Mahabharata · Chapter 6.61

drauṇirbhūriśravāḥ śatyaścitrasenaśca māriṣaḥ /
putraḥ sāṃyamaneścaiva saubhadraṃ paryavārayan //

saṃsaktamatitejobhistamekaṃ dadṛśurjanāḥ /
pañcabhirmanujavyāghrairgajaiḥ siṃhaśiśuṃ yathā //

nātilakṣyatayā kaścinna śaurye na parākrame /
babhūva sadṛśaḥ kārṣṇernāstre nāpi ca lāghave //

tathā tamātmajaṃ yuddhe vikramantamarindamam /
dṛṣṭvā pārthaḥ susaṃyattaṃ siṃhanādamathānadat //

pīḍayānaṃ tu tatsainyaṃ pautraṃ tava viśāmpate /
dṛṣṭvā tvadīyā rājendra samantātparyavārayan //

dhvajinīṃ dhārtarāṣṭrāṇāṃ dīnaśatruradīnavat /
pratyudyayau sa saubhadrastejasā ca balena ca //

tasya lāghavamārgasthamādityasadṛśaprabham . vyadṛśyata mahaccāpaṃ samare yudhyataḥ paraiḥ /

sa drauṇimiṣuṇaikena viddhvā śalyaṃ ca pañcabhiḥ /
dhvajaṃ sāṃyamaneśvaiva so'ṣṭābhiścicchide tataḥ //

rukmadaṇḍāṃ mahāśaktiṃ preṣitāṃ saumadattina /
śitenoragasankāśāṃ patriṇābhijaghāna tām //

śalyasya ca mahāvegānasyataḥ samare śarān / dhanuściccheda bhallena tīvravegana phālguniḥ
jaghānārjunadāyādaścaturbhiścaturo hayān //

bhūriśravāśca śalyaśca drauṇiḥ sāṃyamaniḥ śalaḥ /
nābhyavartantaṃ saṃrabdhāḥ kārṣṇerbāhubalodayāt //

tatastrigartā rājendra madrāśca saha kekayaiḥ /
pañcaviṃśatisāhasrāstava putreṇa coditāḥ //

dhanurvedavido mukhyā ajeyāḥ śatrubhiryudhi /
saha putraṃ jighāṃsantaṃ parivavruḥ kirīṭinam //

tau tu tatra pitāputrau parikṣiptau mahārathau /
dadarśa rājanpāñcalyaḥ senāpatirarindama //

sa vāraṇarathoghānāṃ sahasrairbahubhirvṛtaḥ /
vājibhiḥ pattibhiścaiva vṛtaḥ śatasahasraśaḥ //

pārāvatāśvaḥ sa rathamāsthāya paravīrahā dhanurviṣphārya sankruddho nodayitvā ca vāhinīm /
yayau taṃ madrakānīkaṃ kekayāṃśca parantapa //

tena kīrtimatā guptamanīkaṃ dṛḍhadhanvanā /
saṃrabdharathanāgāśvaṃ yotsyamānamaśobhata //

so'rjunapramukhe yāntaṃ pāñcālakulavardhanaḥ /
tribhiḥ śāradvataṃ bāṇairjatradeśe samārpayat //

tataḥ sa madrakānhatvā daśaiva daśabhiḥ śaraiḥ /
pṛṣṭharakṣaṃ jaghānāśu bhallena kṛtavarmaṇaḥ //

damanaṃ cāpi dāyādaṃ pauravasya mahātmanaḥ /
jaghāna vimalāgneṇa nārācena parantapaḥ //

tataḥ sāṃyamaneḥ putraḥ pāñcālyaṃ yuddhadurmadam /
avidhyatriṃśatā bāṇairdaśabhiścāsya sārathim //

so'tividdho maheṣvāsaḥ sṛkkiṇī parisaṃlihan /
bhallena bhṛśatīkṣṇena nicakartāsya kārmukam //

athainaṃ pañcaviṃśatyā kṣiprameva samārpayat /
aśvāṃścāsyāvadhīdrājannubhau tau pārṣṇisārathī //

sa hatāśve rate tiṣṭhandadarśa bharatarṣabha /
putraḥ sāṃyamaneḥ putraṃ pāñcālyasya mahātmanaḥ //

sa pragṛhya mahāghoraṃ nistriṃśavaramāyasam /
padātistūrṇamānarcchadrathasyaṃ puruṣarṣabhaḥ //

taṃ mahaughamivāyāntaṃ svātpatantamivoragam /
bhrāntāvaraṇanistriṃśaṃ kālotsṛṣṭamivāntakam //

dīpyamānamivādityaṃ mattavāraṇavikramam /
apaśyanpāṇḍavāstatra dhṛṣṭadyumnaśca pārṣataḥ //

tasya pāñcāladāyādaḥ pratīpamabhidhāvataḥ /
śitanistriṃśahastasya śarāvaraṇadhāriṇaḥ //

bāṇavegamatītasya tathābhyāśamupeyuṣaḥ /
tvaransenāpatiḥ kruddho bibheda gadayā śiraḥ //

tasya rājansanistriṃśaṃ suprabhaṃ ca śarāvaram /
hatasya patato hastādvegena nyapatadbhuvi //

taṃ nihatya gadāgreṇa sa lebhe paramāṃ mudam /
putraḥ pāñcālarājasya mahātmā bhīmavikramaḥ //

tasminhate maheṣvāse śalyaputre mahārathe /
hāhākāro mahānāsīttava sainyasya māriṣa //

tataḥ sāṃyamaniḥ kruddho dṛṣṭvā nihatāmātmajam /
abhidudrāva vegena pāñcālyaṃ yuddhadurmadam //

tau tatra samare śūrau sametau yuddhadurmadau /
dadṛśuḥ sarvarājānaḥ kuravaḥ pāṇḍavāstathā //

tataḥ sāṃyamaniḥ kruddhaḥ pārṣataṃ paravīrahā /
ājaghāna tribhirbāṇaistotrairiva mahādvipam //

tathaiva pārṣataṃ śūraṃ śalyaḥ samitiśobhanaḥ /
ājaghānorasi kruddhastato yuddhamavartata //