Mahabharata · Chapter 6.66

tataḥ sa bhagavāndevo lokānāmīśvareśvaraḥ /
brahmāṇaṃ pratyuvācedaṃ srigdhagambhīrayā girā //

viditaṃ tāta yogānme sarvametattavepsitam /
tathā tadbhavitetyuktvā tatraivāntaradhīyata //

tato devarṣigandharvā vismayaṃ paramaṃ gatāḥ /
kautūhalaparāḥ sarve pitāmahamathābruvan //

konvayaṃ yo bhagavatā praṇamya vinayādvibho /
vāgbhiḥ stuto variṣṭhābhiḥ śrotumicchāma taṃ vayam //

evamuktastu bhagavānpratyuvāca pitāmahaḥ /
devabrahmarṣigandharvānsarvānmadhurayā girā //

yattatparaṃ bhaviṣyaṃ ca bhavitavyaṃ ca yatparam /
bhūtātmā ca prabhuścaiva brahma yacca paraṃ padam //

tenāsmi kṛtasaṃvādaḥ prasannena surarṣabhāḥ . jagato'nugrahārthāya yācito me jagatpatiḥ /

mānuṣaṃ lokamātiṣṭha vāsudeva iti śrutaḥ /
asrurāṇāṃ vadhārthāya sambhavasva mahītale //

sangrāme nihatā ye te daityadānavarākṣasāḥ /
ta ime nṛṣu sambhūtā ghorarūpā mahābalāḥ //

teṣāṃ vadhārthaṃ bhagavānnareṇa sahito vaśī /
mānuṣīṃ yonimāsthāya cariṣyati mahītale //

naranārāyaṇau yau tau purāṇāvṛṣisattamau /
sahito mānuṣe loke sambhūtāvamitadyutī //

ajeyau samare yattau sahitairamarairapi /
mūḍhāstvetau na jānanti naranārāyaṇāvṛṣī //

tasyāhamagrajaḥ putraḥ sarvasya jagataḥ prabhuḥ /
vāsudevo'rcanīyo vaḥ sarvalokamaheśvaraḥ //

tathā manuṣyo'yamiti kadācitsurasattamāḥ /
nāvajñeyo mahāvīryaḥ śaṅkhacakragadādharaḥ //

etatparamakaṃ guhyametatparamakaṃ padam /
etatparamakaṃ brahma etatparamakaṃ yaśaḥ //

etadakṣaramavyaktametadvai śāśvataṃ mahaḥ /
yattatpuruṣasañjñaṃ vai gīyate jñāyate na ca //

etatparamakaṃ teja etatparamakaṃ sukham /
etatparamakaṃ satyaṃ kīrtitaṃ viśvakarmaṇā //

tasmātsendraiḥ suraiḥ sarvairlokaiścāmitavikramaḥka /
nāvajñeyo vāsudevo mānuṣo'yamiti prabhuḥ //

yaśca mānuṣamātro'yamiti brūyātsa mandadhīḥ /
hṛṣīkeśamavajñānāttamāhuḥ puruṣādhamam //

yoginaṃ taṃ mahātmānaṃ praviṣṭaṃ mānuṣīṃ tanum /
avamanyedvāsudevaṃ tamāhustamasaṃ janāḥ //

devaṃ carācarātmānaṃ śrīvatsāṅkaṃ suvarcasam /
padmanābhaṃ na jānāti tamāhustāmasaṃ budhāḥ //

kirīṭakaustubhadharaṃ mitrāṇāmabhayankaram /
avajānanmahātmānaṃ ghore tamasi mañjati //

evaṃ viditvā tattvārthaṃ lokānāmīśvareśvaraḥ . vāsudevo namaskāryaḥ sarvalokaiḥ surottamāḥ /
tasyāmahātmājo brahmā sarvasya jagataḥ patiḥ //
bhīṣma uvāca /

evamuktvā sa bhagavāndevānsarṣigakaṇānpurā /
visṛjya sarvabhūtāni jagāma bhavanaṃ svakam //

tato devāḥ sagandharvā munayo'psaraso'pi ca /
kathāṃ tāṃ brahmaṇā gītāṃ śrutvā prītā divaṃ yayuḥ //

etacchrutaṃ mayā tāta ṛṣīṇāṃ bhāvitātmanām /
vāsudevaṃ kathayatāṃ samavāye purātanam //

rāmasya jāmadagnyasya mārkaṇḍeyasya dhīmataḥ /
vyāsanāradayoścāpi sakāśādbharatarṣabha //

etamarthaṃ ca vijñāya śrutvā ca prabhumavyayam /
vāsudevaṃ mahātmānaṃ lokānāmīśvareśvaram //

yasya caivātmajo brahmā sarvasya jagataḥ pitā /
kathaṃ na vāsudevo'yamarcyaścejyaśca mānavaiḥ //

vārito'si mayā tāta munirbhirvedapāragaiḥ /
mā gaccha saṃyugaṃ tena vāsudevena dhanvinā //

mā pāṇḍavaiḥ sārdhamiti tattvaṃ mohānna budhyase /
manye tvāṃ rākṣasaṃ krūraṃ tathā cāsi tamovṛtaḥ //

yasmāddviṣasi govindaṃ pāṇḍavaṃ taṃ dhanañjayam /
naranārāyaṇau devī ko'nyo dviṣyāddhi mānavaḥ //

tasmādbravīmi te rājanneṣa vai śāśvato'vyayaḥ /
sarkavalokamayo nityaḥ śāstā dhātā dharo dhruvaḥ //

yo dhārayati lokāṃstrīṃścarācaraguruḥ prabhuḥ /
yoddhā jayaśca jetā ca sarvaprakṛtirīśvaraḥ //

rājansarvamayo hyeṣa tamorāgavivarjitaḥ /
yataḥ kṛṣṇastato dharmo yato dharmastato jayaḥ //

tasya māhātmyayogena yogenātmamayena ca /
dhṛtāḥ pāṇḍusutā rājañjayaścaiṣāṃ bhaviṣyati //

śreyoyuktāṃ sadā buddhiṃ pāṇ़ḍavānāṃ dadhāti yaḥ /
balaṃ caiva raṇe nityaṃ bhayebhyaścaiva rakṣati //

sa eṣa śāśvato devāḥ sarvaguhyamayaḥ śivaḥ /
vāsudeva iti jñeyo yanmāṃ pṛcchasi bhārata //

brāhmaṇaiḥ kṣatrikayairvaiśyaiḥ śūdraiśca kṛtalakṣaṇaiḥ /
sevyate'bhyarcyate caiva nityayuktaiḥ svakarmabhiḥka //

dvāparasya yugasyānte ādau kaliyugasya ca /
sātvataṃ vidhimāsthāya gītaḥ sankarṣaṇena vai //

sa eṣa sarvaṃ suramartyalokaṃ samudrakakṣyāntaritāṃ purīṃ ca /
yugeyuge mānuṣaṃ caiva vāsaṃ punaḥpunaḥ sṛjate vāsudevāḥka //