Mahabharata · Chapter 6.55

tato'parāhṇabhūyiṣṭhe tasminnahani bhārata /
rathanāgāśvapattīnāṃ sādināṃ ca mahākṣaye //

droṇaputreṇa śalyena kṛpeṇa ca mahātmanā /
samasajjata pāñcālyastribhiraitairmahārathaiḥ //

sa lokaviditānaśvānnijaghāna mahābalaḥ /
drauṇeḥ pāñcāladāyādaḥ śitairdaśabhirāśugaiḥ //

tataḥ śalyarathaṃ tūrṇamāsthāya hatavāhanaḥ /
drauṇiḥ pāñcāladāyādamabhyavarṣadatheṣubhiḥ //

dhṛṣṭadyumnaṃ tu saṃyuktaṃ drauṇinā vīkṣya bhārata /
saubhadro'bhyapatattūrṇaṃ vikiranniśitāñśarān //

sa śalyaṃ pa़ñcaviṃśatyā kṛpaṃ ca navabhiḥ śaraiḥ /
aśvatthāmānamaṣṭābhirvivyādha puruṣarṣabhaḥ //

ārjuniṃ tu tatastūrṇaṃ drauṇirvivyādha patriṇā /
śalyo'tha daśabhiścaiva kṛpaśca niśitaistribhiḥ //

lakṣmaṇastava pautrastu saubhadraṃ samavasthitam /
abhyavartata saṃhṛṣṭastato yuddhamavartata //

dauryodhaniḥ susankruddhaḥ saubhadraṃ paravīrahā /
vivyādha samare rājaṃstadadbhutamivābhavat //

abhimanyuḥ susankruddho bhrātaraṃ bharatarṣabha /
śaraiḥ pañcāśatai rājankṣiprahasto'bhyavidhyata //

lakṣmaṇo'pi punastasya dhanuściccheda patriṇā /
muṣṭideśe mahārāja tataste cukruśurjanāḥ //

tadvihāya dhanuśchinnaṃ saubhadraṃ paravīrahā /
anyadādattavāṃścitraṃ kārmukaṃ vegavattaram //

tau tatra samare yuktau kṛtapratikṛtaiṣiṇau /
anyonyaṃ viśisvaistīkṣṇairjaghnatuḥ puruṣarṣabhau //

tato duryodhano rāja dṛṣṭvā putraṃ mahāratham /
pīḍitaṃ tava pautreṇa prāyāttatra prajeśvaraḥ //

sannivṛtte tava sute sarva eva janādhipāḥ /
ārjuniṃ rathavaṃśena samantātparyavārayan //

sa taiḥ parivṛtaḥ śūraiḥ śūro yudhi sudurjayaiḥ /
na sma pravyathate rājankṛṣṇatulyaparākramaḥ //

saubhadramatha saṃsaktaṃ dṛṣṭvā tatra dhanañjayaḥ /
abhidudrāva vegena trātukāmaḥ svamātmajam //

tataḥ sarathanāgāśvā bhīṣmadroṇapurogamāḥ /
abhyavartanta rājānaḥ sahitāḥ savyasācinam //

udvūtaṃ sahasā bhaumaṃ nāgāśvarathapattibhiḥ /
divākararathaṃ prāpya rajastīvramadṛśyata //

tāni nāgasahasrāṇi bhūmipālaśatāni ca /
tasya bāṇapathaṃ prāpya nābhyavartanta sarvaśaḥ //

praṇeduḥ sarvabhūtāni babhūvustimirā diśaḥ /
kurūṇāṃ cānayastīvraḥ samadṛśyata dāruṇaḥ //

nāpyantarikṣaṃ na diśo na bhūmirna ca bhāskaraḥ /
prajajñe bharataśreṣṭha sastrasaṅghaiḥ kirīṭinaḥ //

sāditā rathanāgāśca hatāśvā rathino raṇe /
vipradrutarathāḥ keciddṛśyante rathayūthapāḥ //

virathā rathinaścānye dhāvamānāḥ samantataḥ /
tatratatraiva dṛśyante sāyudhāḥ sāṅgadairbhujaiḥ //

hayārohā hayāṃstyaktvā gajārohāśca dantinaḥ /
arjunasya bhayādrājansamantādvipradudruvuḥ //

rathebhyaśca gajebhyaśca hayebhyaśca narādhipāḥ /
patitāḥ pātyamānāśca dṛśyante'rjunasāyakaiḥ //

sagadānudyatānbāhūnsakhaṅgāṃśca viśāmpate /
saprāsāṃśca satūṇīrānsaśarānsaśarāsanān //

sāṅkuśākansapatākāṃśca tatratatrārjuno nṛṇām /
nicakarta śarairugrai raudraṃ vapuradhārayat //

parighāṇāṃ pradīptānāṃ mudgarāṇāṃ ca māriṣa /
prāsānāṃ bhindipālānāṃ nistriśānāṃ ca saṃyuge //

paraśvathānāṃ pīkṣṇānāṃ tomarāṇāṃ ca bhārata /
varmaṇāṃ cāpaviddhānāṃ kāñcanānāṃ ca bhūmipa //

dhvajānāṃ carmaṇāṃ caiva vyajanānāṃ ca sarvaśaḥ /
chatrāṇāṃ hemadaṇḍānāṃ tomarāṇāṃ ca bhārata //

pratodānāṃ ca yokrāṇāṃ kaśānāṃ caiva māriṣa /
rāśayaḥ smātra dṛśyante vinikīrṇā raṇakṣitau //

nāsīttatra pumānkaścittava sainyasya bhārata /
yo'rjunaṃ samare śūraṃ pratyudyāyātkathañcana //

yo yo hi samare pārthaṃ pratyudyāti viśāmpate /
sa saṅkhye viśikhaistīkṣṇaiḥ paralokāya nīyate //

teṣu vidravamāṇeṣu tava yodheṣu sarvaśaḥ /
arjuno vāsudevaśca dadhmaturvārijottamau //

tatpabhagnaṃ balaṃ dṛṣṭvā pitā devavratastava /
abravītsamare śūraṃ bhāradvājaṃ smayanniva //

eṣa pāṇḍusuto vīra kṛṣṇena sahito balī /
tathā karoti sainyāni yathā kuryāddhaṉañjayaḥ //

na hyeṣa samare śakyo vijetuṃ hi kathañcana /
yathāsya dṛśyate rūpa kālāntakayamopamam //

na nivartayituṃ cāpi śakyeyaṃ mahatī camūḥ /
anyonyapreyā paśya dravatīyaṃ varūthinī //

eṣa cāstaṃ giriśreṣṭhaṃ bhānumānpratipadyate /
cakṣūṃṣi sarvalokasya saṃharanniva sarvathā //

tatrāvahāraṃ samprāptaṃ manye'haṃ puruṣarṣabha /
śrāntā bhītāśca no yodhā na yotsyanti kathañcana //

evamuktvā tato bhīṣmo droṇamācāryasattamam /
avahāramatho cakre tāvakānāṃ mahārathaḥ //

tataḥ sarathanāgāśvā jaṃya prāpya samopakāḥ /
pāñcālāḥ pāṇḍavāścaiva praṇeduśca punaḥ punaḥ //

prayayuḥ śibirāyaiva dhanañjayapuraskṛtāḥ / vāditraghoṣaiḥ saṃhṛṣṭā praṇadyanto mahārathāḥ //

tato'vahāraḥ sainyānāṃ tava teṣāṃ ca bhārata /
astaṃ gacchati sūrye'bhūtsandhyākāle ca vartati //