68

સ્તવં વૈ બ્રહ્મસંયુક્તં શૃણુ કૃષ્ણસ્ય ભારત ।
બ્રહ્મર્ષિભિશ્ચ દેવૈશ્ચ યઃ પુરા કથિતો ભુવિ ॥

સાધ્યાનામપિ દેવાનાં દેવદેવેશ્વરઃ પ્રભુઃ ।
લોકભાવનભાવજ્ઞ ઇતિ ત્વાં નારદોઽબ્રવીત્ ॥

ભૂતં ભવ્યં ભવિષ્યચ્ચ માર્કણ્ડેયોઽભ્યુવાચ હ ।
યજ્ઞં ત્વાં ચૈવ યજ્ઞાનાં તપશ્ચ તપસામપિ ॥

દેવાનામપિ દેવં ચ ત્વામાહ ભગવાન્ભૃગુઃ ।
પુરાણાં ચૈવ પરમં વિષ્ણો રૂપં તવેતિ ચ ॥

વાસુદેવો વસૂનાં ત્વં શક્રં સ્થાપયિતા તથા ।
દેવદેવોઽસિ દેવાનામિતિ દ્વૈપાયનોઽબ્રવીત્ ॥

પૂર્વે પ્રજાનિસર્ગે ચ દક્ષમાહુઃ પ્રજાપતિમ્ ।
સ્રષ્ટારં સર્વભૂતાનામઙ્ગિરાસ્ત્વાં તથાઽબ્રવીત્ ॥

અવ્યક્તં તે શરીરોત્થં વ્યક્તં તે મનસિ સ્થિતમ્ ।
દેવાસ્ત્વત્સમ્ભવાશ્ચૈવ દેવલસ્ત્વસિતોઽબ્રવીત્ ॥

શિરસા તે દિવ્યં વ્યાપ્તં બાહુભ્યાં પૃથિવી તથા ।
જઠરં તે ત્રયો લોકાઃ પુરુષોઽસિ સનાતનઃ ॥

એવં ત્વામભિજાનન્તિ તપસા ભાવિતા નરાઃ ।
આત્મદર્શનતૃપ્તાનામૃષીણાં ચાસિ સત્તમઃ ॥

રાજર્ષીણામુદારાણામાહવેષ્વનિવર્તિનામ્ ।
સર્વધર્મપ્રધાનાનાં ત્વં ગતિર્મધુસૂદન ॥

ઇતિ નિત્યં યોગવિર્દ્ભિર્ભગવાન્પુરુષોત્તમઃ ।
સનત્કુમારપ્રમુખૈઃ સ્તૂયતેઽભ્યર્ચ્યતે હરિઃ ॥

એષ તે વિસ્તરસ્તાત સન્ક્ષેપશ્ચ પ્રકીર્તિતઃ ।
કેશવસ્ય યથા તત્ત્વં સુપ્રીતો ભજ કેશવમ્ ॥
સઞ્જય ઉવાચ ।

પુણ્યં શ્રુત્વૈતદાખ્યાનં મહારાજ સુતસ્તવ ।
કેશવં બહુમેને સ પાણ્ડવાંશ્ચ મહારથાન્ ॥

તમબ્રવીન્મહારાજ ભીષ્મઃ શાન્તનવઃ પુનઃ ।
માહાત્મ્યં તે શ્રુતં રાજન્કેશવસ્ય મહાત્કમનઃ ॥

નરસ્ય ચ યથાતત્ત્વં યન્માં ત્વં પૃચ્છસે નૃપ ।
યદર્થં નૃષુ સમ્ભૂતૌ નરાનારાયણાવૃષી ॥

અવધ્યૌ ચ યથા વીરૌ સંયુગેષ્વપરાજિતૌ ।
યથા ચ પાણ્ડવા રાજન્નવધ્યા યુધિ કસ્યચિત્ ॥

પ્રીતિમાન્હિ દૃઢં કૃષ્ણઃ પાણ્ડવેષુ યશસ્વિષુ ।
તસ્માદ્બ્રવીમિ રાજેન્દ્ર શમો ભવતુ પાણ્ડવૈઃ ॥

પૃથિવીં ભુઙ્ક્ષ્વ સહિતો ભ્રાતૃભિર્બલિભિર્વશી ।
નરાનારાયણૌ દેવાવવજ્ઞાય નશિષ્યસિ ॥

એવમુક્ત્વા તવ પિતા તૂષ્ણીમાસીદ્વિશામ્પતે ।
વ્યસર્જયચ્ચ રાજાનં શયનં ચ વિવેશ હ ॥

રાજા ચ શિબિરં પ્રાયાત્પ્રણિપત્ય મહાત્મને ।
શિશ્યે ચ શયને શુભ્રે રાત્રિં તાં ભરતર્ષભ ॥