Mahabharata · Chapter 6.60

vyuṣṭāṃ niśāṃ bhārata bhāratānā- manīkinīnāṃ pramukhe mahātmā /
yayau sapatnānprati jātakopo vṛtaḥ samagreṇa balena bhīṣmaḥ //

taṃ droṇaduryodhanabāhlikāśca tathaiva durmarṣaṇacitrasenau /
jayadrathaścātibalo balaughai- rnṛpāstathānye prayayuḥ samantāt //

sa tairmahadbhiśca mahārathaiśca tejasvibhirvīryavadbhiśca rājan /
rarāja rājā sa tu rājamukhyai- rvṛtaḥ sadevairiva vajrapāṇiḥ //

tasminnanīkapramukhe viṣaktā dodhūyamānāśca mahāpatākāḥ /
suraktapītāsitapāṇḍurābhā mahāgajaskandhagatā virejuḥ //

sā vāhinī śāntanavena guptā mahārathairvāraṇavājibhiśca /
babhau savidyutstanayitnukalpā jalāgame dyauriva jātameghā //

tato raṇāyābhimukhī prayātā pratyarjunaṃ śāntanavābhiguptā /
senāmahognā sahasā kurūṇāṃ vego yathā bhīma ivāpagāyāḥ //

taṃ vyālanānāvidhagūḍhasāraṃ gajāśvapādātarathaughapakṣam /
vyūhaṃ mahāmeghasamaṃ mahātmā dadarśa dūrātkapirājaketuḥ //

viniryayau ketumatā rathena nararṣabhaḥ śvetahayena kāle /
jaye dhṛtaḥ śatruvarūthinīnāṃ yathā surendro'suravāhinīnām //

nārāyaṇenendra ivābhiguptaḥ śaśīva sūryeṇa sameyivānyathā /
tathā mahātmā saha keśavena varīthinīnāṃ pramukhe rarāja //

sopaskaraṃ sottarabandhureṣaṃ yattaṃ yadūnāmṛṣabheṇa saṅkhye /
kapidhvajaṃ prekṣya rathaṃ viṣeduḥ sahaiva putraistava kauraveyāḥ //

prakalpitaṃ guptamudāyudhena kirīṭinā lokamahārathena /
taṃ vyūharājaṃ dadṛśustvadīyā- ścatuścaturvyālasahasrakīrṇam //

yathaiva pūrve'hani dharmarājñā vyūhaḥ kṛtaḥ kauravasattamena /
yathā na bhūto bhuvi mānuṣeṣu na dṛṣṭapūrvo na ca saṃśrutaśca //

tato yathādeśamupetya tasthuḥ pāñcālamukhyāḥ saha cedimukhyaiḥ /
tataḥ samādeśasamāhatāni bherīsahasrāṇi vinedurājau //

śaṅkhasvanāstūryaravāḥ praṇeduḥ sarveṣvanīkeṣu sasiṃhanādāḥ /
tataḥ sabāṇāni mahāsvanāni visphāryamāṇāni dhanūṃṣi vīraiḥ //

kṣaṇena bherīpaṇavapraṇādā- nantardadhuḥ śaṅkhamahāsvanāṃśca /
tacchaṅkhaśabdāvṛtamantarikṣa- muddhūtabhaumadrutareṇujālam //

mahānubhāvāśca tataḥ prakāśa- nālokya vīrāḥ sahasā'bhipetuḥ /
rathī rathenābhihataḥ sasūtaḥ papāta sāśvaḥ sarathaḥ saketuḥ //

gajo gajenābhihatāḥ papāta padātinā cābhihataḥ padātiḥ /
āvartamānānyabhivartamānai- rghorīkṛtānyadbhutadarśanāni //

prāsaiśca khaṅgaiśca samāhatāni sadaśvabṛndāni sadaśvabṛndaiḥ /
suvarṇatārāgaṇabhūṣitāni sūryaprabhābhāni śarāvarāṇi //

vidāryamāṇāni paraśvathaiśca prāsaiśca svaṅgaiśca nipetururvyām /
gajairviṣaṇāparagātrarugṇāḥ kecitsasūtā rathinaḥ prapetuḥ //

gajarṣabhāścāpi jagarṣabheṇa nipātitā bāṇahatāḥ pṛthivyām /
gajaughavegoddhatasāditānāṃ śrutvā viṣeduḥ sahasā manuṣyāḥ //

ārtasvanaṃ sādipadātiyūnāṃ viṣāṇagātrāvaratāḍitānām /
sambhrāntanāgāśvarathe muhūrte mahākṣaye sādipadātiyūnām //

mahārathaiḥ samparivāryamāṇaṃ sandṛśya dūrātkapirājaketum /
taṃ pañcatālocchritatālaketuḥ sadaśvavegādbhutavīryayānaḥ //

mahāstrabāṇāśanidīptamantaṃ kirīṭinaṃ śāntanavo'bhyadhāvat /
tathaiva śakrapratimaprabhāva- mindrātmajaṃ droṇamukhā visasnuḥ //

kṛpaśca śalyaśca viviṃśatiśca duryodhanaḥ saumadattiśca rājan /
tato rathānāṃ pramukhādupetya sarvāstrivitkāñcanacitravarmā //

javena śūro'bhisasāra sarvāṃ- stānarjunasyātmabhavo'bhimanyuḥ /
teṣāṃ mahāstrāṇi mahārathānā- masahyakarmā vinihatya kārṣṇiḥ //

babhau mahāmantrahutārcimālī sadogataḥ sanbhagavānivāgniḥ /
tataḥ sa tūrṇaṃ rudhirodaphenāṃ kṛtvā nadīmāśu raṇe ripūṇām //

jagāma saubhadramatītya bhīṣmo mahārathaṃ pārthamadīnasatvaḥ /
tataḥ prahasyādbhutavikrameṇa gāṇḍīvamuktena śilāśitena //

vipāṭhajālena mahāstrajālaṃ vināśayāmāsa kirīṭamālī /
tamuttamaṃ sarvadhanurdharāṇā- masaktakarmā kapirājaketuḥ //

bhīṣmaṃ mahātmā'bhivavarṣa tūrṇaṃ śaraughajālairvimalaiśca bhallaiḥ /
tathaiva bhīṣmāhatamantarikṣe mahāstrajālaṃ kapirājaketoḥ //

viśīryamāṇaṃ dadṛśustvadīyā divākareṇeva tamobhibhūtam /
evaṃvidhaṃ kārmukabhīmanāda- madīnavatsatpuruṣottamābhyām / dadarśa lokaḥ kurusṛñjayāśca
taddvairathaṃ bhīṣmadhanañjayābhyām //