Mahabharata · Chapter 6.53

kathaṃ droṇo maheṣvāsaḥ pāñcālyaścāpi pārṣataḥ /
ubhau samīyaturyattau tanmamācakṣva sañjaya //

diṣṭameva paraṃ manye pauruṣāditi me matiḥ /
yatra śāntanavo bhīṣmo nātaradyudhi pāṇḍavam //

bhīṣmo hi samare kruddho hanyāllokāṃścarācarān /
sa kathaṃ pāṇḍavaṃ yuddhe nātaratsañjayaujasā //
sañjaya uvāca /

śrṛṇu rājansthiro bhūtvā yuddhametatsudāruṇam /
na śakyāḥ pāṇḍavā jetuṃ devairapi savāsavaiḥ //

droṇastu niśitairbāṇairdhṛṣṭadyumnamavidhyata /
sārathiṃ cāsya bhallena rathanīḍādapātayat //

tathā'sya caturo vāhāṃścaturbhiḥ sāyakottamaiḥ /
pīḍayāmāsa sankruddho dhṛṣṭadyumnasya māriṣa //

dhṛṣṭadyumnastato droṇaṃ navatyā niśitaiḥ śaraiḥ /
vivyādha prahasanvīrastiṣṭhatiṣṭheti cābravīt //

tataḥ punarameyātmā bhāradvājaḥ pratāpavān /
śaraiḥ pracchādayāmāsa dhṛṣṭadyumnamamarṣaṇam //

ādade ca śaraṃ ghoraṃ pārṣatāntacikīrṣakayā /
śakrāśanisamasparśaṃ kāladaṇḍamivāparam //

hāhākāro mahānāsītsarvasainyeṣu bhārata /
tamiṣuṃ sandhitaṃ dṛṣṭvā bhāradvājena saṃyuge //

tatrādbhutamapaśyāma dhṛṣṭadyumnasya pauruṣam /
yadekaḥ samare vīrastasthau giririvācalaḥ //

taṃ ca dīptaṃ śaraṃ ghoramāyāntaṃ mṛtyumātmanaḥ /
ciccheda śaravṛṣṭiṃ ca bhāradvāje mumoca ha //

tata uccukruśuḥ sarve pāñcālāḥ pāṇḍavaiḥ saha /
dhṛṣṭadyumnena tatkarma kṛtaṃ dṛṣṭvā suduṣkaram //

tataḥ śaktiṃ mahāvegāṃ svarṇavaiḍūryabhūṣitām /
droṇasya nidhanākāṅkṣī cikṣepa sa parākramī //

tāmāpatantīṃ sahasā śaktiṃ kanakabhūṣitām /
tridhā ciccheda samare bhāradvājo hasanniva //

śaktiṃ vinihatāṃ dṛṣṭvā dhṛṣṭadyumnaḥ pratapavān /
vavarṣa śaravarṣāṇi droṇaṃ prati janeśvaraḥ //

śaravarṣaṃ tatastattu sannivārya mahāyaśāḥ /
droṇo drupadaputrasya madhye ciccheda kārmukam //

sa cchinnadhanvā samare gadāṃ gurvī mahāyaśāḥ /
droṇāya preṣayāmāsa girisāramayīṃ balī //

sā gadā vegavanmuktā prāyāddroṇajighāṃsayā /
tatrādbhutamapaśyāma bhāradvājasya pauruṣam //

lāghavādvyaṃsayāmāsa gadāṃ hemavibhūṣitām /
vyaṃsayitvā gadāṃ tāṃ ca preṣayāmāsa pārṣatam //

bhallānsuniśitānpītātānrukmapuṅkhānsudāruṇān /
te tasya kavacaṃ bhittvā papuḥ śoṇitamāhave //

athānyaddhanurādāya dhṛṣṭadyumno mahārathaḥ /
droṇaṃ yudhi parākramya śarairvivyādha pañcabhiḥ //

rudhirāktau tatastau tu śuśubhāte nararṣabhau /
vasantasamaye rājanpuṣpitāviva kiṃśukau //

amarṣitastato rājanparākramya camūmukhe /
droṇo drupadaputrasya punaściccheda kārmukam //

athainaṃ chinnadhanvānaṃ śaraiḥ sannataparvabhiḥ /
abhyavarṣadameyātmā vṛṣṭyā megha ivācalam //

sārathiṃ cāsya bhallena rathanījādapātayat /
athāsya caturo vāhāṃścaturbhirniśitaiḥ śaraiḥ //

pātayāmāsa samare siṃhanādaṃ nanāda ca /
tato'pareṇa bhallena hastāccāpamathācchinat //

sa cchinnadhanvā viratho hatāśvo hatasārathiḥ /
gadāpāṇiravārohatsvyāpayanpauruṣaṃ mahat //

tāmasya viśisvaistūrṇaṃ pātayāmāsa bhārata /
rathādanavarūḍhasya tadadbhutamivābhavat //

tataḥ sa vipulaṃ carma śatacandraṃ ca bhānumat /
khaṅgaṃ ca vipulaṃ divyaṃ pragṛhya subhujo balī //

abhidudrāva vegena droṇasya vadhākāṅkṣayā /
āmiṣārthī yathā siṃho vane mattamiva dvipam //

tatrādbhutamapaśyāma bhāradvājasya pauruṣam /
lāghavaṃ cāstrayogaṃ ca balaṃ bāhvośca bhārata //

yadenaṃ śaravarṣeṇa vārayāmāsa pārṣatam /
na śaśāka tato gantuṃ balavānapi saṃyuge //

nivāritastu droṇena dhṛṣṭadyumno mahārathaḥ /
nyāvārayaccharaughāṃstāṃścarmaṇā kṛtahastavat //

tato bhīmo mahābāhuḥ sahasā'bhyapatadbalī /
sāhāyyakārī samare pārṣatasya mahātmanaḥ //

sa dromaṃ niśitairbāṇai rājanvivyādha saptabhiḥ /
pārṣataṃ ca rathaṃ tūrṇaṃ svakamārohayattadā //

tato duryodhano rājankaliṅgaṃ samacodayat /
sainyena mahatā yuktaṃ bhāradvājasya rakṣaṇe //

tataḥ sā mahatī sena kaliṅgānāṃ janeśvara /
bhīmamabhyudyayau tūrṇaṃ tava putrasya śāsanāt //

pāñcālyamatha santyajya droṇo'pi rathināṃ varaḥ /
virāṭadrupadau vṛddhau vārayāmāsa saṃyuge //

dhṛṣṭadyumno'pi samare dharmarājānamabhyayāt /
tataḥ pravavṛte yuddhaṃ tumulaṃ romaharṣaṇam //

kaliṅgānāṃ ca samare bhīṣmasya ca mahātmanaḥ /
jagataḥ prakṣayakaraṃ ghorarūpaṃ bhayāvaham //